Almatynyń renovasıa jónindegi jańa baǵdarlamasynda kvartaldyq qurylys qarastyrylǵan. Bul týraly qala ákimi Erbolat Dosaev Almatydaǵy OKQ brıfıńinde sóılegen sózinde aıtty.
«Qala ákimdigi 2024 jylǵy 29 qarashada máslıhatpen bekitilgen 2030 jylǵa deıin turǵyn úıdi renovasıalaýdyń jańa baǵdarlamasyn ázirledi. Renovasıanyń jańa baǵdarlamasynyń negizgi qaǵıdaty kvartaldyq damý bolyp tabylady. Bul rette, eski turǵyn úı ıelerine «bólme úshin bólme» qaǵıdaty boıynsha aıyrbastaý nemese naryqtyq quny boıynsha aqshalaı ótemaqy alý múmkindigi beriledi», - dedi Erbolat Dosaev.
Qala basshysy atap ótkendeı, búginde Almatyda 14 430 páterge arnalǵan 1 366 eski úı bar, onda 43 myńnan astam adam turady. Renovasıa baǵdarlamasynda onyń 676-sy, ıaǵnı 2030 jylǵa deıin tozyǵy jetken úılerdiń jartysy modernızasıalanady. Onyń aıtýynsha, renovasıa baǵdarlamasy seısmıkalyq qaýipsizdikti kúsheıtýdi eskere otyryp, turǵyn úı qoryn jańartýǵa múmkindik beredi.
Baǵdarlamaǵa sáıkes ǵımarattardy kóshirý jáne buzý barlyq menshik ıeleriniń kelisimimen ǵana júzege asyrylatynyn atap ótken jón. Erekshe qajettilikteri bar azamattar úshin birinshi qabattarǵa nemese lıfttermen, pandýstarmen jáne kedergisiz kirýmen jabdyqtalǵan úılerge kóshý sharttary kózdelgen. Megapolıs turǵyndarynyń qaýipsizdigin qamtamasyz etetin tektonıkalyq aqaýlarda ornalasqan qańqaly - qamysty úıler men ǵımarattardy buzýǵa basa nazar aýdarylady.
Baǵdarlama aıasynda sarapshylar men qoǵamdyq uıymdardan bastap ýákiletti memlekettik vedomstvolarǵa deıingi barlyq renovasıaǵa qatysýshylardyń ózara is – qımylyn úılestiretin Renovasıa ofısi (jobalaý toby) quryldy.
