قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆ قىزمەتىنەن كەتۋى مۇمكىن، دەپ حابارلايدى Dalanews.kz.
بۇل تۋرالى ينو-كارپ تەلەگرام ارناسى مالىمدەدى.
“ستانيسلاۆ چەرچەسوۆ قازاقستان قۇراماسىنان كەتەدى. فۋتبول فەدەراسياسىنىڭ جاڭا پرەزيدەنتى رەسەيلىك ماماندى قىزمەتىنەن بوساتىپ، ورنىنا ەكى قازاقستاندىق جانە ءبىر ەۋروپالىق ماماننىڭ كانديداتۋراسىن قاراستىرىپ جاتىر. چەرچەسوۆتىڭ كەزىندە قازاقستان ۇلتتار ليگاسىندا بىردە-بىر ماچتا جەڭىسكە جەتە المادى، ال جالپى گول ايىرماشىلىعى – 0:15. بۇل تۋرالى كوممەنتاتور ماۋلەن مالىمدەدى”، — دەيدى دەرەككوز.
اتالعان اقپاراتقا بەلگىلى جۋرناليست ميحايل كوزاچكوۆ تا پىكىر ءبىلدىردى.
“ستانيسلاۆ چەرچەسوۆ قازاقستان فۋتبول قۇراماسىنىڭ باس باپكەرى قىزمەتىنەن كەتۋى مۇمكىن دەگەن حابار تارادى. ەندى “كەلىسىمشارتتى بۇزۋعا ميلليون ەۋرو تولەۋ كەرەك، اقشاعا وبال” دەگەن اڭگىمە قوزعالاتىنى انىق. ءيا، بۇل از قاراجات ەمەس. ءبىراق بۇل شەشىم بىزگە الەم چەمپيوناتىنا ىرىكتەۋ كەزەڭىندە جاڭا مۇمكىندىكتەر سىيلاۋى مۇمكىن. قارسىلاستارىمىز دا ايتارلىقتاي قيىن ەمەس: بەلگيا قيىن كەزەڭدەردى باستان وتكەرۋدە، ۋەلس تۋرالى ناقتى ايتۋ قيىن، ال سولتۇستىك ماكەدونيا مەن ليحتەنشتەيندى مىقتى باپكەردىڭ، مىسالى، ماگومەد ادييەۆتىڭ جەتەكشىلىگىمەن جەڭۋگە ابدەن بولادى. ۇزدىك ۇشتىككە تالاسۋعا مۇمكىندىگىمىز بار. قىسقاسى، قوش بول، ستانيسلاۆ سالام ۇلى!”، — دەپ جازبا قالدىردى ول.
ەسكە سالا كەتەيىك، رەسەيلىك مامان باس باپكەرلىككە كەلگەننەن بەرى قازاقستان قۇراماسى بەس ويىندا جەڭىلىپ، ءبىر كەزدەسۋدە تەڭ ءتۇستى.
ايتا كەتەيىك، بۇعان دەيىن چەرچەسوۆ كوپشىلىكتىڭ سىنىنا ىلىككەن ەدى. ۇلتتار ليگاسى اياسىندا سلوۆەنيامەن وتكەن ماچتان كەيىنگى باسپا ءسوز كونفەرەنسياسىندا مارقۇم امانگەلدى سەيىتحاننىڭ ۇلى بەگاسىل سەيىتحان ستانيسلاۆ چەرچەسوۆكە قازاق تىلىندە سۇراق قويادى. باس باپكەر ءجۋرناليستىڭ ۇستىنە فرانسيانىڭ پسج كلۋبىنىڭ جەيدەسىن كيىپ العانىن ازىلگە اينالدىرعىسى كەلدى مە، ايتەۋىر: "سەن قاي تىلدە سويلەپ تۇرسىڭ – فرانسۋزشا ما؟" دەپ ءسوزىن ءبولدى. سونان سوڭ باسىن يزەپ، سۇراعىن جالعاستىرۋعا بولاتىنىن اڭعارتتى.
ودان كەيىن كوپشىلىك ستانيسلاۆ چەرچەسوۆتىڭ مۇنىسىن قازاق ءتىلىن كەمسىتۋگە بالاپ، الەۋمەتتىك جەلىدە وسى سۇقباتتىڭ ۆيدەوسىن جاپپاي بولىسە باستادى. تۋريزم جانە سپورت مينيسترلىگى بۇل جاعدايعا بەي-جاي قاراماي، قازاقستان فۋتبول فەدەراسياسىنا رەسمي حات جولدادى. كوپ ۇزاماي چەرچەسوۆكە ايىپپۇل سالىنعانى بەلگىلى بولدى. پارلامەنتتە بۇل جايلى قازاقستان فۋتبول فەدەراسياسىنىڭ پرەزيدەنتى ادىلەت بارمەنقۇلوۆ ءمالىم ەتتى. تۋريزم جانە سپورت ءمينيسترى وسى جاعدايلاردان سوڭ ەلدى سابىرعا شاقىرىپ، جەلىدە جازبا جاريالادى.
