«مەن ءۇشىن جاقسى ءمۇعالىم  بارىنەن دە ارتىق، ويتكەنى ءمۇعالىم مەكتەپتىڭ جۇرەگى» دەپ ۇلى ۇستاز ىبىراي التىنسارين ايتقانداي، قانداي زاماندا بولماسىن  ۇستاز ەڭبەگىنىڭ ورنى ەرەكشە. ويتكەنى بولاشاق ۇرپاقتىڭ ءبىلىمى ساپالى، ويى ۇشقىر بولماسا ول مەملەكەتتىڭ دە ەرتەڭى بۇلىڭعىر. ولاي دەيتىنىمىز، ەل قورعايتىن باتىر دا، ەل باستايتىن باسشى دا وسى ۇستاز دەگەن اياۋلى تۇلعانىڭ الدىنان قاناتتانادى. ياعني مەملەكەت دامۋىنا قاجەتتى ءتۇرلى سالا ماماندارى كەرەك دەسەك، ولاردى دا وسى سالاعا بەيىمدەيتىن التىن ۇيا مەكتەبى مەن ءتالىم ۇيرەتەر ۇستازى ەكەنى اقيقات.

سوندىقتان دانا حالقىمىزدا «ۇستازى جاقسىنىڭ ۇستانىمى جاقسى» دەگەن ءسوزى ءجايدان-جاي ايتىلماعانى بەلگىلى. سونداي-اق «بىلەكتى ءبىردى جىعار، ءبىلىمدى مىڭدى جىعار» دەپ، ءوقۋ-بىلىم ۇيرەنگەن جاستىڭ ءقادىرى قانشالىقتى جوعارى بولاتىنىن ىقىلىم زاماننىڭ وزىندە-اق باعاسىن بەرسە، قازاق دالاسىنا تۇڭعىش مەكتەپ اشىپ، ءوقۋ-بىلىمنىڭ ءنارىن سەپكەن  ى.التىنسارين: «ونەر ءبىلىم بار جۇرتتار، تاستان ساراي سالعىزعان، ايشىلىق الىس جەرلەردەن كوزىڭدى اشىپ-جۇمعانشا جىلدام حابار العىزعان»، – دەپ ونەر-بىلىمگە قۇشتار  ەلدىڭ قاشاندا  كۇنى جارىق بولاتىنىن  كەشەگى ءحىح عاسىردا  ايشىقتاپ بەرگەن ەدى. سول كەزەڭنەن بۇگىنگە دەيىن تالاي ۋاقىت ءوتىپ، كۇللى الەم بۇگىندە ءتورتىنشى ونەركاسىپتىك  ريەۆوليۋسيانىڭ ەسىگىن ايقارا اشتى. ارينە، بۇل جاھاندىق تولقىننىڭ شاڭىندا قالىپ كەتپەۋ ءۇشىن ءبىزدىڭ دە جاستارىمىز وزىق تاجىريبە مەن ءبىلىمدى ەركىن مەڭگەرگەن ساپالى  مامان بولۋى شارت. ويتكەنى قازىرگىدەي  وتە جىلدام قارقىنمەن وزگەرىپ وتىرعان مىنا زاماندا  زاماناۋي ءبىلىم مەن تەحنولوگيانى ەركىن مەڭگەرمەگەن  ەل بۇل تولقىننىڭ اعىسىنا ىلەسپەي شەتكە شىعىپ قالارى ءسوزسىز.

قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆ: «ۇلتتىق قۇندىلىققا قانىعىپ وسكەن ورەننىڭ تانىمى تەرەڭ، ءدىنى بەرىك بولادى. اتا-بابالار امانات ەتكەن ۇلان-عايىر دالانى امان ساقتاۋ، ەڭ الدىمەن، جاس بۋىنعا ارتىلعان زور ءۇمىت. كەيىنگى ۇرپاق تاۋەلسىزدىگىمىزدىڭ تۋىن ءارقاشان بيىك ۇستاۋى ءتيىس... سوندىقتان ءبىلىمى تەرەڭ، ويى وزىق ۇرپاقتى تاربيەلەيتىن  مۇعالىمدەر  قاۋىمىنا زور جاۋاپكەرشىلىك جۇكتەلەدى»، – دەپ بۇل ماسەلەدە ۇستازدار  قاۋىمىنا دا ارتىلار مىندەتتىڭ وڭاي بولمايتىنىن انىقتاپ بەردى. بۇل دەگەن ءسوز ەڭ الدىمەن سول پەداگوگ-كادرلارىن دايارلايتىن جوعارى وقۋ ورىندارىنىڭ دا جاۋاپكەرشىلىگىن انىقتاپ تۇرعانى بەلگىلى.

90 جىلدان استام ۋاقىتتان بەرى قازاق دالاسىنا ءبىلىم ءنارىن سەبەتىن پەداگوگ-كادرلارىن دايارلاپ كەلە جاتقان قازاق ءبىلىمىنىڭ قارا شاڭىراعى – اباي اتىنداعى قازاق ۇلتتىق پەداگوگيكالىق ۋنيۆەرسيتەتى دە بۇل مىندەتكە اسا ۇلكەن ءمان بەرىپ، زور جاۋاپكەرشىلىكپەن ورىنداپ كەلە جاتىر. زامان اعىسىنان قالماي، قاشان دا  ەلىمىزدەگى پەداگوگيكالىق جوعارى وقۋ ورىندارىنىڭ كوش باسىندا كەلە جاتقان  ءبىزدىڭ ۋنيۆەرسيتەتىمىز بۇگىندە ءوز شاڭىراعىنان قانات قاعار تۇلەكتەرىنىڭ بىلىمىنە اسا  جوعارى ءمان بەرەدى. ولاي دەيتىنىمىز، 2019 جىلى قازاقستان رەسپۋبليكاسىنىڭ ءبىلىم جانە عىلىم مينيسترلىگى قولعا العان «دۋالدى وقىتۋ» باعدارلاماسىن ەڭ العاشقىلاردىڭ ءبىرى بولىپ ءبىزدىڭ ۋنيۆەرسيتەتىمىز جۇزەگە اسىرا ءبىلدى. بۇل وسى ۋاقىتقا دەيىن ستۋدەنت تەك تەوريالىق ءبىلىمدى عانا مەڭگەرىپ كەلسە، دۋالدى وقىتۋ باعدارلاماسى ارقىلى  ولار تەوريالىق ءبىلىمىن مەكتەپتە پراكتيكا جۇزىندە ىسكە اسىرۋعا مۇمكىندىك الدى.  ياعني ستۋدەنت وقۋ ورنىن بىتىرمەي تۇرىپ، بازالىق ءبىلىمىن بۇگىنگى مەكتەپكە ەنىپ جاتقان جاڭارتىلعان مازمۇنداعى  ءبىلىم باعدارلامالارىمەن ۇشتاستىرىپ، جان-جاقتى تاجىريبەمەن قارۋلانعان ساپالى  مامان بولۋعا قول جەتكىزەدى دەگەن ءسوز.

