الماتىنىڭ رەنوۆاسيا جونىندەگى جاڭا باعدارلاماسىندا كۆارتالدىق قۇرىلىس قاراستىرىلعان. بۇل تۋرالى قالا اكىمى ەربولات دوسايەۆ الماتىداعى وكق بريفينگىندە سويلەگەن سوزىندە ايتتى.
«قالا اكىمدىگى 2024 جىلعى 29 قاراشادا ماسليحاتپەن بەكىتىلگەن 2030 جىلعا دەيىن تۇرعىن ءۇيدى رەنوۆاسيالاۋدىڭ جاڭا باعدارلاماسىن ازىرلەدى. رەنوۆاسيانىڭ جاڭا باعدارلاماسىنىڭ نەگىزگى قاعيداتى كۆارتالدىق دامۋ بولىپ تابىلادى. بۇل رەتتە، ەسكى تۇرعىن ءۇي يەلەرىنە «بولمە ءۇشىن بولمە» قاعيداتى بويىنشا ايىرباستاۋ نەمەسە نارىقتىق قۇنى بويىنشا اقشالاي وتەماقى الۋ مۇمكىندىگى بەرىلەدى»، - دەدى ەربولات دوسايەۆ.
قالا باسشىسى اتاپ وتكەندەي، بۇگىندە الماتىدا 14 430 پاتەرگە ارنالعان 1 366 ەسكى ءۇي بار، وندا 43 مىڭنان استام ادام تۇرادى. رەنوۆاسيا باعدارلاماسىندا ونىڭ 676-سى، ياعني 2030 جىلعا دەيىن توزىعى جەتكەن ۇيلەردىڭ جارتىسى مودەرنيزاسيالانادى. ونىڭ ايتۋىنشا، رەنوۆاسيا باعدارلاماسى سەيسميكالىق قاۋىپسىزدىكتى كۇشەيتۋدى ەسكەرە وتىرىپ، تۇرعىن ءۇي قورىن جاڭارتۋعا مۇمكىندىك بەرەدى.
باعدارلاماعا سايكەس عيماراتتاردى كوشىرۋ جانە بۇزۋ بارلىق مەنشىك يەلەرىنىڭ كەلىسىمىمەن عانا جۇزەگە اسىرىلاتىنىن اتاپ وتكەن ءجون. ەرەكشە قاجەتتىلىكتەرى بار ازاماتتار ءۇشىن ءبىرىنشى قاباتتارعا نەمەسە ليفتتەرمەن، پاندۋستارمەن جانە كەدەرگىسىز كىرۋمەن جابدىقتالعان ۇيلەرگە كوشۋ شارتتارى كوزدەلگەن. مەگاپوليس تۇرعىندارىنىڭ قاۋىپسىزدىگىن قامتاماسىز ەتەتىن تەكتونيكالىق اقاۋلاردا ورنالاسقان قاڭقالى - قامىستى ۇيلەر مەن عيماراتتاردى بۇزۋعا باسا نازار اۋدارىلادى.
باعدارلاما اياسىندا ساراپشىلار مەن قوعامدىق ۇيىمداردان باستاپ ۋاكىلەتتى مەملەكەتتىك ۆەدومستۆولارعا دەيىنگى بارلىق رەنوۆاسياعا قاتىسۋشىلاردىڭ ءوزارا ءىس – قيمىلىن ۇيلەستىرەتىن رەنوۆاسيا ءوفيسى (جوبالاۋ توبى) قۇرىلدى.
