وڭىردە بولعان جاعدايعا بايلانىستى كەشە پرەمەر-مينيستردىڭ ورىنباسارى بەردىبەك ساپاربايەۆ جامبىل وبلىسىنا شۇعىل جەتىپ، جاعدايمەن تانىسقان بولاتىن.
7 اقپان كۇنى، كەشكى ساعات التى جارىم شاماسىندا قورداي اۋدانىنىڭ قاراكەمەر مەن ماسانچي اۋىلدارى تۇرعىندارىنىڭ اراسىندا قاقتىعىس ورىن الدى. تاياق-تاستارمەن قارۋلانعان بۇلىكشىلەر تۇرعىن ءۇي تەرەزەلەرىن سىندىرىپ، كولىكتەر مەن دۇكەندەردى ورتەي باستادى. ءقازىر جاعدايدى پوليسيا تولىق باقىلاۋىنا الدى. وسىعان بايلانىستى ۇكىمەت كوميسسياسىن باستاپ بارعان ۆيسە-پرەمەر بەردىبەك ساپاربايەۆ تۇراقتىلىقتى قامتاماسىز ەتەمىز دەپ سەندىردى.
– قازىرگى تاڭدا ءبىز اراڭداتۋشىلاردىڭ كىمدەر ەكەنىن بىلمەيمىز. وزدەرىڭىز كوردىڭىزدەر، ۇيلەر مەن ساۋدا ورىندارىنىڭ، كولىكتەردىڭ قانداي جاعدايعا ۇشىراعانىن. بۇل قاراپايىم حالىقتىڭ قولىنان كەلمەيدى دەپ ويلايمىن. سوندىقتان ءبىزدىڭ ويىمىزشا، اراڭداتۋشىلار مەن ارنايى ۇيىمداستىرۋشىلار بولۋى مۇمكىن. ونى قۇقىق قورعاۋ ورگاندارى قۇرعان جۇمىس توبى زەرتتەيدى، تەكسەرەدى، انىقتايدى، – دەدى بەردىبەك ساپاربايەۆ.
وكىنىشكە قاراي بۇلىكشىلىك سالدارىنان 8 ادام قازا بولدى. 127 ادام مەديسينالىق كومەككە جۇگىندى. ونىڭ ىشىندە 39-ى وق جاراقاتىن العان. تاعى 43 ادام اۋرۋحانادا ەم قابىلداپ جاتىر. جەتەۋى جانساقتاۋ بولىمىندە. ولاردىڭ جاعدايىمەن بەردىبەك ساپاربايەۆ تانىستى. 5 ناۋقاس سانيتارلىق اۆياسيا ارقىلى الماتى قالاسىنا جانە بىرەۋى تاراز قالاسىنا، سونىمەن قاتار 13 ادام تۋىسقاندارىنىڭ كومەگىمەن كورشى قىرعىز ەلىندەگى توقماق اۋرۋحاناسىنا جەتكىزىلدى.
– جاڭا ءتۇس قايتا دا وزدەرىڭىز بىلەسىزدەر، 47 ادام ءتۇنى بويى بولعان جاعداي سالدارىنان قوردايدا ۇستالعان بولاتىن. ودان كەيىن 44 ادام اۋقاتتى اۋىلىندا ۇستالعان بولاتىن. ولاردىڭ ءبىرازى – قاراكەمەر ەلدى-مەكەنىنىڭ ازاماتتارى. ولاردىڭ كىناسى جوق دەپ وتىر، – دەدى وبلىس اكىمى اسقار مىرزاحمەتوۆ.
ءقازىر وقيعا ورنىندا 14 جەدەل جاردەم بريگاداسى مەن 39 دارىگەر مەديسينالىق كومەك كورسەتىپ جاتىر. ارنايى تەحنيكانىڭ 19 بىرلىگى، 12 ءورت ءسوندىرۋ كولىگى مەن توتەنشە جاعدايلار دەپارتامەنتىنىڭ 80 قىزمەتكەرى جۇمىلدىرىلدى.
– ءبىر اللاعا شۇكىرشىلىك ايتامىن. بەيبىتشىلىكتى تۋ ەتكەن وسىنداي ەلدە تۇرىپ جاتقانىمىز ءۇشىن ۇكىمەتكە العىسىمىزدى بىلدىرەمىز. جەرلەستەر، ەشقانداي اراڭداتۋشىلىققا جول بەرمەڭدەر. سان جىلدار بويى ءتاتۋ-تاتتى ءومىر ءسۇرىپ كەلدىك. ساناۋلى ادامداردىڭ تۇرمىستىق سيپاتتاعى ماسەلەسىنە بولا، كۇللى ەلدىڭ مازاسىن الدىق. ءبىزدىڭ، اقساقالداردىڭ دا قاتەلىگى بارىن جاسىرمايمىز. قاريالار جاستار اراسىندا ءتۇسىندىرۋ جۇمىستارىن ءجيى جۇرگىزىپ وتىرۋ كەرەك.
ۇكىمەت كوميسسياسى، سونداي-اق قورداي اۋدانىنداعى قورداي، ماسانچي، اۋقاتتى جانە سورتوبە ەلدى-مەكەندەرىنە بارىپ، ىشكى جاعدايمەن تانىسادى. جەرگىلىكتى تۇرعىندارىمەن كەزدەسىپ، ءتۇسىندىرۋ جۇمىستارىن جۇرگىزەدى، – دەدى سورتوبە اۋىلى ارداگەرلەر كەڭەسىنىڭ ءتوراعاسى يسمار ۆوينسە.
