سولتۇستىك قازاقستان وبلىسىندا تايىنشا قالاسىنىڭ جەلەزنودوروجنىي شاعىن اۋدانىنىڭ جىلۋ ينفراقۇرىلىمىن جاڭعىرتۋ جوباسى اياقتالدى. ول 2025 جىلى باستالىپ، ءوڭىردىڭ كوممۋنالدىق ينفراقۇرىلىمىن جاڭارتۋدىڭ نەگىزگى قادامدارىنىڭ بىرىنە اينالدى. جۇمىستار «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى اياسىندا جۇزەگە اسىرىلدى، دەپ حابارلايدى Dalanews.kz.

ناتيجەسىندە جىلۋ تراسساسىنىڭ جاعدايى تۇبەگەيلى جاقساردى: جۇمىس ىستەپ تۇرعان 2،2 شاقىرىم قايتا جاڭارتىلدى جانە 1،157 شاقىرىم جىلۋ جەلىسى سالىندى. وسىنىڭ ارقاسىندا جەلەزنودوروجنىي شاعىن اۋدانىندا توزۋ دەڭگەيى ەكى ەسەدەن استامعا تومەندەتىلدى (60%-دان 26%-عا دەيىن)، بۇل جىلۋمەن جابدىقتاۋ ساپاسىن ارتتىردى جانە جىلىتۋ كەزەڭىندە اپات ءقاۋپىن تومەندەتتى. 

جوبا قالا تۇرعىندارىنىڭ ءومىر ءسۇرۋ ساپاسىنا تىكەلەي اسەر ەتتى. ەندى 18 كوپپاتەرلى جانە 29 جەكە تۇرعىن ءۇي، 4 بيۋدجەتتىك مەكەمە سەنىمدى جىلۋمەن قامتاماسىز ەتىلدى. سونىمەن قاتار، جاڭارتىلعان جىلۋ تراسساسىنا بيزنەس نىساندارى (دەنە شىنىقتىرۋ-ساۋىقتىرۋ كەشەنى مەن سالىنىپ جاتقان باسسەين) جانە ءبىرقاتار جەكە ۇيلەر قوسىلعان. 

جوبا اياسىندا جىلۋمەن جابدىقتاۋ سحەماسى وڭتايلاندىرىلدى: رەمزاۆود تۇرعىن ايماعىنىڭ ەسكىرگەن قازاندىعىن پايدالانۋ قاجەتتىلىگى جويىلدى. ەندى جىلۋ بەرۋ جەلەزنودوروجنىي شاعىن اۋدانىنىڭ قازاندىعىنان ورتالىقتاندىرىلعان تۇردە جۇزەگە اسىرىلادى. بۇل شىعىندى قىسقارتىپ، جەلەزنودوروجنىي شاعىن اۋدانىنداعى قازاندىق قىزمەتكەرلەرىنىڭ جالاقىسىن ارتتىرۋعا مۇمكىندىك بەردى.

«جەلەزنودوروجنىي شاعىن اۋدانىنداعى «تايىنشاكوممۋنسەرۆيس» ج ش س جىلۋ تراسساسى 1989 جىلى سالىنعان، ۇزىندىعى 1 900 م (2 جەلى)، ءىس جۇزىندە 2 قازاندىق جۇمىس ىستەدى. سوڭعى 10 جىلدا جىلۋ تراسساسىنىڭ قۇرىلىسى مەن جاڭعىرتىلۋى جۇرگىزىلمەگەن، قىس مەزگىلىندە اپاتتى بولدىرماۋ ءۇشىن ج ش س اعىمداعى جوندەۋ جۇمىستارىن جۇرگىزىپ، ءبىر ماۋسىمعا كەپىلدىك بەردى، جىلۋ تراسساسىن قايتا قۇرۋعا اسا مۇقتاج بولدى»، – دەدى تايىنشا اۋدانىنىڭ تكش ءبولىمىنىڭ باسشىسى مارات بايماعامبەتوۆ. 

ينۆەستيسيانىڭ جالپى كولەمى 745،9 ملن تەڭگەنى قۇرادى. نەگىزگى قارجىلاندىرۋ قازاقستاندىق تۇرعىن ءۇي كومپانياسى ەسەبىنەن – 677،1 ملن تەڭگە، سونداي-اق وبلىستىق بيۋدجەت ەسەبىنەن –  68،8 ملن تەڭگە قامتاماسىز ەتىلدى.

ايتا كەتۋ كەرەك، جۇزەگە اسىرىلعان جوبا ەكسج ۇلتتىق جوباسى اياسىندا ءوڭىردىڭ كوممۋنالدىق ينفراقۇرىلىمىن جاڭعىرتۋ بويىنشا جۇيەلى جۇمىستىڭ ءبىر بولىگى. وسى باعىتتاعى جۇمىس 2027 جىلعا قاراي تكش سالاسىنداعى جەلىلەردىڭ توزۋىن كەزەڭ-كەزەڭمەن تومەندەتۋ جانە «قىزىل ايماقتاردى» جويۋ ماقساتىندا جالعاستىرىلادى.

انىقتاما: «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى رەسپۋبليكا بويىنشا 2029 جىلعا دەيىن ىسكە اسىرىلۋدا جانە كوممۋنالدىق ينفراقۇرىلىمنىڭ توزۋىن 40%-عا دەيىن تومەندەتۋگە جانە اپات دەڭگەيىن 20%-عا قىسقارتۋعا باعىتتالعان.