تۇركىستان وبلىسى اۋماعىندا وبلىس اكىمى دارحان ساتىبالدىنىڭ تاپسىرماسىمەن قۇرىلىس نىساندارىنا باقىلاۋ مەن قاداعالاۋ كۇشەيتىلدى. وبلىس اۋماعىنداعى زاڭسىز، نەگىزگى قۇجاتتارسىز جانە ساپاسىز قۇرىلىستاردىڭ الدىن الۋ، بولدىرماۋ ماقساتىندا كەشەندى مونيتورينگ جۇرگىزىلۋدە. ونىڭ بارىسى جايلى وبلىس اكىمى دارحان ساتىبالدىنىڭ توراعالىعىمەن وتكەن اپتالىق اپپارات وتىرىسىندا باياندالدى.
تۇركىستان وبلىسىنىڭ باقىلاۋ جونىندەگى باسقارماسىنىڭ مەملەكەتتىك ساۋلەت-قۇرىلىس باقىلاۋى سالاسىنداعى باستى مىندەتتەرىنىڭ ءبىرى – قۇرىلىس نىساندارىنىڭ ساپالى جانە ءقاۋىپسىز بولۋىن قاداعالاۋ.
باسقارما باسشىسى ايدوس يسمايلوۆتىڭ بايانداۋىنشا، سايرام اۋدانىندا جەكە كاسىپكەر ءوز جەر تەلىمىندەگى قۇرىلىس نىسانىن جوبالاۋ-سمەتالىق قۇجاتتاماسىنسىز، ساراپتامانىڭ قورىتىندىسىن الماي، ءوز بەتىنشە عيمارات سالعان.
قۇرىلىس جۇمىستارى اياقتالعانان كەيىن عانا ءتيىستى باسقارماعا حابارلاما جولداعان. سول سەكىلدى قازىعۇرت اۋدانىندا جەكە كاسىپكەر تاراپىنان سالىنعان وبەكتىنى قابىلداۋ جانە پايدالانۋعا بەرۋ ءتارتىبى بۇزىلعان. ودان بولەك، سارىاعاش اۋدانىندا زاڭ تالاپتارىن ساقتاماي، قۇرىلىسى اياقتالعان 17 نىساننىڭ بىردەن تىركەلگەنى انىقتالدى. اتالعان جايتتارعا قاتىستى ىستەر قۇزىرلى ورگاندارعا جانە سوتقا جولدانعان.
وبلىس بويىنشا بيۋدجەت جانە جەكە قاراجات ەسەبىنەن سالىنىپ جاتقان زاڭ تالاپتارىن بۇزا وتىرىپ، جۇمىس اتقارعان 36 نىساننىڭ كەمشىلىكتەرى انىقتالعان. ولارعا قاتىستى ءتيىستى شارا كورىلەدى. بۇگىندە وبلىس اۋماعىنداعى بيۋدجەت قاراجاتى جانە جەكە كاسىپكەرلىك ەسەبىنەن سالىنۋداعى قۇرىلىس نىساندارىنىڭ سانى مىڭنان اسادى. ونىڭ تەڭ جارتىسى بيۋدجەت قاراجاتى ەسەبىنەن سالىنۋدا.
