Óńirde bolǵan jaǵdaiǵa bailanysty keshe Premer-ministrdiń orynbasary Berdibek Saparbaev Jambyl oblysyna shuǵyl jetip, jaǵdaimen tanysqan bolatyn.
7 aqpan kúni, keshki saǵat alty jarym shamasynda Qordai aýdanynyń Qarakemer men Masanchi aýyldary turǵyndarynyń arasynda qaqtyǵys oryn aldy. Taiaq-tastarmen qarýlanǵan búlikshiler turǵyn úi terezelerin syndyryp, kólikter men dúkenderdi órtei bastady. Qazir jaǵdaidy politsiia tolyq baqylaýyna aldy. Osyǵan bailanysty Úkimet komissiiasyn bastap barǵan vitse-premer Berdibek Saparbaev turaqtylyqty qamtamasyz etemiz dep sendirdi.
– Qazirgi tańda biz arańdatýshylardyń kimder ekenin bilmeimiz. Ózderińiz kórdińizder, úiler men saýda oryndarynyń, kólikterdiń qandai jaǵdaiǵa ushyraǵanyn. Bul qarapaiym halyqtyń qolynan kelmeidi dep oilaimyn. Sondyqtan bizdiń oiymyzsha, arańdatýshylar men arnaiy uiymdastyrýshylar bolýy múmkin. Ony quqyq qorǵaý organdary qurǵan jumys toby zertteidi, tekseredi, anyqtaidy, – dedi Berdibek Saparbaev.
Ókinishke qarai búlikshilik saldarynan 8 adam qaza boldy. 127 adam meditsinalyq kómekke júgindi. Onyń ishinde 39-y oq jaraqatyn alǵan. Taǵy 43 adam aýrýhanada em qabyldap jatyr. Jeteýi jansaqtaý bóliminde. Olardyń jaǵdaiymen Berdibek Saparbaev tanysty. 5 naýqas sanitarlyq aviatsiia arqyly Almaty qalasyna jáne bireýi Taraz qalasyna, sonymen qatar 13 adam týysqandarynyń kómegimen kórshi Qyrǵyz elindegi Toqmaq aýrýhanasyna jetkizildi.
– Jańa tús qaita da ózderińiz bilesizder, 47 adam túni boiy bolǵan jaǵdai saldarynan Qordaida ustalǵan bolatyn. Odan keiin 44 adam Aýqatty aýylynda ustalǵan bolatyn. Olardyń birazy – Qarakemer eldi-mekeniniń azamattary. Olardyń kinási joq dep otyr, – dedi oblys ákimi Asqar Myrzahmetov.
Qazir oqiǵa ornynda 14 jedel járdem brigadasy men 39 dáriger meditsinalyq kómek kórsetip jatyr. Arnaiy tehnikanyń 19 birligi, 12 órt sóndirý kóligi men Tótenshe jaǵdailar departamentiniń 80 qyzmetkeri jumyldyryldy.
– Bir Allaǵa shúkirshilik aitamyn. Beibitshilikti tý etken osyndai elde turyp jatqanymyz úshin Úkimetke alǵysymyzdy bildiremiz. Jerlester, eshqandai arańdatýshylyqqa jol bermeńder. San jyldar boiy tatý-tátti ómir súrip keldik. Sanaýly adamdardyń turmystyq sipattaǵy máselesine bola, kúlli eldiń mazasyn aldyq. Bizdiń, aqsaqaldardyń da qateligi baryn jasyrmaimyz. Qariialar jastar arasynda túsindirý jumystaryn jii júrgizip otyrý kerek.
Úkimet komissiiasy, sondai-aq Qordai aýdanyndaǵy Qordai, Masanchi, Aýqatty jáne Sortóbe eldi-mekenderine baryp, ishki jaǵdaimen tanysady. Jergilikti turǵyndarymen kezdesip, túsindirý jumystaryn júrgizedi, – dedi Sortóbe aýyly ardagerler keńesiniń tóraǵasy Ismar Vointse.
