2024 جىلدىڭ قىركۇيەگىندە روسسەلحوزنادزور قازاقستان اۋىل شارۋاشىلىعى مينيسترلىگىنە فيتوسانيتاريا جونىندەگى سەرتيفيكاتتاردى بەرۋدى ۋاقىتشا دوعارا تۇرۋدى سۇرادى. ويتكەنى، رەسەيلىك تاراپتىڭ ايتۋىنشا، كارانتيندىك نىساندارعا جاتاتىن ونىمدەر اشم سەرتيفيكاتىمەن توننالاپ شەكارا اسقان. ال جۋىردا رەسەي، ءتىپتى قازاقستاننىڭ اۋىلشارۋاشىلىعى مينيسترلىگىن "الاياقتىققا جول بەرىپ وتىر" دەپ ايىپتادى. بۇعان قاتىستى كۇنى كەشە قۇزىرلى ۆەدومستۆو ءوز جاۋابىن جاريا ەتتى، دەپ حابارلايدى Dalanews.kz.

ق ر اۋىلشارۋاشىلىعى مينيسترلىگى مەملەكەتتىك ينسپەكسيا كوميتەتى روسسەلحوزنادزوردىڭ ايىپتاۋلارىن نەگىزسىز دەپ سانايدى.

"...فيتوسانيتارلىق سەرتيفيكاتتاردى الۋ كەزىندە كارانتينگە جاتاتىن ونىمدەردى "جالعان" كومپانيالارعا راسىمدەيتىن الاياق قازاقستاندىق كومپانيالار ماسەلەسى بار. "جالعان" كومپانيالاردىڭ بولۋى تەك رەسەي ءۇشىن عانا ەمەس، قازاقستان ءۇشىن دە وزەكتى، ويتكەنى ءبىزدىڭ ەلىمىزگە ەاەو-عا مۇشە مەملەكەتتەردەن يمپورتتاۋشىلاردىڭ مەكەن-جايىنا ونىمدەر اكەلىنەدى، ولار وزدەرىنە يمپورت جۇرگىزىلىپ جاتقانىن بىلمەيدى. الايدا، بۇل ماسەلەنى قازاقستان رەسپۋبليكاسىنىڭ زاڭناماسى اياسىندا شەشۋ مۇمكىن ەمەس ەكەنىن ەسكەرۋ كەرەك، ونى ەەك دەڭگەيىندە شەشۋ قاجەت"، دەلىنگەن رەسمي جاۋاپتا.

ياعني، بۇل ارادا قازاقستان روسسەلحوزنودزور ايتىپ وتىرعان ماسەلە تەك وزىنە عانا ەمەس، بۇكىل ەاەو مۇشە مەملەكەتتەردە، سونىڭ ىشىندە رەسەيدىڭ وزىندە دە بارىن ايتادى. سوندىقان بۇل ماسەلەنى ءبىرجاقتى ايىپتاۋدان گورى ەەك دەڭگەيىندە نەگە شەشپەسكە دەگەندى كەلتىرىپ وتىر.

ەندى روسسەلحوزنادزوردىڭ ايىپتاۋىنا كەلەيىك، ولار نە دەيدى:

"روسسەلحوزنادزور ق ر اوك مەملەكەتتىك ينسپەكسيا كوميتەتىنىڭ رەسەيگە ەكسپورت جاساۋ ءۇشىن فيتوسانيتاريالىق سەرتيفيكاتتاردى رەسىمدەۋ كەزىندە سىرتقى ەكونوميكالىق قىزمەتتى جۇزەگە اسىرمايتىن 100-دەن استام فيرما رەكۆيزيتىن زاڭسىز پايدالانعانىن انىقتادى. بىرنەشە جىل بويى وسىنداي كولەڭكەلى جولمەن كوميتەت فيتوسانيتاريالىق تەكسەرۋدەن قاساقانا جالتارۋ ماقساتىندا ەاەو اۋماعىنا وسىمدىك شارۋاشىلىعى ونىمدەرىن باقىلاۋسىز وتكىزىپ كەلگەن. قازاقستاندىق تاراپتىڭ مۇنداي زاڭسىز ارەكەتتەرى سالىقتان جالتارۋعا جول بەرەدى، سول ارقىلى ەلدەر اراسىنداعى اۋىل شارۋاشىلىعى ونىمدەرىنىڭ ناقتى اينالىمىنا قاتىستى دەرەكتەردىڭ بۇرمالانۋىنا دا تۇرتكى.  ماسەلەن، جارامسىز فيتوسانيتاريالىق سەرتيفيكاتتاردى پايدالانعان ەكى جىل ىشىندە قازاقستاندىق تاراپ رەسەيگە 120 مىڭ توننادان استام وسىمدىك شارۋاشىلىعى ونىمدەرىن جەتكىزدى. مىنە، وسىعان ۇقساس ءبىزدىڭ مەكەمەگە كەلىپ تۇسكەن وتىنىشتەر جەتەرلىك..."

جالپى، بۇل ارادا ماسەلە يمپورتتالاتىن ونىمدە ەمەس، وتاندىق فيتوسانيتارلىق قىزمەت جۇمىسىنىڭ ساپاسىندا ەكەنىن باسا ايتا كەتەلىك. ال بۇل سالانىڭ كەنجەلەپ جاتقانى، سونىڭ ىشىندە جۇمىسشى قولى تاپشىلىعىنا ۇشىراپ وتىرعانى ەشكىمگە جاسىرىن ەمەس.

رەسەي استىق ەكسپورتى جانە باسقا سالالاردا دا ءبىزدىڭ باسەكەلەس ەكەنىن جادىمىزدان شىعارمالىق. سوندىقتان ءبىزدىڭ وسال تۇسىمىزدى نۇسقاۋ بۇل ارادا ولاردىڭ وڭ جامباسىنا كەلە كەتەرى ءسوزسىز. وسى جاعىنان العاندا، سالالىق ماسەلەلەرمەن بىزگە بەلسەندى تۇردە اينالىسۋ كەرەك. ەشكىم ەشتەڭە دەي المايتىنداي. مۇنى نارىقتاعى ورىندارعا تالاس دەپ اتايدى. راسىندا، سىزگە كەدەرگىلەردى جويىپ، ەشكىم نارىق كوزىن اشىپ بەرمەيدى، ءوزىڭىز جانتالاسپاساڭىز. بۇل - قالىپتى زاڭدىلىق. بۇل - وسى سالا شەنەۋنىكتەرىنىڭ بەتپە-بەت كەلىپ وتىرعان اشىق ماسەلەسى. سوندىقتان "اناۋ-مىناۋ" دەپ ءجون سىلتەۋدەن اۋلاق بولعان ءجون. ايتپەسە، ەرتەڭ ديقانشىلار مەن فەرمەرلەرىمىز "تاسىمال جولى جابىق" دەپ، تۇسكەن سۇرانىستاردىڭ وزىنەن ايىرىلىپ، بيىلعىداي پرەزيدەنتتەن كومەك سۇراپ جۇرمەسىن...