ق ر كولىك ءمينيسترى تۇركىستان وبلىسىنىڭ تۇرعىندارىمەن كەزدەسۋ وتكىزىپ، ازاماتتاردى جەكە قابىلدادى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
جيىن بارىسىندا مارات قارابايەۆ وتكەن جىلى حالىقپەن كەزدەسۋدە كوتەرىلگەن ماسەلەلەردىڭ ورىندالۋ بارىسى تۋرالى اقپاراتپەن ءبولىستى. ماسەلەن، «تۇركىستان-سارىاعاش» باعىتىنداعى تەمىرجول قاتىناسى قالپىنا كەلتىرىلدى. جالپى ۇزىندىعى 64 شاقىرىمدى قۇرايتىن رەسپۋبليكالىق ماڭىزى بار «شاۋىلدىر-تۇركىستان» تاس جولىن قايتا جاڭعىرتۋ جۇمىستارى جالعاسۋدا، ونىڭ 32 شاقىرىمىندا جۇمىستار اياقتالعان. سونداي-اق، تۇركىستان (30 شاقىرىم) جانە سارىاعاش (160 شاقىرىم) قالالارىنىڭ اينالما جولدارىن سالۋعا ءتيىستى ۆەدومستۆو تاراپىنان قاراجات قاراستىرىلعان. جۇمىس 2025 جىلى باستالادى.
سونداي-اق، ءمينيستردىڭ ۇسىنىسىنا سايكەس تۇركىستان وبلىسى اكىمدىگىنىڭ جولاۋشىلار كولىگى جانە اۆتوموبيل جولدارى باسقارماسىنىڭ «وڭتۇستىك جولدارى» مەملەكەتتىك كوممۋنالدىق كاسىپورنى قىزمەتكەرلەرىنىڭ جالاقىسى كوتەرىلدى. وسىلايشا، 2024 جىلدىڭ 1 قاڭتارىنان باستاپ جالاقى 15 پايىزعا ءوستى. قىزمەتكەرلەردىڭ ەڭبەك جاعدايىن جاقسارتۋ جۇمىستارى جالعاسۋدا.
بۇگىنگى كەزدەسۋ بارىسىندا ءوڭىر تۇرعىندارى استانا جانە الماتى قالالارىنا اۋە رەيستەرىنىڭ سانىن ۇلعايتۋ، سونداي-اق «تۇركىستان-قاراعاندى» باعىتى بويىنشا اۋە رەيستەرىن اشۋدى، «تۇركىستان-سامارقاند» حالىقارالىق اۋە رەيسىن قالپىنا كەلتىرۋ جانە «تۇركىستان-شىمكەنت» تەمىرجول قاتىناسىن لەنگىر ستانسياسىنا دەيىن ۇزارتۋ ماسەلەسىن كوتەردى. مينيسترلىك بۇل ۇسىنىستاردى قۇزىرلى مەملەكەتتىك ورگاندارمەن جانە اۋە كومپانيالارىمەن بىرلەسىپ جەدەل قاراستىرىپ، قاجەتتى جۇمىستار جۇرگىزەدى.
مارات قارابايەۆ وبلىس حالقىمەن كەزدەسۋدەن كەيىن ءوڭىر ازاماتتارىن جەكە قابىلدادى. وندا ۇزىندىعى 55 شاقىرىم بولاتىن «تۇركىستان-اششىساي» تاس جولىن جوندەۋ جانە حانقورعان اۋىلدىق وكرۋگىندەگى جەرگىلىكتى ماڭىزى بار جولدى جوندەۋگە قاتىستى ساۋالدار بولدى. بارلىق وتىنىشتەر باقىلاۋعا الىنىپ، مينيسترلىكتىڭ جاۋاپتى قىزمەتكەرلەرىنە ءتيىستى تاپسىرمالار بەرىلدى.
