Túrkistan oblysy aýmaǵynda oblys ákimi Darhan Satybaldynyń tapsyrmasymen qurylys nysandaryna baqylaý men qadaǵalaý kúsheitildi. Oblys aýmaǵyndaǵy zańsyz, negizgi qujattarsyz jáne sapasyz qurylystardyń aldyn alý, boldyrmaý maqsatynda keshendi monitoring júrgizilýde. Onyń barysy jaily oblys ákimi Darhan Satybaldynyń tóraǵalyǵymen ótken aptalyq apparat otyrysynda baiandaldy.
Túrkistan oblysynyń baqylaý jónindegi basqarmasynyń memlekettik sáýlet-qurylys baqylaýy salasyndaǵy basty mindetteriniń biri – qurylys nysandarynyń sapaly jáne qaýipsiz bolýyn qadaǵalaý.
Basqarma basshysy Aidos Ismailovtyń baiandaýynsha, Sairam aýdanynda jeke kásipker óz jer telimindegi qurylys nysanyn jobalaý-smetalyq qujattamasynsyz, saraptamanyń qorytyndysyn almai, óz betinshe ǵimarat salǵan.
Qurylys jumystary aiaqtalǵanan keiin ǵana tiisti basqarmaǵa habarlama joldaǵan. Sol sekildi Qazyǵurt aýdanynda jeke kásipker tarapynan salynǵan obektini qabyldaý jáne paidalanýǵa berý tártibi buzylǵan. Odan bólek, Saryaǵash aýdanynda zań talaptaryn saqtamai, qurylysy aiaqtalǵan 17 nysannyń birden tirkelgeni anyqtaldy. Atalǵan jaittarǵa qatysty ister quzyrly organdarǵa jáne sotqa joldanǵan.
Oblys boiynsha biýdjet jáne jeke qarajat esebinen salynyp jatqan zań talaptaryn buza otyryp, jumys atqarǵan 36 nysannyń kemshilikteri anyqtalǵan. Olarǵa qatysty tiisti shara kóriledi. Búginde oblys aýmaǵyndaǵy biýdjet qarajaty jáne jeke kásipkerlik esebinen salynýdaǵy qurylys nysandarynyń sany myńnan asady. Onyń teń jartysy biýdjet qarajaty esebinen salynýda.
– Qurylys nysandaryna 177 tehnikalyq qadaǵalaýshy mekeme injiniringtik qyzmet kórsetedi. Olardyń júzge jýyǵy ailyq esepti keshiktirip joldaýda. Bul óz kezeginde, obekt qurylysynyń naqty jai-kúii jáne barysyn bilýge kedergi jasaidy jáne tehnikalyq qadaǵalaýshy mekemeler tarapynan ózine júktelgen mindetterge nemqurailyqpen qarap, tiisinshe oryndalyp jatqan qurylys-montaj jumystaryna qadaǵalaý jasamai, sáýlet, qala qurylysy jáne qurylys qyzmeti salasyndaǵy Qazaqstan Respýblikasynyń zańnamasy men memlekettik normativterdiń talaptaryn buza otyryp, jumystardyń sapasyz atqarylýyna ákeledi. Bul jóninde olar eskertý aldy. Paidalanýǵa berilgen nysnadarǵa qatysty da aryz-shaǵym kóp. Basqarmamen oblys aýmaǵynda 8 turǵyn úi, 2 mektep jáne 1 infraqurylym jelilerine qatysty shara kórildi, – dedi basqarma basshysy.
Túrkistan oblysynyń ákimi Darhan Satybaldy áleýmettik mańyzy bar nysandardyń qurylys barysy qatań qadaǵalaýda bolatynyn eskertti. Zańbuzýshylyqqa barǵan kompaniialar litsenziiasyn airylady.
– Qurylysty moinyna alǵan kompaniialardyń qarajaty tek sol josparlanǵan qurylysqa ǵana jumsalýy tiis. Ár merdigerdiń bul baǵyttaǵy jumysy qatań qadaǵalanýy kerek. Ol úshin ekinshi deńgeidegi banktermen jumys júrgizý qajet. Memlekettik tapsyrysty alyp, aldymen aqshany jeke bastaryna jumsaityndardyń áreketinen halyq japa shegedi. Qurylysty qadaǵalaýǵa jaýapty mekemeler jumystaryn adal ári ádil atqarsyn. Árbir nysannyń artynda el úmiti, memleket biýdjeti tur. Ǵimarattar jobalyq-smetalyq qujatqa sai bolyp, jumystar qatań qadaǵalansyn. Eger qadǵalaýshy mekemeler men qurylysqa jaýapty basshylardyń ózi buǵan jol berse, zań aiasynda jaýapkershilikke tartylýy tiis, – dedi Darhan Satybaldy.
Biylǵy 8 aida tekserý qorytyndysymen qurylys barysynda zań buzǵandarǵa 70 mln. teńge kóleminde aiyppul salyndy. 2023 jyldyń tamyz aiynyń ózinde 9 580 375 teńge aiyppul salynǵan. Zań talaptaryn salynǵan nysandar boiynsha Shardara, Báidibek, Otyrar, Keles, Sozaq, Jetisai aýdandary jáne Arys qalasy ákimdikterinde jumys júrgizý kórsetkishi tómen.
Jalpy, óńirde qurylys nysandarynda anyqtalǵan aqaýlar men kemshilikter boiynsha zań aiasynda tiisti sharalar qabyldanyp, merdigerler esebinen retke keltirilýde.
