رەسەيدەن اسا ءىرى كولەمدە الاياقتىق جاسادى دەگەن كۇدىكتى ەكستراديسيالاندى، - دەپ حابارلايدى Dalanews.kz.
قازاقستان ازاماتى اسا ءىرى كولەمدە الاياقتىق جاساعانى ءۇشىن قىلمىستىق جاۋاپتىلىققا تارتۋ ماقساتىندا رەسەي فەدەراسياسىنان ەكستراديسيالاندى.
كۇدىكتى 2019-2020 جىلدار ارالىعىندا كاسىپكەردى الداۋ جانە سەنىمىنە قيانات جاساۋ ارقىلى جالپى سوماسى 53 ميلليون تەڭگە مولشەردە ارنايى تەحنيكانى، سونداي-اق الاياققا تيەسىلى ەمەس كولىكتى 35 ميلليون تەڭگەگە ساتىپ، ءىرى كولەمىندەگى قاراجاتتى جىمقىرعان.
قىلمىس جاساعاننان كەيىن كۇدىكتى قاشىپ كەتكەن، سول سەبەپتى ول حالىقارالىق ىزدەۋگە جاريالانعان.
وسى جىلدىڭ شىلدە ايىندا ول سانكت-پەتەربۋرگ قالاسىندا ۇستالدى.
قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا ول ەلگە ەكستراديسيالاندى.
قازىرگى ۋاقىتتا كۇدىكتى پەتروپاۆل قالالىق تەرگەۋ يزولياتورىنا قامالدى.
ايىپتالعان قىلمىس ءۇشىن مۇلكى تاركىلەنىپ، بەس جىلدان ون جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەن.
