الماتى قالاسىندا جاستاردى دەسترۋكتيۆتى ءدىني يدەولوگيادان قورعاۋ جانە ونلاين كەڭىستىكتەگى راديكالدى كونتەنتتىڭ الدىن الۋ باعىتىنداعى جۇمىستار كۇشەيتىلىپ كەلەدى. بۇل تۋرالى الماتى قالاسى ءدىن ىستەرى جونىندەگى باسقارماسى مالىمدەدى، دەپ حابارلايدى Dalanews.kz.

باسقارما مالىمەتىنشە، پروفيلاكتيكا جۇمىستارى بىرنەشە ماقساتتى توپقا — مەكتەپ وقۋشىلارىنا، ستۋدەنتتەرگە جانە NEET ساناتىنداعى جاستارعا باعىتتالعان.

مەكتەپ وقۋشىلارىمەن جۇيەلى جۇمىس جۇرگىزىلۋدە

الماتىنىڭ جالپى ءبىلىم بەرەتىن مەكتەپتەرىندە ارنايى سىنىپ ساعاتتارى، اشىق كەزدەسۋلەر جانە دارىستەر ءوتىپ جاتىر. شارالار قالالىق ءبىلىم باسقارماسىمەن بىرلەسىپ ۇيىمداستىرىلادى.

كەزدەسۋلەر بارىسىندا:

• زايىرلىلىق قاعيداتى مەن ءدىن سالاسىنداعى مەملەكەتتىك ساياسات،

• ينتەرنەتتەگى راديكالدى كونتەنتتىڭ قاۋىپتىلىگى،

• كۇماندى ءدىني توپتاردان قورعانۋ جولدارى

جاس ەرەكشەلىگىنە ساي فورماتتا تۇسىندىرىلەدى. جۇمىسقا پەداگوگتار مەن مەكتەپ پسيحولوگتارى دا تارتىلعان.

ستۋدەنتتەرمەن ءاقپاراتتىق-تۇسىندىرۋ جۇمىسى كەڭەيتىلگەن

كوللەدجدەر مەن جوعارى وقۋ ورىندارىندا پىكىرتالاس الاڭدارى، دوڭگەلەك ۇستەلدەر، ترەنينگتەر وتكىزىلىپ، جاستارعا دەسترۋكتيۆتى يدەولوگيانىڭ بەلگىلەرى، شەتەلدىك ءدىني وقۋ ورىندارىنا ءتۇسۋ كەزىندەگى تاۋەكەلدەر، اقپاراتتىڭ دۇرىس كوزىن تاڭداۋ ماسەلەلەرى تۇسىندىرىلەدى.

جوو-لاردا تەولوگتار، ءدىنتانۋشىلار، پسيحولوگتار مەن قۇقىق قورعاۋ وكىلدەرى تۇراقتى تۇردە لەكسيا وقيدى. ستۋدەنتتىك ۇيىمدار جانە جاستار رەسۋرستىق ورتالىقتارى دا پروفيلاكتيكاعا بەلسەندى اتسالىسىپ كەلەدى.

NEET ساناتىنداعى جاستارمەن جەكە فورماتتاعى جۇمىس بار

وقىمايتىن جانە جۇمىس ىستەمەيتىن جاستارعا قاتىستى پروفيلاكتيكا جۇمىستارى جۇمىسپەن قامتۋ، جاستار ساياساتى جانە الەۋمەتتىك قورعاۋ بولىمدەرىمەن بىرگە جۇرگىزىلەدى.

NEET ساناتىمەن وتكىزىلەتىن ءىس-شارالاردىڭ نەگىزگى باعىتتارى:

• شاعىن توپتىق كەزدەسۋلەر،

• موتيۆاسيالىق ترەنينگتەر،

• پسيحولوگيالىق جانە قۇقىقتىق كەڭەس بەرۋ،

• راديكالدىق يدەولوگياعا تارتۋدىڭ تەتىكتەرى تۋرالى اقپارات بەرۋ.

جاستاردى جۇمىسقا ورنالاستىرۋ، كاسىبي كۋرستارعا تارتۋ جانە مەملەكەتتىك قولداۋ باعدارلامالارىنا قوسۋ — ەكسترەميزمنىڭ الدىن الۋدىڭ ماڭىزدى بولىگى سانالادى.

راديكالدى كونتەنتپەن ونلاين كۇرەس: تاۋلىك بويعى مونيتورينگ

باسقارما ينتەرنەت پەن الەۋمەتتىك جەلىلەردەگى دەسترۋكتيۆتى ءدىني كونتەنتپەن كۇرەسۋدىڭ بىرنەشە باعىتىن اتاپ ءوتتى.

1. ونلاين-مونيتورينگ

الەۋمەتتىك جەلىلەر مەن اشىق ينتەرنەت-رەسۋرستار تاۋلىك بويى باقىلانادى. راديكالدىق مازمۇنى بار ماتەريالدار انىقتالسا، اقپارات بىردەن ۋاكىلەتتى ورگاندارعا جولدانادى.

2. زاڭسىز كونتەنتتى بۇعاتتاۋ

قولدانىستاعى زاڭناماعا سايكەس، رۇقسات ەتىلمەگەن ءدىني ماتەريالدارى بار رەسۋرستاردى شەكتەۋ نەمەسە بۇعاتتاۋ ماسەلەسى قارالادى. بۇل جۇمىس پروكۋراتۋرا، قۇقىق قورعاۋ ورگاندارى جانە بايلانىس وپەراتورلارىمەن بىرلەسىپ جۇزەگە اسادى.

3. ءپوزيتيۆتى كونتەنت ءوندىرۋ

دەسترۋكتيۆتى اقپاراتقا بالاما رەتىندە باسقارما:

• بەينەروليكتەر،

• اقپاراتتىق ماقالالار،

• ينفوگرافيكا،

• ساراپشىلارمەن سۇحبات سياقتى ماتەريالدار ازىرلەۋگە قولداۋ كورسەتەدى. ولار رەسمي سايتتاردا جانە الەۋمەتتىك مەديا پلاتفورمالاردا جاريالانادى.

4. مەدياساۋتتىلىقتى ارتتىرۋ

جاستارمەن، اتا-انالارمەن جانە پەداگوگتارمەن كەزدەسۋلەردە:

• فەيك اقپاراتتى تانۋ،

• كۇماندى ءدىني چاتتاردىڭ ءقاۋپى،

• راديكالدى توپتارعا تارتۋ تاسىلدەرى جايلى تۇسىندىرىلەدى. ازاماتتارعا كۇدىكتى كونتەنتتى نەمەسە تۇلعالاردى انىقتاعان جاعدايدا قايدا حابارلاسۋعا بولاتىنى ايتىلادى.

باسقارما وكىلدەرىنىڭ ايتۋىنشا، جاستارمەن كەشەندى جۇمىس جۇرگىزۋ جانە ينتەرنەتتەگى راديكالدى مازمۇنمەن كۇرەستى كۇشەيتۋ الماتىداعى ءدىني تۇراقتىلىقتى نىعايتۋعا باعىتتالعان.

مامانداردىڭ پىكىرىنشە، دەسترۋكتيۆتى يدەولوگيانىڭ الدىن الۋ — تەك تىيىم سالۋ عانا ەمەس، قوعامنىڭ اقپاراتتىق يممۋنيتەتىن كۇشەيتۋ، جاستارمەن اشىق ديالوگ قۇرۋ جانە دۇرىس ءدىني ساۋاتتىلىق قالىپتاستىرۋ.