ءماجىلىس ءقاۋىپسىز ەڭبەك جاعدايىن كۇشەيتۋ جانە جۇمىسشىلاردىڭ قۇقىعىن قورعاۋعا باعىتتالعان زاڭ جوباسىن ءبىرىنشى وقىلىمدا ماقۇلدادى، دەپ حابارلايدى Dalanews.kz.

ەڭبەك كودەكسىنە جانە "حالىق دەنساۋلىعى جانە دەنساۋلىق ساقتاۋ جۇيەسى تۋرالى" كودەكسكە وزگەرىستەر ەنگىزىلەدى.

باستى تۇزەتۋ - ەڭبەكتىڭ ايقىن بەلگىلەرى بولعان جاعدايدا ازاماتتىق-قۇقىقتىق سيپاتتاعى كەلىسىمشارتتى (گپح) قولدانۋعا تىيىم سالۋ. ءقازىر كوپتەگەن جۇمىسشى "گپح" ارقىلى راسىمدەلىپ، ەڭبەك دەمالىسى، اۋرۋحانا پاراعى جانە باسقا دا الەۋمەتتىك كەپىلدىكتەردەن ايىرىلىپ وتىر.

ەگەر جۇمىس بەرۋشى قىزمەتكەردى "گپح" ارقىلى راسىمدەپ، ءبىراق ونىڭ جۇمىسىندا ەڭبەك شارتىنىڭ بەلگىلەرى انىقتالسا، وندا ول قۇجاتتى ەڭبەك شارتىنا قايتا راسىمدەۋگە مىندەتتەلەدى.

ەڭبەك مينيسترلىگىنىڭ دەرەگىنشە، ەڭبەك شارتىنىڭ نەگىزگى ءۇش بەلگىسى بار:

1. قىزمەتكەردىڭ بىلىكتىلىك نەمەسە ماماندىق بويىنشا ناقتى فۋنكسيا ورىنداۋى؛

2. جۇمىستى باسشىلىقتىڭ تالاپتارىنا ساي، جەكە ورىنداۋى؛

3. ەڭبەكاقى الۋى.