قازاقستاندا تاعى التى اۆتوجول اقىلى بولۋى مۇمكىن، دەپ حابارلايدى Dalanews.kz.
كولىك مينيسترلىگى رەسپۋبليكالىق ماڭىزى بار ءبىرقاتار جول ۋچاسكەلەرىن اقىلى ساناتقا كوشىرۋدى ۇسىنىپ وتىر.
ق ر پرەمەر-مينيسترى ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا "قازاۆتوجول" ۇلتتىق كومپانياسىنىڭ باسقارما ءتوراعاسى دارحان يماناشيەۆ ەلىمىزدە اقىلى جول ينفراقۇرىلىمىن دامىتۋ جۇمىستارى كەزەڭ-كەزەڭىمەن جۇرگىزىلىپ جاتقانىن باياندادى.
ونىڭ مالىمەتىنشە، بۇگىندە قازاقستاندا جالپى ۇزىندىعى 4 900 شاقىرىمدى قۇرايتىن 26 اقىلى جول تەلىمى جۇمىس ىستەپ تۇر.
ال 2026 جىلى ۇزىندىعى شامامەن 2 مىڭ شاقىرىم بولاتىن تاعى التى جاڭا ۋچاسكەنى ىسكە قوسۋ جوسپارلانعان. ولار:
- قاراعاندى – بالقاش – بۋرىلبايتال - 554،6 كم
- بۋرىلبايتال – قۇرتى - 226،4 كم
- اقتوبە – قاندىاعاش – ماقات - 89 كم
- تالدىقورعان – وسكەمەن - 773 كم
- اتىراۋ – استراحان - 277 كم
- مەركە – شۋ – بۋرىلبايتال - 78 كم
سونىمەن بىرگە مينيسترلىك بۇعان دەيىن بالقاش – بۋرىلبايتال (645 كم)، تالدىقورعان – وسكەمەن (773 كم) جانە بۋرىلبايتال – قۇرتى (226 كم) باعىتتارىن اقىلى جولدار تىزىمىنە ەنگىزۋدى ۇسىنعان.
ۆەدومستۆونىڭ تۇسىندىرمە جازباسىندا جوبا قابىلدانعان جاعدايدا ونىڭ الەۋمەتتىك-ەكونوميكالىق نەمەسە قۇقىقتىق تۇرعىدان تەرىس سالدارى بولمايتىنى كورسەتىلگەن. قۇقىقتىق اكت جوباسىن قوعامدىق تالقىلاۋ 17 ناۋرىزعا دەيىن جالعاسادى.
اقىلى جولداردان تۇسكەن تابىس قايدا جۇمسالدى
دارحان يماناشيەۆتىڭ ايتۋىنشا، بىلتىر اقىلى جولداردان 87 ملرد تەڭگە جينالعان. بۇل قاراجات تولىقتاي اقىلى ۋچاسكەلەردى كۇتىپ ۇستاۋعا باعىتتالعان (2024 جىلى - 48 ملرد تەڭگە).
تۇسكەن قارجى ەسەبىنەن:
• 1 456 بىرلىك ارنايى تەحنيكا مەن جابدىق ساتىپ الىنعان؛
• 354 مىڭ شارشى مەتر جول جامىلعىسىنا اعىمداعى جوندەۋ جۇرگىزىلگەن؛
• 340 مىڭ تەكشە مەتر كوكتايعاققا قارسى ماتەريال پايدالانىلعان.
سونداي-اق 2024–2025 جىلدارى 1 مىڭنان استام سۋ وتكىزۋ قۇبىرى ورناتىلىپ جانە جوندەلگەن.
"جۇزەگە اسىرىلعان شارالاردىڭ ارقاسىندا سۋ تاسقىنى ءقاۋپى بار ۋچاسكەلەر سانىن ەكى ەسەگە قىسقارتۋعا مۇمكىندىك تۋدى. ەرىگەن سۋلاردىڭ بولجامدى كولەمىن ەسكەرە وتىرىپ، جەرگىلىكتى اتقارۋشى ورگاندارمەن بىرلەسىپ 219 كارەر ينەرتتى ماتەريال قورىن قامتاماسىز ەتۋگە تارتىلدى"، - دەدى دارحان يماناشيەۆ.
