ءماجىلىس دەپۋتاتى ۇلاسبەك سادىبەكوۆ قازاقستاندىقتاردى ءۇي جانۋارلارىن مىندەتتى تۇردە زارارسىزداندىرۋعا مىندەتتەۋدى ۇسىندى دەپ حابارلايدى Dalanews.kz.
ءماجىلىس دەپۋتاتى ۆيسە-پرەمەر رومان سكلياردىڭ اتىنا دەپۋتاتتىق ساۋال جولداپ، ءۇي جانۋارلارىن رەتتەۋ ساياساتىن جانە تەتىكتەرىن جەتىلدىرۋ ماسەلەسىن كوتەردى. دەپۋتاتتىڭ ايتۋىنشا، جانۋارلارمەن دۇرىس جۇمىس ىستەمەۋ قوعام قاۋىپسىزدىگىنە، ادامداردىڭ دەنساۋلىعىنا، سانيتارلىق جانە ەكولوگيالىق جاعدايعا تىكەلەي ءقاۋىپ توندىرەدى.
«ازاماتتاردىڭ قاڭعىباس ءۇي جانۋارلارىنىڭ كوبەيۋىنە قاتىستى شاعىمدارى، الەۋمەتتىك جەلىلەردەگى رەزونانس تۋدىرعان جاعدايلار جانە جيىلەگەن قايعىلى وقيعالار وكىلەتتى ورگانداردىڭ جۇمىسىنىڭ جەتكىلىكسىز تيىمدىلىگىن كورسەتەدى. قاداعالاۋ، باقىلاۋ، الدىن الۋ جانە جاۋاپكەرشىلىك جۇيەسى ءالسىز بولىپ وتىر. بۇل ماسەلەنى ەندى تەك شارۋاشىلىق نەمەسە الەۋمەتتىك پروبلەما رەتىندە قاراستىرۋعا بولمايدى — ول قوعامدىق ءتارتىپ پەن ازاماتتاردىڭ كونستيتۋسيالىق قۇقىقتارى تۇرعىسىنان نازار اۋدارۋدى تالاپ ەتەدى»، — دەدى ۇلاسبەك سادىبەكوۆ ءماجىلىستىڭ پلەنارلىق وتىرىسىندا.
وسى ورايدا دەپۋتات مىنا ۇسىنىستاردى جاسادى:
ءۇي جانۋارلارىن مىندەتتى تىركەۋدى ەنگىزۋ، ولاردى بەلگىلەۋ جانە ءبىرتۇتاس رەسپۋبليكالىق سيفرلىق بازا جاساۋ؛
ۇرپاق قالدىرۋعا قابىلەتتى انالىق جانۋارلاردى ۇلعايىپ كەتۋدەن قورعاۋ ماقساتىندا ۇستاۋعا رۇقسات بەرۋ جۇيەسىن زاڭدىق تۇرعىدا بەكىتۋ، ال رۇقسات جوق جاعدايدا — يەسىنىڭ قاراجاتىنا مىندەتتى زارارسىزداندىرۋ جۇرگىزۋ.
وسى سالاعا ارنالعان 2025–2027 جىلدارعا كەشەندى ۇلتتىق جوسپار ازىرلەۋ.
«قوعامنىڭ وركەنيەتتى دەڭگەيى ونىڭ جانۋارلارعا قالاي قارايتىنىمەن انىقتالادى. ءبىراق گۋمانيزم جاۋاپكەرشىلىكپەن بىرگە ءجۇرۋى كەرەك. جاۋاپكەرشىلىكسىز مەيىرىمدىلىك ءقاۋىپتى. جانۋارلاردى قورعاپ ءجۇرىپ، ادامداردى قورعاي الماي قالاتىن جاعدايعا جول بەرۋگە بولمايدى»، — دەدى ءماجىلىس دەپۋتاتى.
