اسا ءىرى كولەمدە سۋبسيديا جىمقىرۋ ءىسى بويىنشا 30 ادام، ونىڭ ىشىندە شەنەۋنىكتەر مەن كاسىپكەرلەر ءتۇرلى مەرزىمگە سوتتالدى، دەپ حابارلايدى Dala News.
«قوستاناي قالاسىنىڭ №2 سوتىندا 30 ايىپتالۋشىعا قاتىستى قىلمىستىق ءىس قارالدى. ولاردىڭ قاتارىندا “BEEFSTREAM” جانە “BEEF EXPORT GROUP” ج ش س ديرەكتورى پ.، اتالعان سەرىكتەستىكتەردىڭ قىزمەتكەرلەرى، باسقا ج ش س ديرەكتورلارى، شارۋا قوجالىقتارىنىڭ باسشىلارى، جەكە كاسىپكەر، ۆەتەرينار دارىگەرلەر جانە وبلىس اكىمدىگىنىڭ اۋىل شارۋاشىلىعى باسقارماسىنىڭ قىزمەتكەرلەرى بار. سوت جازا تاعايىنداۋ كەزىندە كوپشىلىگىندە كامەلەتكە تولماعان بالالارىنىڭ بولۋى، كىناسىن مويىنداۋى جانە شىنايى وكىنۋى سياقتى جەڭىلدەتەتىن ءمان-جايلاردى ەسكەردى. ازاماتتىق تالاپتار قاناعاتتاندىرىلدى. تاركىلەنگەن مۇلىك بويىنشا تىيىم ساقتالدى. 1،3 ملن اقش دوللارى، ءتورت مىڭنان استام ەۋرو جانە 600 ملن تەڭگەدەن استام قاراجات مەملەكەت كىرىسىنە تاركىلەندى»، – دەپ حابارلادى قوستاناي قالاسىنىڭ №2 سوتى.
سوت دەرەگىنشە، 2021 جىلدىڭ جەلتوقسانىنان 2023 جىلدىڭ ماۋسىمىنا دەيىن ايىپتالۋشىلار مال شارۋاشىلىعى مەن ەت وڭدەۋ سالاسىنا بولىنگەن 2،5 ملرد تەڭگەدەن استام مەملەكەتتىك سۋبسيديانى جىمقىرۋ سحەماسىن ۇيىمداستىرعان.
سوت ۇكىمىمەن:
•“BEEFSTREAM” جانە “BEEF EXPORT GROUP” ج ش س ديرەكتورى پ. – 14 جىلعا
•ج ش س ديرەكتورى ر. – 10 جىلعا
•بۋحگالتەر د. – 9 جىلعا
•ءوزىن-وزى جۇمىسپەن قامتىعان پ. – 9 جىلعا
•ج ش س ديرەكتورى س. – 10 جىلعا
•ۆەتەريناريالىق ستانسيا قىزمەتكەرى س. – 8 جىلعا
•ديرەكتوردىڭ ورىنباسارى گ. – 7 جىلعا
•قىزمەتكەر ا. – التى جىلعا
•شارۋا قوجالىعىنىڭ باسشىسى ب. – 5 جىلعا
•شارۋا قوجالىعىنىڭ باسشىسى ا. – 10 جىلعا
•ۆەتەرينار دارىگەر س. – 5 جىلعا
•شارۋا قوجالىعىنىڭ باسشىسى س. – 5 جىلعا
•شارۋا قوجالىعىنىڭ باسشىسى ك. – 6 جىلعا
•باسقارما قىزمەتكەرى د. – 5 جىل 6 ايعا
•جۇمىسشى ك. – ءۇش جىلدان استام مەرزىمگە باس بوستاندىعىنان ايىرىلدى.
سونىمەن قاتار، ءبىرقاتار ايىپتالۋشىعا راقىمشىلىققا بايلانىستى جازا ءبىر جىلدان ءتورت جىلعا دەيىن شارتتى تۇردە قىسقارتىلدى، كەيبىرى نەگىزگى جازادان بوساتىلعان.
باسقارما مامانى ە.-گە پارا الۋ بابى بويىنشا 3 جىل 6 اي جازا تاعايىندالىپ، ول 5 جىلعا كەيىنگە شەگەرىلدى.
سونداي-اق ۆەتەرينار دارىگەر ف. كىنالى دەپ تانىلعانىمەن، ونىڭ قايتىس بولۋىنا بايلانىستى ءىس توقتاتىلدى.
سوت مالىمەتىنشە، ايىپتالۋشىلاردىڭ ارەكەتتەرى سالىقتان جالتارۋ، ۇيىمداسقان توپ قۇرۋ، بيۋدجەت قاراجاتىن جىمقىرۋ، زاڭسىز كاسىپكەرلىك، پارا الۋ جانە بەرۋ، قىلمىستىق جولمەن الىنعان قاراجاتتى زاڭداستىرۋ جانە باسقا دا باپتار بويىنشا سارالانعان.
پروكۋرور سوتتان ەكى جىلدان 13 جىلعا دەيىن باس بوستاندىعىنان ايىرۋدى سۇراعان.
ۇكىم زاڭدى كۇشىنە ەنگەن جوق.
