قازاقستاننىڭ يۋنەسكو جانىنداعى تۇراقتى وكىلدىگى ۇيىمداستىرعان بۇل ءىس-شارا قالالاردى ساقتاۋ ماسەلەلەرىن جاھاندىق دەڭگەيدە تالقىلاۋعا ىقپال ەتتى. ءىس-شارانى ق ر يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ باس حاتشىسى ءاليا بايسابايەۆا مودەراتورلىق ەتىپ جۇرگىزىپ وتىردى. ماجىلىسكە يۋنەسكو-نىڭ باس ديرەكتورى ودرە ازۋلە ارنايى شاقىرىلدى.
الدىمەن قازاقستاننىڭ ساۋد ارابياسى كورولدىگىندەگى توتەنشە جانە وكىلەتتى ەلشىسى بەرىك ارىن، پاريج قالاسىنداعى يۋنەسكو جانە باسقا دا حالىقارالىق ۇيىمدار جانىنداعى ق ر تۇراقتى وكىلدىگىنىڭ كەڭەسشىسى رىسبەك الىبەكوۆ، يۋنەسكو-نىڭ بۇكىلالەمدىك مۇرا ورتالىعىنىڭ ديرەكتورى (پاريج) لازار ەلۋندۋ اسسومو، ق ر مادەنيەت جانە اقپارات مينيسترلىگى مادەنيەت كوميتەتىنىڭ ءتوراعاسى كۇمىس سەيىتوۆا قۇتتىقتاۋ ءسوزىن ارناپ، ءىس-شارانىڭ ماڭىزدىلىعىنا توقتالدى. ەلشى ءارى يۋنەسكو-داعى ق ر تۇراقتى وكىلى اسقار ءابدىراحمانوۆ بەينەبايلانىس ارقىلى ونلاين قاتىستى.
تۇركىستان وبلىسى اكىمدىگىنىڭ وكىلى رەتىندە «Open Turkistan» تۋريستىك اقپاراتتىق ورتالىعى ءجشس-نىڭ باس ديرەكتورى سەرىكبولسىن ساندىبايەۆ «تۇراقتى تۋريزم، ەكونوميكالىق ءوسۋ جانە الەۋمەتتىك دامۋ» تاقىرىبىندا بايانداما جاساپ، ءوڭىردىڭ تۋريستىك ەرەكشەلىگىن تانىستىردى.
– وزدەرىڭىزبەن بۇگىنگىدەي وتە ماڭىزدى جيىندا جۇزدەسكەنىمە قۋانىشتىمىن. تۇركىستان وبلىسىنىڭ تۋريستىك الەۋەتىن تانىستىرۋعا ىقپال ەتكەن ەلشى ءارى يۋنەسكو-داعى ق ر تۇراقتى وكىلى اسقار ءابدىراحمانوۆقا العىس بىلدىرەمىز! بيىل ماۋسىم ايىندا يۋنەسكو-نىڭ باس ديرەكتورى ودرە ازۋلە قازاقستانداعى ساپارى بارىسىندا تۇركىستان قالاسىنا كەلىپ، قوجا احمەت ياساۋي كەسەنەسىن ارالاعان بولاتىن. تۇركىستان وبلىسى – قازاقستاننىڭ ءتۋريزمىن دامىتۋ تۇرعىسىنان جوعارى الەۋەتكە يە وڭىرلەرىنىڭ ءبىرى. وبلىس اۋماعىندا ءتۋريزمنىڭ 3 باعىتى ايقىندالعان. ولار تاريحي-تانىمدىق، ەكولوگيالىق جانە ەمدىك-ساۋىقتىرۋ ءتۋريزمى.
