سەمەيدە «تۋعان جەرگە تۋىڭدى تىك» ينۆەستيسيالىق فورۋمى باستالدى. اۋقىمدى شاراعا قازاقستان رەسپۋبليكاسى پارلامەنتى جانە سەنات دەپۋتاتتارى، شەتەلدىك جانە وتاندىق ينۆەستورلار، اباي وبلىسىنان شىققان ءىرى كاسىپكەرلەر، قوعام قايراتكەرلەرى قاتىسۋدا. ماڭىزدى جيىنعا 500-گە جۋىق كاسىپكەر شاقىرىلعان، دەپ حابارلايدى Dalanews.kz
فورۋمنىڭ اشىلۋ سالتاناتىندا وبلىس اكىمى بەرىك ءۋالي ءوڭىردىڭ ينۆەستيسيالىق الەۋەتى تۋرالى باياندادى.
«بۇگىن اباي ەلىنىڭ دامۋىنا ارنالعان ماڭىزدى قادام - «تۋعان جەرگە تۋىڭدى تىك» ينۆەستيسيالىق فورۋمىنا جينالىپ وتىرمىز. بۇل فورۋم – ءوزارا وي بولىسەتىن، پىكىر الماساتىن، ەڭ باستىسى، بولاشاققا بىرگە قادام باسۋعا مۇمكىندىك بەرەتىن الاڭ. مەملەكەت باسشىسى قاسىم-جومارت كەمەل ۇلى توقايەۆ «اباي تۋعان توپىراققا كەلگەن ادام بۇل جەردىڭ كيەسىن سەزىنەدى، قاسيەتىن ۇعادى. سەمەي – ۇلى دالانىڭ ۇلاعاتتى ولكەسى. بۇل – الاش ارىستارىنىڭ ءىزى قالعان، زيالىلارىمىز ەلدىڭ بولاشاعى ءۇشىن كۇرەسكەن قاستەرلى ءوڭىر. سەمەي – ۇلتتىق عىلىم مەن ءبىلىمنىڭ، ونەر مەن مادەنيەتتىڭ تاريحي ورتالىعى» دەپ اتاپ وتكەن قاسيەتتى سەمەي تورىنە كەلىپ وتىرسىزدار. اباي وبلىسى – جاڭادان قۇرىلعانىمەن، الەۋەتى جوعارى ايماق. تابيعي رەسۋرستارىمىز، ەڭبەكقور حالقى، وندىرىستىك ينفراقۇرىلىمى مەن گەوگرافيالىق ورنالاسۋى – تۇراقتى دامۋعا نەگىز بولا الادى. الايدا، وسى مۇمكىندىكتەردى ىسكە اسىرۋ ءۇشىن جەرگىلىكتى كاسىپكەرلەر مەن ينۆەستورلاردىڭ بەلسەندىلىگى اۋاداي قاجەت»، - دەدى ايماق باسشىسى.
قولايلى گەوگرافيالىق ورنالاسۋىنىڭ ارقاسىندا اباي وبلىسى جۇڭگو، رەسەي جانە ورتالىق ازيانى بايلانىستىرادى. بۇل تۇرعىدان، ءىرى حالىقارالىق ساۋدا دالىزدەرىنە شىعاتىن كولىك-لوگيستيكالىق حابتى دامىتۋعا ۇلكەن مۇمكىندىك بار.
الداعى جىلدارى وڭىردە ءبىرقاتار ءىرى ينۆەستيسيالىق جوبالار جۇزەگە اسىرىلماق. سولاردىڭ ءبىرى – اياگوز–باقتى تەمىرجولى مەن قۇرعاق پورتتىڭ قۇرىلىسى.
قازىرگى تاڭدا وبلىستا 8 مىڭنان استام تۇراقتى جۇمىس ورنىن قۇرۋعا باعىتتالعان، جالپى قۇنى 2،7 ترلن تەڭگە بولاتىن
38 پەرسپەكتيۆالى ينۆەستيسيالىق جوبادان تۇراتىن ءبىرىڭعاي پۋل قالىپتاستى.