اقاۋى بار جولداردا اقى ۋاقىتشا توقتاتىلۋى مۇمكىن
جيىندا اقاۋى انىقتالعان اقىلى ۋچاسكەلەردە جول اقىسىن ۋاقىتشا توقتاتا تۇرۋ نورماسى ەنگىزىلگەنى دە ايتىلدى. قازىرگى تاڭدا اقاۋلار تىركەلگەن اۋماقتىڭ كولەمى 1،1 ملن شارشى مەتردى قۇرايدى. بارلىعى — 14 ۋچاسكە (477 كم). بۇل جەرلەردە جول-قۇرىلىس ماۋسىمى باستالعاندا جوندەۋ جۇمىستارى جۇرگىزىلمەك.
سونىمەن قاتار جول پايدالانۋشىلاردىڭ ءوتىنىشى بويىنشا اقىلى جولمەن جۇرگەنى ءۇشىن تولەم مەرزىمىن 7 كۇننەن 30 كۇنگە دەيىن ۇزارتۋ ۇسىنىلۋدا. ءتيىستى تۇزەتۋلەر ءقازىر ۋاكىلەتتى ورگانداردا كەلىسىلىپ جاتىر.
جولدار سيفرلاندىرىلىپ جاتىر
اۆتوجولداردىڭ ءبۇلىنۋىنىڭ الدىن الۋ ءۇشىن اۆتوماتتاندىرىلعان ولشەۋ ستانسالارىن ورناتۋ جۇمىسى جالعاسۋدا. وتكەن جىلى تاعى 24 ستانسا قويىلىپ، رەسپۋبليكالىق جولدارداعى ولاردىڭ جالپى سانى 46-عا جەتكەن. 2028 جىلعا دەيىن تاعى 102 ستانسا ورناتۋ جوسپارلانعان.
سونىمەن بىرگە جولداردى باسقارۋدىڭ جاڭا سيفرلىق تەتىكتەرى ەنگىزىلۋدە.
"بىلتىر پيلوتتىق جوبا رەتىندە “الماتى – قونايەۆ” تاس جولىنىڭ 42 شاقىرىمدىق اقىلى ۋچاسكەسىندە ينتەللەكتۋالدى كولىك جۇيەسىن ەنگىزۋدى باستادىق"، - دەدى يماناشيەۆ.
جوبا اياسىندا:
• جول-كولىك وقيعالارىن باقىلاۋ؛
• جانۋارلاردىڭ جولعا شىعۋىن انىقتاۋ؛
• اۋا رايىن مونيتورينگتەۋ؛
• جول ەرەجەسىن بۇزۋدى اۆتوماتتى باعالاۋ سياقتى جاساندى ينتەللەكت ەلەمەنتتەرى قولدانىلادى.
بۇدان بولەك، 1403 كولل-ورتالىعىن جاڭعىرتۋ ءۇشىن "ساپار" زياتكەرلىك ديسپەچەرى ەنگىزىلۋدە.
"ول پايدالانۋشىلارعا “اليسا” جانە “Siri” قاعيداتى بويىنشا داۋىستىق سيفرلىق اسسيستەنت قىزمەتىن كورسەتەدى"، - دەدى ۇلتتىق كومپانيا باسشىسى.
جول بويى سەرۆيسى كەڭەيەدى
ءقازىر ەل بويىنشا جول بويىنداعى سەرۆيس نىساندارىنىڭ سانى 1 421-گە جەتكەن.
2023–2025 جىلدارى جوعارى ساناتتاعى 123 جاڭا سەرۆيس نىسانى ىسكە قوسىلدى. بيىل جەكە ينۆەستيسيا ەسەبىنەن تاعى 37 نىسان اشۋ جوسپارلانىپ وتىر.
