اباي وبلىسىنىڭ اكىمى بەرىك ءۋالي سەمەي قالاسىنداعى نەگىزگى مەديسينالىق مەكەمەلەردى ارالادى. ايماق باسشىسى وبلىستىق جەدەل جاردەم اۋرۋحاناسى مەن №1 قالالىق ەمحانانىڭ وزەكتى ماسەلەلەرىمەن تانىستى، دەپ حابارلايدى Dalanews.kz
وبلىستىق جەدەل جاردەم اۋرۋحاناسى 2013 جىلى «100 مەكتەپ، 100 اۋرۋحانا» مەملەكەتتىك باعدارلاماسى اياسىندا سالىنىپ، پايدالانۋعا بەرىلگەن. زاماناۋي مەديسينالىق مەكەمە 375 توسەك-ورىنعا ارنالعان.
اۋرۋحانا باسشىسى وبلىس اكىمىنە ءبىرقاتار وزەكتى ماسەلەلەردى جەتكىزدى. جەراستى سۋىنىڭ كوتەرىلۋىنە بايلانىستى مەديسينالىق مەكەمەنىڭ جەرتولەسىنە سۋدىڭ جايىلعاندىعىن ايتتى.
ايماق باسشىسى بۇل ماسەلەدەن حاباردار ەكەنىن اتاپ ءوتتى.
«عيمارات قۇرىلىسى اۋەلدە دۇرىس جوسپارلانباعان. جەر بەدەرى تولىق زەرتتەلمەگەن. درەناج جۇيەسى دە دۇرىس جوبالانباعان. سوندىقتان عيماراتتىڭ ىرگەتاسىنا زاقىم كەلۋ ءقاۋپى بار. بۇل ماسەلەنى شەشۋ ءۇشىن ءتيىستى جوبالىق-سمەتالىق قۇجاتتار دايىندالىپ، مەملەكەتتىك ساراپتاماعا جىبەرىلدى. ماسەلەنى شەشۋ جولدارىن قاراستىرامىز. جەكە باقىلاۋىمدا بولادى»،- دەدى وبلىس اكىمى.
بۇگىندە اۋرۋحانادا كادر تاپشىلىعى جوق. مامانداردى باسپانامەن قامتۋ ماسەلەسى بار.
قازىرگى ۋاقىتتا جەدەل جاردەم اۋرۋحاناسىنىڭ بارلىق كورپۋستارىنىڭ شاتىرى مەن قاسبەتتەرىنە كۇردەلى جوندەۋ جۇرگىزىلۋدە. بۇعان وبلىستىق بيۋدجەتتەن قارجى بولىنگەن. وبلىس اكىمى جوندەۋ جۇمىستارىنىڭ بارىسىن باقىلادى. مەردىگەر كومپانيا وكىلى قۇرىلىستى جىل سوڭىنا دەيىن بىتىرەتىنىن جەتكىزدى. ايماق باسشىسى جوندەۋ جۇمىستارىن ساپالى ءارى ۋاقتىلى اياقتاۋ كەرەكتىگىن تاپسىردى.
اۋرۋحانادا ينسۋلت ورتالىعى، ەندوكرينولوگيالىق، گەماتولوگيالىق، كارديولوگيالىق بولىمشەلەر سياقتى وڭىردەگى بىرەگەي مەديسينالىق قۇرىلىمدار جۇمىس ىستەيدى. سونىمەن قاتار، حيرۋرگيا، كوپسالالى جاراقات جانە ورتوپەديالىق حيرۋرگيا، ۋرولوگيا بولىمدەرى تاۋلىك بويى ۇزدىكسىز قىزمەت كورسەتەدى. مۇنداعى قابىلداۋ-دياگنوستيكالىق بولىمشە جىلىنا 39 مىڭنان استام ناۋقاستى قابىلدايدى. اۋرۋحانادا 12 وپەراسيالىق زال بار. سونىڭ ىشىندە زاماناۋي گيبريدتى وپەراسيالىق جانە كۇندىزگى ستاسيونار قاراستىرىلعان. مەديسينالىق مەكەمەدە جىلىنا 9 مىڭنان اسا حيرۋرگيالىق، تراۆماتولوگيالىق، كارديوحيرۋرگيالىق، نەيروحيرۋرگيالىق، گينەكولوگيالىق جانە ۋرولوگيالىق وپەراسيالار جاسالادى.
وبلىس اكىمى بارعان ەكىنشى مەديسينالىق نىسان - №1 قالالىق ەمحانا. بۇل – شاھارداعى ەڭ ءىرى امبۋلاتوريالىق مەكەمەلەردىڭ ءبىرى.
1977 جىلى سالىنعان ەكى كورپۋستى ەمحانادا 92 دارىگەر مەن 189 ورتا مەديسينالىق قىزمەتكەر ەڭبەك ەتەدى. مەكەمەنىڭ ماتەريالدىق-تەحنيكالىق بازاسى زامان تالابىنا ساي جابدىقتالعان. ەمحانادا 7 ءبولىم، دەنساۋلىق، امبۋلاتوريالىق حيرۋرگيا، دەنساۋلىق ورتالىقتارى، پروفيلاكتيكا جانە الەۋمەتتىك-پسيحولوگيالىق، بالالار ستوماتولوگياسى، شۇعىل مەديسينالىق كومەك بولىمدەرى جۇمىس ىستەيدى.
قازىرگى ۋاقىتتا اۋرۋحاناعا 38 مىڭنان استام ادام تىركەلگەن. ءبىر اۋىسىمدا 500-گە جۋىق ناۋقاس قابىلدانادى.
مۇنداعى وزەكتى ماسەلە – عيماراتتىڭ ەسكىرىپ، توزىپ تۇرعاندىعى. نىسان بىردە ءبىر رەت كۇردەلى جوندەۋ كورمەگەن. قازىرگى ۋاقىتتا جوبالىق سمەتالىق قۇجاتتاما ازىرلەنۋدە.
ايماق باسشىسى مەديسينالىق مەكەمەنىڭ قالا تۇرعىندارى ءۇشىن ماڭىزى جوعارى ەكەنىن اتاپ ءوتتى.
«حالىقتىڭ ەڭ كوپ جۇگىنەتىن جەرلەرىنىڭ ءبىرى – وسى ەمحانا. مۇندا تۇرعىندارعا زامان تالابىنا ساي قىزمەت كورسەتىلۋى كەرەك. نىساندى كۇردەلى جوندەۋدەن وتكىزۋىمىز قاجەت. اكىمدىك تاراپىنان بارلىق قولداۋدى كورسەتەمىز. وڭىردەگى توزىعى جەتكەن مەديسينالىق نىسانداردى كەزەڭ-كەزەڭىمەن جاڭعىرتۋدى جوسپارلاپ وتىرمىز»،- دەدى وبلىس اكىمى.
