Májilis depýtaty Ulasbek Sádibekov qazaqstandyqtardy úi janýarlaryn mindetti túrde zararsyzdandyrýǵa mindetteýdi usyndy dep habarlaidy Dalanews.kz.
Májilis depýtaty vitse-premer Roman Skliardyń atyna depýtattyq saýal joldap, úi janýarlaryn retteý saiasatyn jáne tetikterin jetildirý máselesin kóterdi. Depýtattyń aitýynsha, janýarlarmen durys jumys istemeý qoǵam qaýipsizdigine, adamdardyń densaýlyǵyna, sanitarlyq jáne ekologiialyq jaǵdaiǵa tikelei qaýip tóndiredi.
«Azamattardyń qańǵybas úi janýarlarynyń kóbeiýine qatysty shaǵymdary, áleýmettik jelilerdegi rezonans týdyrǵan jaǵdailar jáne jiilegen qaiǵyly oqiǵalar ókiletti organdardyń jumysynyń jetkiliksiz tiimdiligin kórsetedi. Qadaǵalaý, baqylaý, aldyn alý jáne jaýapkershilik júiesi álsiz bolyp otyr. Bul máseleni endi tek sharýashylyq nemese áleýmettik problema retinde qarastyrýǵa bolmaidy — ol qoǵamdyq tártip pen azamattardyń konstitýtsiialyq quqyqtary turǵysynan nazar aýdarýdy talap etedi», — dedi Ulasbek Sádibekov Májilistiń plenarlyq otyrysynda.
Osy oraida depýtat myna usynystardy jasady:
Úi janýarlaryn mindetti tirkeýdi engizý, olardy belgileý jáne birtutas respýblikalyq tsifrlyq baza jasaý;
Urpaq qaldyrýǵa qabiletti analyq janýarlardy ulǵaiyp ketýden qorǵaý maqsatynda ustaýǵa ruqsat berý júiesin zańdyq turǵyda bekitý, al ruqsat joq jaǵdaida — iesiniń qarajatyna mindetti zararsyzdandyrý júrgizý.
Osy salaǵa arnalǵan 2025–2027 jyldarǵa keshendi ulttyq jospar ázirleý.
«Qoǵamnyń órkenietti deńgeii onyń janýarlarǵa qalai qaraitynymen anyqtalady. Biraq gýmanizm jaýapkershilikpen birge júrýi kerek. Jaýapkershiliksiz meiirimdilik qaýipti. Janýarlardy qorǵap júrip, adamdardy qorǵai almai qalatyn jaǵdaiǵa jol berýge bolmaidy», — dedi májilis depýtaty.