– قۇرىلىس نىساندارىنا 177 تەحنيكالىق قاداعالاۋشى مەكەمە ينجينيرينگتىك قىزمەت كورسەتەدى. ولاردىڭ جۇزگە جۋىعى ايلىق ەسەپتى كەشىكتىرىپ جولداۋدا. بۇل ءوز كەزەگىندە، وبەكت قۇرىلىسىنىڭ ناقتى جاي-كۇيى جانە بارىسىن بىلۋگە كەدەرگى جاسايدى جانە تەحنيكالىق قاداعالاۋشى مەكەمەلەر تاراپىنان وزىنە جۇكتەلگەن مىندەتتەرگە نەمقۇرايلىقپەن قاراپ، تيىسىنشە ورىندالىپ جاتقان قۇرىلىس-مونتاج جۇمىستارىنا قاداعالاۋ جاساماي، ساۋلەت، قالا قۇرىلىسى جانە قۇرىلىس قىزمەتى سالاسىنداعى قازاقستان رەسپۋبليكاسىنىڭ زاڭناماسى مەن مەملەكەتتiك نورماتيۆتەردiڭ تالاپتارىن بۇزا وتىرىپ، جۇمىستاردىڭ ساپاسىز اتقارىلۋىنا اكەلەدى. بۇل جونىندە ولار ەسكەرتۋ الدى. پايدالانۋعا بەرىلگەن نىسنادارعا قاتىستى دا ارىز-شاعىم كوپ. باسقارمامەن وبلىس اۋماعىندا 8 تۇرعىن ءۇي، 2 مەكتەپ جانە 1 ينفراقۇرىلىم جەلىلەرىنە قاتىستى شارا كورىلدى، – دەدى باسقارما باسشىسى.
تۇركىستان وبلىسىنىڭ اكىمى دارحان ساتىبالدى الەۋمەتتىك ماڭىزى بار نىسانداردىڭ قۇرىلىس بارىسى قاتاڭ قاداعالاۋدا بولاتىنىن ەسكەرتتى. زاڭبۇزۋشىلىققا بارعان كومپانيالار ليسەنزياسىن ايرىلادى.
– قۇرىلىستى موينىنا العان كومپانيالاردىڭ قاراجاتى تەك سول جوسپارلانعان قۇرىلىسقا عانا جۇمسالۋى ءتيىس. ءار مەردىگەردىڭ بۇل باعىتتاعى جۇمىسى قاتاڭ قاداعالانۋى كەرەك. ول ءۇشىن ەكىنشى دەڭگەيدەگى بانكتەرمەن جۇمىس جۇرگىزۋ قاجەت. مەملەكەتتىك تاپسىرىستى الىپ، الدىمەن اقشانى جەكە باستارىنا جۇمسايتىنداردىڭ ارەكەتىنەن حالىق جاپا شەگەدى. قۇرىلىستى قاداعالاۋعا جاۋاپتى مەكەمەلەر جۇمىستارىن ادال ءارى ءادىل اتقارسىن. ءاربىر نىساننىڭ ارتىندا ەل ءۇمىتى، مەملەكەت بيۋدجەتى تۇر. عيماراتتار جوبالىق-سمەتالىق قۇجاتقا ساي بولىپ، جۇمىستار قاتاڭ قاداعالانسىن. ەگەر قادعالاۋشى مەكەمەلەر مەن قۇرىلىسقا جاۋاپتى باسشىلاردىڭ ءوزى بۇعان جول بەرسە، زاڭ اياسىندا جاۋاپكەرشىلىككە تارتىلۋى ءتيىس، – دەدى دارحان ساتىبالدى.
بيىلعى 8 ايدا تەكسەرۋ قورىتىندىسىمەن قۇرىلىس بارىسىندا زاڭ بۇزعاندارعا 70 ملن. تەڭگە كولەمىندە ايىپپۇل سالىندى. 2023 جىلدىڭ تامىز ايىنىڭ وزىندە 9 580 375 تەڭگە ايىپپۇل سالىنعان. زاڭ تالاپتارىن سالىنعان نىساندار بويىنشا شاردارا، بايدىبەك، وتىرار، كەلەس، سوزاق، جەتىساي اۋداندارى جانە ارىس قالاسى اكىمدىكتەرىندە جۇمىس جۇرگىزۋ كورسەتكىشى تومەن.
جالپى، وڭىردە قۇرىلىس نىساندارىندا انىقتالعان اقاۋلار مەن كەمشىلىكتەر بويىنشا زاڭ اياسىندا ءتيىستى شارالار قابىلدانىپ، مەردىگەرلەر ەسەبىنەن رەتكە كەلتىرىلۋدە.
