Bizdiń sheneýnikterimizdiń sanasy ortaǵasyrlyq teńiz qaraqshylarynyń sanasy dárejesinde qalǵan. Tek tonaý! Urandary osy.
Qazaqstan, qairan Qazaqstan, Qudai taǵala bai jaratqan Qazaqstan talapaiǵa túsip ketti! Osyny aitsań, basshylar ashýlanady, shamdanady. Oý, shyndyqtyń nesine shamyrqanady.
Qazaqstan bailyǵy qorqaýlardyń tonaýyna túspese, sol bailyq óz halqyn asyraýǵa jetedi ǵoi, jetip-artylady ǵoi.
Kamal, sen óziń emes pe ediń alǵashqy: «Qazaqstan. XXI ǵasyr» degen maqalańda Qazaqstan bailyǵy bir milliard adamdy asyraýǵa jetedi degen?! Al qazirgi halqy on jeti millionǵa jeter-jetpes. Sonyń qanshaýy bai, qanshaýy kedei! Esepke júirik ediń ǵoi, shyǵaryp kórshi. Solai, Kamal dos. Adamnyń sanasy, nieti, peiili túzelmei, túk te túzelmeidi...
Prezidenttiń ózi óziniń ýázirlerine «qomaǵai, qanaǵatsyz» dep ashynsa, demek qoǵamnyń basy aýyrady degen sóz. Ondai sheneýnikter qoǵam denesindegi qaterli isikter. Der kezinde sylyp tastap otyrmasa asa qaýipti. Al bizdiń prokýratýra, tergeý, militsiia, sot, qaýipsizdik organdary ury-qarylardyń, paraqor, jemqorlardyń shabaqtaryn ǵana ustaidy da, jaiyndaryn, akýlalaryn ustaýǵa shamasy jetpeidi. Iaki qorqady, iaki sybailas.
Árine, halyq tózimdi. Bastyq baryp: «Haliń qalai?» – dese, «Qudaiǵa shúkir, budan jaman kúnimizde de shydaǵanbyz», – dep táýbasyn aitady. Halyq tózimdi. Biraq halyq tóze beredi eken dep tasyrańdaýǵa bolmaidy. Halyq tymyq jatqan muhit siiaqty. Al bir býyrqansa... Qudai ony kórsetpei-aq qoisyn.
Kamal dos! Ekonomikalyq reforma túzý bolý úshin aldymen adamnyń sanasyn, qulqynyn, nysabyn túzetip al.
Kazirgi jegishterdiń kóbi sondai. Akýlany soiǵanda qarnynan tas ta, tasbaqa da, temir de, tersek te shyǵa beretin kórinedi. Al bizdiń adam-akýlalarymyzdyń qarnyn jaryp jiberseń – Qazaqstannyń prokaty da, altyny da, myryshy da, hromy da, munaiy da, araq zaýyttary da, qant zaýyttary – bári-bári aqtarylyp shyǵa keler edi.
Kamal Smaiylov pen Sherhan Murtazanyń arasyndaǵy
«Elim, sen tyńda, Elbasy, saǵan aitamyn» taqyrybynda
jazylǵan hattar jelisinen úzindi
