باسىنا كونديسيونەر قۇلاپ جارالانعان فەلدشەر كوز جۇمدى، دەپ حابارلايدى Dalanews.kz.

مارقۇمنىڭ كۇيەۋى بۇل اقپاراتتى Atameken Business ارناسىنا راستادى.

ەسكە سالساق، استانادا توعىز قاباتتى تۇرعىن ءۇيدىڭ سىرتقى كىرپىش قاپتاماسى وپىرىلىپ ءتۇسىپ، ءۇش ادام زارداپ شەككەن. ءارى قاراي ولارعا كومەككە كەلگەن ەكى جەدەل جاردەم قىزمەتكەرى دە اۋىر جاراقات الدى. فەلدشەردىڭ باسىنا بيىكتەن كونديسيونەر قۇلاپ، ءبارى جانساقتاۋ بولىمىنەن ءبىر-اق شىقتى.

وتكەن سەنبىدە قاننەن-قاپەرسىز كەتىپ بارا جاتقان اپالى-سىڭلىلەردىڭ باسىنا تۇرعىن ءۇيدىڭ قاسبەتى قۇلاعان. اۋىر جاراقات العان ەكەۋ دەرەۋ اعاسىنا قوڭىراۋ شالىپ كومەككە شاقىرادى.

ارتىنشا جان ۇشىرا جەتىپ كەلگەن ەر ادام دا ساپاسىز سالىنعان قۇرىلىستان زارداپ شەككەن. ەكى جەدەل جاردەم قىزمەتكەرىن قوسقاندا، جالپى سانى بەس ادام اۋرۋحاناعا جەتكىزىلدى.

ناۋقاستاردىڭ جاقىندارى توتەنشە جاعداي قىزمەتكەرلەرى دەر كەزىندە كەلمەدى دەپ وتىر. الايدا قۇتقارۋشىلار بۇل اقپاراتتى جوققا شىعاردى.

پوليسەيلەر "ساپاسىز سالىنعان قۇرىلىس" بابى بويىنشا تەرگەۋ باستاپ، وقيعانىڭ ءمان-جايىن انىقتاۋعا كىرىستى.