Abai oblysynyń ákimi Berik Ýáli Semei qalasyndaǵy negizgi meditsinalyq mekemelerdi aralady. Aimaq basshysy oblystyq jedel járdem aýrýhanasy men №1 qalalyq emhananyń ózekti máselelerimen tanysty, dep habarlaidy Dalanews.kz
Oblystyq jedel járdem aýrýhanasy 2013 jyly «100 mektep, 100 aýrýhana» memlekettik baǵdarlamasy aiasynda salynyp, paidalanýǵa berilgen. Zamanaýi meditsinalyq mekeme 375 tósek-orynǵa arnalǵan.
Aýrýhana basshysy oblys ákimine birqatar ózekti máselelerdi jetkizdi. Jerasty sýynyń kóterilýine bailanysty meditsinalyq mekemeniń jertólesine sýdyń jaiylǵandyǵyn aitty.
Aimaq basshysy bul máseleden habardar ekenin atap ótti.
«Ǵimarat qurylysy áýelde durys josparlanbaǵan. Jer bederi tolyq zerttelmegen. Drenaj júiesi de durys jobalanbaǵan. Sondyqtan ǵimarattyń irgetasyna zaqym kelý qaýpi bar. Bul máseleni sheshý úshin tiisti jobalyq-smetalyq qujattar daiyndalyp, memlekettik saraptamaǵa jiberildi. Máseleni sheshý joldaryn qarastyramyz. Jeke baqylaýymda bolady»,- dedi oblys ákimi.
Búginde aýrýhanada kadr tapshylyǵy joq. Mamandardy baspanamen qamtý máselesi bar.
Qazirgi ýaqytta jedel járdem aýrýhanasynyń barlyq korpýstarynyń shatyry men qasbetterine kúrdeli jóndeý júrgizilýde. Buǵan oblystyq biýdjetten qarjy bólingen. Oblys ákimi jóndeý jumystarynyń barysyn baqylady. Merdiger kompaniia ókili qurylysty jyl sońyna deiin bitiretinin jetkizdi. Aimaq basshysy jóndeý jumystaryn sapaly ári ýaqtyly aiaqtaý kerektigin tapsyrdy.
Aýrýhanada insýlt ortalyǵy, endokrinologiialyq, gematologiialyq, kardiologiialyq bólimsheler siiaqty óńirdegi biregei meditsinalyq qurylymdar jumys isteidi. Sonymen qatar, hirýrgiia, kópsalaly jaraqat jáne ortopediialyq hirýrgiia, ýrologiia bólimderi táýlik boiy úzdiksiz qyzmet kórsetedi. Mundaǵy qabyldaý-diagnostikalyq bólimshe jylyna 39 myńnan astam naýqasty qabyldaidy. Aýrýhanada 12 operatsiialyq zal bar. Sonyń ishinde zamanaýi gibridti operatsiialyq jáne kúndizgi statsionar qarastyrylǵan. Meditsinalyq mekemede jylyna 9 myńnan asa hirýrgiialyq, travmatologiialyq, kardiohirýrgiialyq, neirohirýrgiialyq, ginekologiialyq jáne ýrologiialyq operatsiialar jasalady.
Oblys ákimi barǵan ekinshi meditsinalyq nysan - №1 qalalyq emhana. Bul – shahardaǵy eń iri ambýlatoriialyq mekemelerdiń biri.
1977 jyly salynǵan eki korpýsty emhanada 92 dáriger men 189 orta meditsinalyq qyzmetker eńbek etedi. Mekemeniń materialdyq-tehnikalyq bazasy zaman talabyna sai jabdyqtalǵan. Emhanada 7 bólim, densaýlyq, ambýlatoriialyq hirýrgiia, densaýlyq ortalyqtary, profilaktika jáne áleýmettik-psihologiialyq, balalar stomatologiiasy, shuǵyl meditsinalyq kómek bólimderi jumys isteidi.
Qazirgi ýaqytta aýrýhanaǵa 38 myńnan astam adam tirkelgen. Bir aýysymda 500-ge jýyq naýqas qabyldanady.
Mundaǵy ózekti másele – ǵimarattyń eskirip, tozyp turǵandyǵy. Nysan birde bir ret kúrdeli jóndeý kórmegen. Qazirgi ýaqytta jobalyq smetalyq qujattama ázirlenýde.
Aimaq basshysy meditsinalyq mekemeniń qala turǵyndary úshin mańyzy joǵary ekenin atap ótti.
«Halyqtyń eń kóp júginetin jerleriniń biri – osy emhana. Munda turǵyndarǵa zaman talabyna sai qyzmet kórsetilýi kerek. Nysandy kúrdeli jóndeýden ótkizýimiz qajet. Ákimdik tarapynan barlyq qoldaýdy kórsetemiz. Óńirdegi tozyǵy jetken meditsinalyq nysandardy kezeń-kezeńimen jańǵyrtýdy josparlap otyrmyz»,- dedi oblys ákimi.
