بۇگىن اباي وبلىسىنىڭ اكىمى بەرىك ءۋالي قىتايدىڭ چانسزي مەملەكەتتىك جوعارى تەحنولوگيالار يندۋستريالىق ايماعىنان كەلگەن دەلەگاسيا مۇشەلەرىمەن كەزدەستى. دەلەگاسيا قۇرامىندا قۇرىلىس، تاۋ-كەن ءوندىرىسى، ەلەكترونيكا جانە كولىك قۇراستىرۋ، كوپىر سالۋ باعىتىندا جۇمىس ىستەيتىن كومپانيا وكىلدەرى بولدى،- دەپ حابارلايدى Dalanews.kz
ايماق باسشىسى قىتايلىق تاراپقا وبلىستىڭ الەۋەتى مەن مۇمكىندىكتەرى تۋرالى ايتىپ، وڭىردە كولىك-لوگيستيكا، ماشينا جاساۋ، قۇرىلىس، اۋىل شارۋاشىلىعى سالالارىندا ينۆەستيسيالىق جوبالاردى بىرلەسە جۇزەگە اسىرۋعا بولاتىنىن اتاپ ءوتتى.
«اباي وبلىسى توعىز جولدىڭ تورابىندا تۇرعاندىقتان كولىك-لوگيستيكالىق الەۋەتى زور. سەمەي مەن اياگوز قالالارى اۋماعىنداعى تەمىر جول بويىندا لوگيستيكالىق حابتار اشۋعا تولىق مۇمكىندىك بار. وبلىس ورتالىعىنا كوپىر كەرەك. سەمەي قالاسىندا ماشينا قۇراستىراتىن زاۋىت بار. وسى باعىتتا دا بىرلەسە جۇمىس ىستەۋگە بولادى. جەل، سۋ ەنەرگياسىن وندىرەتىن ستانسيالار سالۋ ماسەلەسى دە وزەكتى. وڭىردە وندىرىستىك ايماعىمىز بار. ءبىز الەۋمەتتىك نىساندار مەن ينفراقۇرىلىمدىق جوبالاردى جۇزەگە اسىرعىسى كەلەتىن ينۆەستورلارمەن جۇمىس ىستەۋگە دايىنبىز. مامىر ايىنىڭ ورتاسىندا قىتايعا ارنايى دەلەگاسيامەن بارىپ، كەلىسسوزدەر جۇرگىزۋدى جوسپارلاپ وتىرمىز» دەدى وبلىس اكىمى.
قىتايلىق تاراپ ءوز كەزەگىندە اباي وبلىسىندا بىرلەسكەن جوبالاردى جۇزەگە اسىرۋعا قىزىعۋشىلىق تانىتىپ، بىرىككەن كاسىپورىندار اشۋ، ينفراقۇرىلىمدىق جانە ونەركاسىپتىك جوبالارعا ينۆەستيسيا سالۋ بويىنشا ناقتى ۇسىنىستار بەرەتىنىن جەتكىزدى. ايتا كەتەيىك، شەت ەلدىك كومپانيا وكىلدەرى بۇعان دەيىن الماتى، استانا جانە شىمكەنت قالالارىندا بىرنەشە جوبانى جۇزەگە اسىرعان.