وسى ورايدا مەنىڭ تاعى دا ءبىر توقتالا كەتەتىن ماسەلەم ءبىزدىڭ ۋنيۆەرسيتەت ساپالى پەداگوگ دايارلاۋ ءۇشىن مىنا ءۇش قاعيدانى باسشىلىققا الادى. ول، بىرىنشىدەن، مۇعالىمدەردىڭ بىلىكتىلىگىن ۇزبەي جەتىلدىرىپ وتىرۋ، ەكىنشىدەن، ستۋدەنتتەردىڭ پراكتيكالىق ءبىلىمىن كوتەرۋ، ۇشىنشىدەن، جاڭارتىلعان ءبىلىم مازمۇنى بويىنشا كادر دايارلاۋ. بيىلعى وقۋ  جىلى ءبىزدىڭ ۋنيۆەرسيتەتىمىز رەكتور تاكير بالىقبايەۆتىڭ باستاماسىمەن  ۇزدىكسىز پەداگوگيكالىق پراكتيكانىڭ (دۋالدى وقىتۋدىڭ) جاڭا ءادىسىن ىسكە اسىرا باستادى. ماسەلەن، 2019/2020 وقۋ جىلىندا  ءبىزدىڭ  ءبىتىرۋشى كۋرس ستۋدەنتتەرى اپتاسىنا ءتورت كۇن مەكتەپتە وندىرىستىك پراكتيكادا قالعان 2 كۇندى ۋنيۆەرسيتەتتە تەوريالىق ءبىلىم الۋعا ارنادى. ال بيىل ءبىز ونى ت.بالىقبايەۆتىڭ تاپسىرماسى بويىنشا جاڭاشا ۇيىمداستىردىق. بيىلعى باستاما بويىنشا 4 كۋرس ستۋدەنتتەرى ەكى اپتا ۋنيۆەرسيتەتتە وقيدى دا، باسقا ۋاقىتتارىندا مەكتەپپەن تىعىز بايلانىستا بولىپ، ونلاين جۇيەسى بويىنشا ءبىلىم الادى. ءۇشىنشى كۋرستىقتار دا جىل بويى اپتاسىنا 3 كۇن مەكتەپتە بايقاۋ پراكتيكاسىندا بولىپ، قالعان ءۇش كۇندە ساباق وقيدى. ءبىزدىڭ 3 كۋرس ستۋدەنتتەرىنىڭ بايقاۋ پراكتيكاسىندا بولۋىنىڭ ءبىرىنشى سەبەبى ولار ەڭ الدىمەن، مەكتەپ باعدارلاماسى مەن مۇعالىمدەرىنىڭ ساباق بەرۋ ادىستەرىن تىڭداۋشى رەتىندە قاتىسا وتىرىپ ەركىن مەڭگەرۋى ءتيىس. ستۋدەنت ءبىر جىل بۇرىن وسى ادىستەر ارقىلى ساباق بەرۋ ءتاسىلىن مەڭگەرەتىن بولسا كەلەسى بىتىرەتىن جىلى وندىرىستىك پراكتيكا وعان ەشقانداي قيىندىق تۋدىرمايتىن بولادى. پراكتيكانىڭ كولەمىن كوبەيتىپ، وقۋ مەن ءوندىرىستى تىعىز ۇشتاستىرۋ بۇل بولاشاق مامانداردى  ناعىز ءمۇعالىم كادرلارى ەتىپ دايىن مامان رەتىندە مەملەكەت قاجەتتىلىگىن قامتاماسىز ەتۋ دەگەن ءسوز.

بولاشاق مۇعالىمدەرىمىزدىڭ زامان تالابىنا ساي جان-جاقتى، ءوز ىسىنە بەيىم، ساپالى مامان بولىپ شىعۋى ءۇشىن بىلتىرعى وقۋ جىلىنىڭ وزىندە 95 ءبىلىم بەرۋ مەكەمەلەرىمەن كەلىسىم شارت جاسالدى.  سونىمەن قاتار ءى-ىى توقسان قورىتىندىسى بويىنشا ءبىلىم الۋشىلار تاراپىنان 603 – اشىق ساباق پەن 158 – ءىس – شارا ۇيىمداستىرىلسا، ءىىى توقسان قورىتىندىسى بويىنشا 593 – اشىق ساباق جانە 259 – ءىس – شارا وتكىزىلدى. پراكتيكا جۇمىسىن جانداندىرۋ ءۇشىن ءبىز ورتا ءبىلىم بەرۋ ۇيىمدارىندا 10-15 جىل سىنىپ جەتەكشى بولعان ۇستازداردان جانە جوو –نىڭ بىلىكتى ماماندارىنان  جۇمىس توبىن قۇردىق. قۇرىلعان جۇمىس توبى كەلەشەك پراكتيكانت-ستۋدەنتتەر ءۇشىن سىنىپ جەتەكشى بولۋعا دايارلايتىن  ەلەكتيۆتى كۋرس باعدارلاماسىن جاساۋعا اتسالىسۋدا. وسىنداي ناتيجەلى جۇمىس ارقىلى وتكەن وقۋ جىلىندا 4864 ءبىلىم الۋشىمىز پەداگوگيكالىق پراكتيكانى ويداعىداي اياقتاپ شىقتى. ءسويتىپ پەداگوگيكالىق  بەيىندەگى ءبىتىرۋشى كۋرستاردىڭ 108 ستۋدەنتى وزدەرى پراكتيكاعا بارعان مەكتەپتەردە جۇمىستا قالىپ قويدى. ۋنيۆەرسيتەتىمىزدەگى  «مانساپ» ورتالعىنا بيىلدىڭ وزىندە 4 مىڭعا جۋىق بولاشاق مۇعالىمگە تاپسىرىس تۇسسە، مۇنىڭ ءوزى ءبىزدىڭ تۇلەكتەرىمىزدىڭ ساپاسى ارتا تۇسكەنىن كورسەتىپ وتىر.

