– تۇركىستان وبلىسىنداعى كورىكتى ءارى تابيعاتى باي قازىعۇرت اۋدانىنىڭ مەرەيلى مەرەكەسى بارىمىزگە ورتاق. ماقسات – توي تويلاۋ ەمەس، ءبىر عاسىرعا جۋىق ۋاقىت ارالىعىنداعى وقيعالاردى وي ەلەگىنەن وتكىزۋ. ەلدىڭ بىرلىگىن نىعايتىپ، يگى ىسكە جۇمىلدىرۋ. تاۋەلسىز قازاقستاننىڭ بولاشاعى جارقىن بولۋى ءۇشىن ءاربىر ازامات وتانشىل بولۋى قاجەت. ال، ول ءۇشىن تۋعان جەردىڭ تاريحىن، ولكەتانۋدى بىلگەن ابزال. قازىعۇرت قارىشتاپ دامي بەرمەك. سىزدەردى اتاۋلى كۇنمەن شىن جۇرەكتەن قۇتتىقتاپ، بارشاڭىزعا باق-بەرەكە، مىقتى دەنساۋلىق تىلەيمىن! – ج.تۇيمەبايەۆ.
مۇنان سوڭ، وبلىس باسشىسى اۋداننىڭ ءوسىپ، وركەندەۋىنە ۇلەس قوسقان ءبىرقاتار ازاماتتاردى اتاۋلى كۇندە قۇتتىقتاپ، سىي-سياپات جاسادى.
كونفەرەنسيا بارىسىندا ەلىمىزدە بەلگىلى ءبىرقاتار ازاماتتار، اتاپ ايتقاندا، ق ر پارلامەنتى ءماجىلىسىنىڭ دەپۋتاتى، قازىعۇرت اۋدانىنىڭ قۇرمەتتى ازاماتى س.ابدراحمانوۆ پەن ق ر پارلامەنتى سەناتىنىڭ دەپۋتاتى، وبلىستىڭ جانە قازىعۇرت اۋدانىنىڭ قۇرمەتتى ازاماتى ءا.بەكتايەۆ قۇتتىقتاۋ ءسوزىن سويلەپ، اۋدان جۇرتشىلىعىنا قازىعۇرتتى ودان ءارى كوركەيتىپ، تۇرلەندىرۋدە ساتتىلىك تىلەدى.
سونىمەن بىرگە، جيىندا «كيەلى قازىعۇرت» جانە «قازىعۇرت اۋدانىنىڭ تاريحى» اتتى كىتاپتاردىڭ تۇساۋ كەسەرى ءوتتى.
ءوڭىرى كوك مايسالى، باۋ-باقشالى، گۇل جايناعان قازىعۇرت ولكەسىنىڭ ادامدارى ەڭبەكقور، مەيىرىمدى، باۋىرمال، ىنتىماعى مەن بىرلىگى جاراسقان قۇتتى مەكەن ەكەنى بەلگىلى. كيەلى دە قاسيەتتى اۋداندا ءتۇرلى سالادا جەتىستەردىڭ بولۋى زاڭدىلىق.
ماسەلەن، قازىعۇرت اۋدانىندا اۋىل شارۋاشىلىعى بويىنشا جالپى ءونىم كولەمى 22،1 ملرد. تەڭگە بولىپ، وتكەن جىلدىڭ 8 ايىمەن سالىستىرعاندا 3،7 ملرد. تەڭگەگە ارتقان. اۋدان قازىناسىنا 11،1 ملرد. تەڭگەگە ينۆەستيسيا تارتىلىپ، 2017 جىلدىڭ 8 ايىمەن سالىستىرعاندا 107،9 پايىزعا كوبەيىپتى. گازداندىرۋ جۇمىستارى بويىنشا 64 ەلدى مەكەننىڭ بۇگىنگى تاڭعا 56،2 پايىزى تابيعي گازعا قوسىلعان. ءقازىر 10 ەلدى مەكەنگە تابيعي گاز قوسۋ جۇمىستارى جۇرگىزىلۋدە. جالپى اۋدان بويىنشا 46 ەلدى مەكەن تابيعي گاز جۇيەسىمەن قامتىلىپ، 71،8 پايىزدى قۇرايدى.
تۇركىستان وبلىسى اكىمىنىڭ باسپا ءسوز قىزمەتى
