قازاقستاندا 2025 جىلى ازاماتتاردىڭ جاڭا نەسيەگە بەرگەن وتىنىمدەرى 13،7%-عا قىسقارعان. بۇل تۋرالى قارجىگەرلەر قاۋىمداستىعىنىڭ تالداۋ ورتالىعى مالىمدەدى، دەپ حابارلايدى Dalanews.kz.

نارىقتاعى نەگىزگى تومەندەۋ كەپىلسىز نەسيەلەرگە تيەسىلى بولدى. بارلىق ءوتىنىمنىڭ 91%-ىن قۇرايتىن بۇل سەگمەنت 16،9%-عا قىسقارعان. ال باسقا باعىتتاردا، كەرىسىنشە، سۇرانىس ارتقان. يپوتەكالىق نەسيەلەر – 9،2%-عا، اۆتونەسيەلەر – 41،8%-عا، ال كەپىلمەن بەرىلەتىن تۇتىنۋشىلىق نەسيەلەر – 77،1%-عا وسكەن.

ساراپشىلاردىڭ ايتۋىنشا، بىرەگەي قارىز الۋشىلار سانى 57 مىڭ ادامعا ازايعان. بۇل حالىقتىڭ قارىز الۋعا ساقتىقپەن قاراي باستاعانىن جانە نارىقتىڭ جاڭا كليەنتتەر تارتۋ مۇمكىندىگى شەكتەلە باستاعانىن كورسەتەدى.

جاڭا بەرىلگەن نەسيەلەر كولەمى دە باياۋ ءوسىم كورسەتكەن: نەبارى 8،7%. ال بىلتىرعى كورسەتكىش 21،9% بولعان. سونىمەن قاتار بولشەك نەسيەلەر پورتفەلى 19،8%-عا ۇلعايعان.

ورتاشا پايىزدىق مولشەرلەمە 18،2%-عا دەيىن كوتەرىلدى. نەسيە وتىنىمدەرىن ماقۇلداۋ دەڭگەيى 29،2%-دان 26،2%-عا دەيىن تومەندەدى. بانكتەر بازالىق مولشەرلەمەنىڭ ءوسۋى مەن تالاپتاردىڭ كۇشەيۋىنە بايلانىستى قارىز الۋشىلاردى ىرىكتەۋدى قاتاڭداتقان.

سونىمەن قاتار مەرزىمى وتكەن بەرەشەك كولەمى دە ارتقان. ياعني، 2،9%-دان 4،0%-عا دەيىن ءوستى. بۇل نەگىزىنەن تۇتىنۋشىلىق نەسيە سەگمەنتىندەگى جاعدايمەن بايلانىستى.

ايتا كەتەيىك، ءبىر جىل بۇرىن بۇل كورسەتكىش كەرىسىنشە 13،8%-عا ءوسىم كورسەتكەن ەدى. وسىلايشا، كەيىنگى جىلدارداعى ءوسىم ءۇردىسى العاش رەت باسەڭدەدى.