جاڭا 2020/2021 وقۋ جىلىندا ءبىز  «مانساپ» ورتالعىمەن ستۋدەنتتەردىڭ پەداگوگيكالىق پراكتيكاسىن جاڭاشا ۇيىمداستىردىق. جىلداعى ءداستۇر بويىنشا ءبىزدىڭ پروفەسسور-وقىتۋشىلارىمىز ستۋدەنتتەر پراكتيكاسىن وتكىزۋ ءۇشىن الماتى قالاسىنداعى مەكتەپتەرمەن تەك وزدەرى بايلانىس ورناتىپ، سول ارقىلى ستۋدەنتتەر پراكتيكاسى وتكىزىلىپ كەلسە، بيىلعى وقۋ جىلىندا ءبىز بۇل جۇمىستى ءوزىمىز قولعا الدىق. وسىنىڭ ناتيجەسىندە ستۋدەنتتتەر پراكتيكاسىن وتكىزۋ ءۇشىن ءبىلىم بەرۋ ۇيىمدارىمەن 387 كەلىسىم-شارتقا جانە 101 مەموراندۋمعا قول قويىلدى. بۇل جۇمىستار ءبىزدىڭ ۋنيۆەرسيتەتىمىزدىڭ رەكتورى تاكير وسپان ۇلى مەن الماتى قالالىق ءبىلىم باسقارماسىنىڭ باسشىسى جانە مەكتەپ ديرەكتورلارىنىڭ قاتىسۋىمەن جۇزەگە اسىرىلدى. مۇنداعى توقتالا كەتەتىن تاعى دا ءبىر ماسەلە، وزدەرىڭىزگە بەلگىلى بيىلعى وقۋ جىلىن ءبىز ونلاين فورماتىندا ۇيىمداستىرۋىمىزدا. بىلتىرعى جىلدىڭ اياعىندا الەمدە ءورىس العىن COVID-19 پاندەمياسى بيىلعى ءبىتىرۋشى كۋرس ستۋدەنتتەرىنە كوپتەگەن قيىندىقتارۋ تۋعىزباۋ ءۇشىن  رەكتوردىڭ باستاماسىمەن ءوزىمىز قولعا العان بولاتىنبىز. ويتكەنى جىلداعى داستۇرمەن مەكتەپتە وقۋشىلارمەن ەتەنە ارالاسىپ، پەداگوگيكالىق پراكتيكادان وتەتىن ستۋدەنتتەر ەندىگى جەردە ولارمەن تەك ەكران ارقىلى عانا ونلاين  جۇمىس جۇرگىزۋى، ارينە، بۇل جۇمىستى كۇردەلەندىرە تۇسەتىنى اقيقات. ءبىراق ءبىز اتالعان جۇمىستى جاڭا وقۋ جىلى باستالماي تۇرىپ، مۇعالىمدەردىڭ ءداستۇرلى تامىز كونفەرەنسياسىنا دەيىن تولىق ىسكە اسىرىپ قويدىق. مۇنداعى ماقسات قىركۇيەك ايىندا ءبىزدىڭ ءبىلىم الۋشىلارىمىز كەلگەندە پەداگوگيكالىق پراكتيكا جۇمىسىن راسىمدەۋگە ۋاقىت جوعالتپاي بىردەن وزدەرى بولىنگەن مەكتەپتە تاجىريبە جۇمىستارىن جالعاستىرىپ كەتۋگە جاسالىپ وتىرعان مۇمكىندىك ەدى.