2024 جىلدىڭ قورىتىندىسى بويىنشا ناقتى سەكتورداعى نەگىزگى كاپيتالعا سالىنعان ينۆەستيسيالار كولەمى 575،3 ملرد تەڭگە بولدى. ال تىكەلەي شەتەلدىك ينۆەستيسيالار كورسەتكىشى – 775،3 ملن اقش دوللارى.بىلتىر 14،4 ملرد تەڭگەگە 8 جوبا ىسكە اسىرىلىپ، 330 جۇمىس ورنى قۇرىلدى. 2025 جىلى 31،1 ملرد تەڭگەگە 10 ينۆەستيسيالىق جوبانى ىسكە اسىرىپ، 767 جۇمىس ورنى اشىلماق. بۇگىندە 1 ملرد تەڭگەگە 1 جوبا ىسكە قوسىلدى.
بيىل 10 ميلليارد تەڭگەگە «سەماز» ج ش س ونەركاسىپتىك الاڭدارىن كەڭەيتىپ، جىلىنا 6 مىڭ ارنايى تەحنيكا شىعاراتىن جەلى جاڭارتىلادى. «كازپوليگراف» ج ش س جىلىنا قۋاتتىلىعى 40 ميلليون قاعاز بەن كارتون بۇيىمدارى ءوندىرىسىن ىسكە قوسادى.
وبلىس اكىمى وسى ۋاقىتقا دەيىن 50-دەن استام شەتەلدىك ينۆەستورمەن كەزدەسۋ وتكىزدى. سونىمەن قاتار، وتكەن ايدا اباي وبلىسى دەلەگاسياسى شىڭجاڭ ۇيعىر اۆتونوميالىق اۋدانىنا جۇمىس ساپارىمەن بارىپ، «ۇلكەن التاي» سۋبوڭىرلىك ىنتىماقتاستىق جونىندەگى حالىقارالىق كونفەرەنسياسىنا قاتىستى. 20 كەزدەسۋ وتكىزىپ، جالپى سوماسى – 1،5 ملرد اقش دوللارىنان اساتىن 15 ىنتىماقتاستىق تۋرالى مەموراندۋمعا قول قويىلدى.
وسى ساپاردىڭ ناتيجەسىندە سەمەي قالاسىنداعى «ءوندىرىس» يندۋستريالىق ايماعىندا «SUTO KAZAKHSTAN» كاسىپورنى جۇڭگو كومپانياسىمەن بىرلەسىپ، جالپى سوماسى 50 ملن اقش دولل. قۇرايتىن چيپتەر مەن ەلەكتروندى قوندىرعىلاردى وندىرەتىن زاۋىتتىڭ قۇرىلىسى باستالدى.
سەمەيدەگى جەر كولەمى 96 گەكتاردى قۇرايتىن «ءوندىرىس» يندۋستريالىق ايماعىندا ءتورت جوبا جۇزەگە اسىرىلۋدا. كاسىپكەرلەر مەن ينۆەستورلار تاراپىنان وندىرىستىك الاڭدارعا دەگەن قاجەتتىلىك جوعارى
سوندىقتان يندۋستريالىق ايماقتىڭ اۋماعىن 600 گەكتارعا دەيىن كەڭەيتۋ جۇمىسى قولعا الىنادى.
فورۋم قورىتىندىسىندا 14 ءوزارا ىنتىماقتاستىق مەموراندۋمىنا قول قويىلادى دەپ جوسپارلانىپ وتىر.
فورۋم اياسىندا وبلىستىڭ وندىرىستىك، اۋىل شارۋاشىلىق الەۋەتىن كورسەتەتىن ۇلكەن كورمە جۇرتشىلىق نازارىنا ۇسىنىلدى. جيىنعا كەلگەن قۇرمەتتى قوناقتار وبلىس اكىمىمەن بىرگە كورمەنى تاماشالادى.
