بٸزدٸڭ شەنەۋنٸكتەرٸمٸزدٸڭ ساناسى ورتاعاسىرلىق تەڭٸز قاراقشىلارىنىڭ ساناسى دەرەجەسٸندە قالعان. تەك توناۋ! ۇراندارى وسى.
قازاقستان, قايران قازاقستان, قۇداي تاعالا باي جاراتقان قازاقستان تالاپايعا تٷسٸپ كەتتٸ! وسىنى ايتساڭ, باسشىلار اشۋلانادى, شامدانادى. وۋ, شىندىقتىڭ نەسٸنە شامىرقانادى.
قازاقستان بايلىعى قورقاۋلاردىڭ توناۋىنا تٷسپەسە, سول بايلىق ٶز حالقىن اسىراۋعا جەتەدٸ عوي, جەتٸپ-ارتىلادى عوي.
كامال, سەن ٶزٸڭ ەمەس پە ەدٸڭ العاشقى: «قازاقستان. XXI عاسىر» دەگەن ماقالاڭدا قازاقستان بايلىعى بٸر ميلليارد ادامدى اسىراۋعا جەتەدٸ دەگەن?! ال قازٸرگٸ حالقى ون جەتٸ ميلليونعا جەتەر-جەتپەس. سونىڭ قانشاۋى باي, قانشاۋى كەدەي! ەسەپكە جٷيرٸك ەدٸڭ عوي, شىعارىپ كٶرشٸ. سولاي, كامال دوس. ادامنىڭ ساناسى, نيەتٸ, پەيٸلٸ تٷزەلمەي, تٷك تە تٷزەلمەيدٸ...
پرەزيدەنتتٸڭ ٶزٸ ٶزٸنٸڭ ۋەزٸرلەرٸنە «قوماعاي, قاناعاتسىز» دەپ اشىنسا, دەمەك قوعامنىڭ باسى اۋىرادى دەگەن سٶز. ونداي شەنەۋنٸكتەر قوعام دەنەسٸندەگٸ قاتەرلٸ ٸسٸكتەر. دەر كەزٸندە سىلىپ تاستاپ وتىرماسا اسا قاۋٸپتٸ. ال بٸزدٸڭ پروكۋراتۋرا, تەرگەۋ, ميليتسييا, سوت, قاۋٸپسٸزدٸك ورگاندارى ۇرى-قارىلاردىڭ, پاراقور, جەمقورلاردىڭ شاباقتارىن عانا ۇستايدى دا, جايىندارىن, اكۋلالارىن ۇستاۋعا شاماسى جەتپەيدٸ. ياكي قورقادى, ياكي سىبايلاس.
ەرينە, حالىق تٶزٸمدٸ. باستىق بارىپ: «حالٸڭ قالاي?» – دەسە, «قۇدايعا شٷكٸر, بۇدان جامان كٷنٸمٸزدە دە شىداعانبىز», – دەپ تەۋباسىن ايتادى. حالىق تٶزٸمدٸ. بٸراق حالىق تٶزە بەرەدٸ ەكەن دەپ تاسىراڭداۋعا بولمايدى. حالىق تىمىق جاتقان مۇحيت سيياقتى. ال بٸر بۋىرقانسا... قۇداي ونى كٶرسەتپەي-اق قويسىن.
كامال دوس! ەكونوميكالىق رەفورما تٷزۋ بولۋ ٷشٸن الدىمەن ادامنىڭ ساناسىن, قۇلقىنىن, نىسابىن تٷزەتٸپ ال.
كازٸرگٸ جەگٸشتەردٸڭ كٶبٸ سونداي. اكۋلانى سويعاندا قارنىنان تاس تا, تاسباقا دا, تەمٸر دە, تەرسەك تە شىعا بەرەتٸن كٶرٸنەدٸ. ال بٸزدٸڭ ادام-اكۋلالارىمىزدىڭ قارنىن جارىپ جٸبەرسەڭ – قازاقستاننىڭ پروكاتى دا, التىنى دا, مىرىشى دا, حرومى دا, مۇنايى دا, اراق زاۋىتتارى دا, قانت زاۋىتتارى – بەرٸ-بەرٸ اقتارىلىپ شىعا كەلەر ەدٸ.
كامال سمايىلوۆ پەن شەرحان مۇرتازانىڭ اراسىنداعى
«ەلٸم, سەن تىڭدا, ەلباسى, ساعان ايتامىن» تاقىرىبىندا
جازىلعان حاتتار جەلٸسٸنەن ٷزٸندٸ