ۋنيۆەرسيتەتتەگى پەداگوگيكالىق ءبىلىم بەرەتىن 6 ينستيتۋت بويىنشا ءبىتىرۋشى كۋرستار مەن 3 كۋرس ستۋدەنتتەرىن «مانساپ» ورتالىعى الماتى قالاسىنىڭ مەكتەپتەرىنە ءبولىپ، ولاردىڭ تىزىمدەرىن اتالعان مەكتەپ باسشىلىعىنا جولدادى. وسى جۇيەلى ۇيىمداستىرىلعان جۇمىستىڭ ناتيجەسىندە بيىلعى وقۋ جىلىندا ستۋدەنتتەردىڭ پەد.پراكتيكاسى ايتارلىقتاي قيىندىقتار تۋعىزا قويمادى.

سونداي-اق بيىلعى ستۋدەنتتەردىڭ پەداگوگيكالىق پراكتيكاسىن «مانساپ» ورتالىعىمەن بىرگە ستۋدەنتتەردىڭ پراكتيكاسىنا ارنالعان كۇندەلىكتى «ۇلاعات» باسپاسىنان شىعارتىپ، ونى ءار ستۋدەنتتىڭ مەكەن-جايى بويىنشا ءوز ايماقتارىنا جەتكىزىپ بەردىك. سونىمەن قاتار ينستيتۋتتاعى پەداگوگيكالىق پراكتيكاعا جاۋاپتى ماماندارمەن بايلانىس ورناتىپ،  پراكتيكانىڭ ۇيىمداستىرىلۋىن جانە مەكتەپ باسشىلارىنان ءبىزدىڭ ستۋدەنتتەردىڭ پراكتيكا بارىسىندا ساباقتى جۇرگىزۋى قانشالىقتى دەڭگەيدە ەكەنى سۇراستىرىلىپ، ءجىتى قاداعالانادى. 2021 جىلدىڭ اقپان ايىندا ءبىز پەداگوگيكالىق پراكتيكاعا بايلانىستى ءار ينستيتۋتپەن ءماجىلىس وتكىزدىك. جينالىستا ءار ينستيتۋتتاعى كافەدرا بويىنشا مەكتەپتەرگە بولىنگەن بىتىرەتىن ستۋدەنتتەردىڭ اتقارعان جۇمىستارىنا جەكە-جەكە توقتالدىق. سونىمەن قاتار ينستيتۋت باسشىلارىنا اقپان-ناۋرىز ايلارىندا ءبىتىرۋشى ستۋدەنتتەردىڭ اشىق ساباق وتكىزۋى كەرەكتىگىن تاپسىرىپ، ونىڭ ناتيجەسى كافەدرا مەن ينستيتۋت ماجىلىسىندە تالقىلانۋ كەرەكتىگى مىندەتتەلدى. بۇل دا ستۋدەنتتەرىمىزدىڭ جوعارىپ ساپاداعى مامان بولۋىنا  جاسالىپ وتىرعان قادامنىڭ ءبىرى.