تۇركىستان ءوڭىرى – تاريحي جانە مادەني مۇراعا جانە اشىق اسپان استىنداعى مۇراجايعا باي. وبلىس اۋماعىندا 1770 تاريحي جانە مادەني ەسكەرتكىش ورنالاسقان. ال ەمدىك-ساۋىقتىرۋ باعىتى بويىنشا 72 شيپاجاي جۇمىس ىستەيدى. تۇركىستان وبلىسىنىڭ تابيعاتى الۋان ءتۇرلى. قالانىڭ قاربالاسىنان ءۇزىلىس العىسى كەلەتىندەر تاۋ بوكتەرىنە بارىپ دەمالادى. وڭىردە 4 ەرەكشە قورعالاتىن تابيعي اۋماق بار. اتاپ ايتقاندا، «اقسۋ-جاباعىلى» جانە «قاراتاۋ» قورىقتارى، «سىرداريا-تۇركىستان» جانە «سايرام-وگەم» تابيعي پاركتەرى. جىل سوڭىنا دەيىن وبلىس اۋماعىندا حالىقارالىق جانە رەسپۋبليكالىق ءىس-شارالاردى ۇيىمداستىرۋ جوسپارلانۋدا. ءبىرىنشى كەزەكتە ءوڭىر تۇرعىندارى مەن قوناقتارىنىڭ ءتيىمدى ۋاقىت وتكىزۋىنە باعىتتالعان. جوعارىدا اتالعانداردىڭ بارلىعىن ەسكەرە وتىرىپ، سىزدەردى تۇركىستان وبلىسىنا ساياحات جاساۋعا شاقىرامىز. ساپارلارىڭىز جاڭا سەزىمدەر مەن وزگەشە ەموسيالارعا تولى بولاتىنىنا سەنىمدىمىن، – دەگەن س.ساندىبايەۆ قاتىسۋشىلارعا برەندتىك ونىمدەر، اقپاراتتىق ۇلەستىرمە ماتەريالدارى مەن قولونەر بۇيىمدارىن تابىستادى.
سونداي-اق وكىل تۇركىستان وبلىسىنا بارۋدىڭ 10 نەگىزگى سەبەبىن اتاپ، جەكەلەي توقتالىپ ءوتتى. دالىرەك ايتقاندا حالىقارالىق مارتەبەسى بار ەسكەرتكىش، يۋنەسكو-نىڭ بۇكىلالەمدىك مادەني مۇرا تىزىمىنە ەنگىزىلگەن تۇركىستان ءوڭىرىنىڭ باستى تۋريستىك تارتىمدىلىعى – قوجا احمەت ياساۋي كەسەنەسى، ميستيكالىق ورىن رەتىندە تانىمالدىعى ارتقان – اقمەشىت ۇڭگىرى، 50-دەن استام شيپاجايى بار سارىاعاش كۋرورتى، تاۋلى ايماقتاردا دەمالۋ، قايتا جاندانعان تۇركىستان قالاسى تۋرالى، سونداي-اق قولونەر بۇيىمدارى، جەرگىلىكتى تاعامدار بويىنشا اقپاراتتار ۇسىنىلدى.
مۇنان سوڭ ساراپشىلار ءوز يدەيالارى جانە تاجىريبەلەرىمەن ءبولىسىپ، پىكىر الماستى. ءارى قاراي بەينە-تانىستىرىلىم مەن ۇلتتىق مۋزىكالىق قويىلىمدار ۇيىمداستىرىلدى.
ايتا كەتەيىك، بيىل تۇركىستان وبلىسىنا كەلۋشىلەر مەن تۋريستەردىڭ سانى ارتقان. ونىڭ ىشىندە بيىل 8 ايدا ەرەكشە قورعالاتىن تابيعي اۋماقتاردا 115 مىڭ ادام دەمالعان. ال بىلتىر 12 ايدا 74،9 مىڭ ادام كەلگەن بولاتىن. سونداي-اق بيىل 8 ايدا تۇركىستان قالاسىنا بىركۇندىك كەلۋشىلەر سانى 519،3 مىڭ ادامعا جەتتى.