ءبىزدىڭ «مانساپ» ورتالىعى بيىلعى وقۋ جىلىندا تاعى دا ءبىر تىڭ باستامانى جۇزەگە اسىرىپ وتىر. ول ستۋدەنتتەرىمىزدىڭ جۇمىسقا ورنالاسۋىنا كوپتەپ سەپتىگىن تيگىزەتىنى ءسوزسىز. 2019 جىلدىڭ 12 ساۋىرىندە ءبىز ستۋدەنتتەرگە ارنالعان «Mansap» موبيلدىك قوسىمشاسىن ىسكە قوسقان ەدىك. ونداعى ماقسات قوسىمشادا ءبىلىم الۋشىلار وزدەرىنىڭ تۇيىندەمەلەرىن تولتىرىپ ورنالاستىرادى جانە بوس جۇمىس ورىندارى تۋرالى اقپاراتتى كورە الادى. ال جۇمىس بەرۋشىلەر قوسىمشاعا تىركەلىپ، وزدەرىنە قاجەتتى بوس ورىندى جاريالايدى. جاريالاعان بوس ورىندارىنا سايكەس تۇلەكتەرىمىزدىڭ تۇيىندەمەلەرىمەن تانىسا الادى. ەگەر ەكى تاراپتىڭ تالابى مەن تىلەگى سايكەس كەلسە وندا تىكەلەي بايلانىس ورناتۋ مۇمكىندىگى تۋىندايدى دەگەن ءسوز.

ال بيىل دا وسى جۇمىستى ودان ءارى جانداندىرىپ، ستۋدەنتتەردىڭ سەنىمىن نىعايتۋ ماقساتىندا  «Bagdar» پلاتفورماسىن قولعا الدىق. بۇل پلاتفورما دا ستۋدەنتتەردى بوس جۇمىس ورىندارى نەگىزىندە جۇمىسقا بولۋگە ارنالعان. پلاتفورمانىڭ نەگىزگى قىزمەتى:

• پلاتفورما ونلاين رەجيمدە جۇمىس ىستەيدى.


• پلاتفورمادا ۋنيۆەرسيتەتكە كەلگەن بارلىق بوس جۇمىس ورىندارى كەستە تۇرىندە ورنالاسادى.


• پلاتفورمادان ستۋدەنت وزىنە كەرەكتى ايماقتى، ماماندىقتى جىلدام ىزدەپ تابا الادى.


• پلاتفورمادا بەرىلگەن بوس ورىندى تاڭداپ ستۋدەنت ءوزىنىڭ اتى ءجونىن ەنگىزەدى.


• پلاتفورماعا ەنگىزىلگەن ستۋدەنتتىڭ ءاتى-جونىن وزگە ستۋدەنت (ادام) وزگەرتە المايدى.


• پلاتفورماداعا اقپاراتتى «مانساپ» ورتالىعىنىڭ باسشىسى Excel فورماتىندا جۇكتەپ، سول بويىنشا جۇمىسقا جولداما بەرەدى.


• پلاتفورما android، ios، windows ،باعدارلامالارىنا سايكەستەندىرىلگەن.

 

«Bagdar» پلاتفورماسى ارقىلى ءبىز ايماقتار مەن وڭىرلەردەن بوس جۇمىس ورىندارى تۋرالى اقپاراتتار جيناقتاپ ونى وسى جەرگە ورنالاستىرامىز. سودان كەيىن ءبىزدىڭ تۇلەكەتەر بۇل پلاتفورما ارقىلى وزدەرىنە قاجەتتى جۇمىستاردى قاراستىرىپ، ءوزىنىڭ جەكە مالىمەتتەرىن ەنگىزەدى. مۇنىڭ ءبىر ەرەكشەلىگى مۇنداعى ءاربىر ستۋدەنت ەنگىزگەن جەكە مالىمەتتەردى ەشكىم وزگەرتە المايدى. وسى ارقىلى ۋنيۆەرسيتەت جۇمىسقا ءبولۋدىڭ ءادىل ءارى اشىق جولىن ۇسىنا الادى.

تاعى دا توقتالا كەتەتىن ماسەلە ءبىزدىڭ ۋنيۆەرسيتەتىمىز «QS World University Ranking by Subject-2021» رەيتينگىندە الەمنىڭ 201-250 ۇزدىك جوعارى وقۋ ورىندارىنىڭ توبىنا، تمد-دا «اعىلشىن ءتىلى مەن ادەبيەتى» ءپانى بويىنشا كوشباسشىلار ۇشتىگىنە جانە «ءبىلىم بەرۋ» ءپانى بويىنشا ۇزدىك تورتتىككە كىردى. جوعارىدا اتالعان رەيتينگتە ەلىمىزدىڭ جوعارى وقۋ ورىندارى اراسىندا ۇزدىك ناتيجەلەردى ءال-فارابي اتىنداعى قازۇۋ، ل.گۋميليەۆ اتىنداعى ەۇۋ، اباي اتىنداعى قازۇپۋ جانە Satbayev University كورسەتتى. بۇل دا ءبىزدىڭ ۋنيۆەرسيتتىڭ قاجىرلى ەڭبەگىنىڭ جەمىسى ەكەنى داۋسىز. وسى رەيتينگ ماسەلەسىمەن 2021 جىلدىڭ 12 ناۋرىزىندا ۋنيۆەرسيتەتتە رەسەي، شىعىس ەۋروپا جانە ورتالىق ازيا بويىنشا QS كومپانياسىنىڭ ايماقتىق ديرەكتورى سەرگەي حريستوليۋبوۆ پەن كەزدەسۋ ءوتتى. كەزدەسۋ بارىسىندا رەكتور تاكير بالىقبايەۆ ۋنيۆەرسيتەتتىڭ ستراتەگيالىق دامۋ باعىتتارى جانە ونىڭ ۇلتتىق جانە حالىقارالىق رەيتينگتەردەگى جەتىستىكتەرى تۋرالى، سوڭعى جىلدارى «التىن بەلگى» مەن كوللەدجدەردىڭ قىزىل ديپلوم يەگەرلەرى وقۋعا قابىلدانىپ، ءبىلىم الۋشىلاردىڭ ساپالىق كورسەتكىشتەرىنىڭ ءۇش ەسەگە ارتقاندىعى تۋرالى اتاپ ءوتتى. ۋنيۆەرسيتەت تۇلەكتەرىنىڭ جۇمىسقا ورنالاسۋ كورسەتكىشى 95-97%-دى قۇرايدى - قازۇپۋ ستۋدەنتتەرى وقۋدان كەيىن بىردەن ءوز ماماندىعى بويىنشا لايىقتى جۇمىسقا ورنالاسۋدا. سونداي-اق، ۋنيۆەرسيتەتتىڭ 2025 جىلعا دەيىنگى ستراتەگيالىق جوسپارلارىنا قول جەتكىزۋ ءۇشىن ونىڭ بارلىق قىزمەت باعىتتارىنىڭ تابىستى دامۋى ءسوز بولدى بۇل جيىندا. جالپى، بۇل ەڭبەكتىڭ ءبارى سايىپ كەلگەندە ستۋدەنتتەردىڭ باسەكەگە قابىلەتتىلىگىن ارتتىرۋ جولىندا جاسالىپ وتىرعان دۇنيەلەر.

«اقىرىن ءجۇرىپ، انىق باس، ەڭبەگىڭ كەتپەس دالاعا، ۇستازدىق ەتكەن جالىقپاس، ۇيرەتۋدەن بالاعا»، – دەپ حاكىم اباي ايتقانداي قارا شاڭىراق ءبىلىم ورداسى زامان كوشىنەن قالماي ءوزىنىڭ تىڭ باستامالارى ارقىلى ءوز تۇلەكتەرىن ەرتەڭگى ەلدىڭ پەداگوگ-ماماندارىنا اينالۋىنا قاجەتتى جۇمىستاردىڭ ءبارىن جاساپ كەلەدى.  ال ءبىزدىڭ تۇلەكتەرىمىز ءوز بىلىمىمەن بولاشاق بۇلدىرشىندەردى سارا جولعا باستاي السا، بۇل توككەن تەردىڭ دالاعا كەتپەگەنى دەپ بىلەمىن.

حايروللا جانىبەكوۆ، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ اكادەميالىق ماسەلەلەر جونىندەگى دەپارتامەنت ديرەكتورى، جەر عىلىمدارىنىڭ دوكتورى، پروفەسسور.