Soltústik Qazaqstan oblysynda Taıynsha qalasynyń Jeleznodorojnyı shaǵyn aýdanynyń jylý ınfraqurylymyn jańǵyrtý jobasy aıaqtaldy. Ol 2025 jyly bastalyp, óńirdiń komýnaldyq ınfraqurylymyn jańartýdyń negizgi qadamdarynyń birine aınaldy. Jumystar «Energetıkalyq jáne komýnaldyq sektorlardy jańǵyrtý» ulttyq jobasy aıasynda júzege asyryldy, dep habarlaıdy Dalanews.kz.
Nátıjesinde jylý trassasynyń jaǵdaıy túbegeıli jaqsardy: jumys istep turǵan 2,2 shaqyrym qaıta jańartyldy jáne 1,157 shaqyrym jylý jelisi salyndy. Osynyń arqasynda Jeleznodorojnyı shaǵyn aýdanynda tozý deńgeıi eki eseden astamǵa tómendetildi (60%-dan 26%-ǵa deıin), bul jylýmen jabdyqtaý sapasyn arttyrdy jáne jylytý kezeńinde apat qaýpin tómendetti. 
Joba qala turǵyndarynyń ómir súrý sapasyna tikeleı áser etti. Endi 18 kóppáterli jáne 29 jeke turǵyn úı, 4 búdjettik mekeme senimdi jylýmen qamtamasyz etildi. Sonymen qatar, jańartylǵan jylý trassasyna bıznes nysandary (dene shynyqtyrý-saýyqtyrý kesheni men salynyp jatqan baseın) jáne birqatar jeke úıler qosylǵan.
Joba aıasynda jylýmen jabdyqtaý shemasy ońtaılandyryldy: Remzavod turǵyn aımaǵynyń eskirgen qazandyǵyn paıdalaný qajettiligi joıyldy. Endi jylý berý Jeleznodorojnyı shaǵyn aýdanynyń qazandyǵynan ortalyqtandyrylǵan túrde júzege asyrylady. Bul shyǵyndy qysqartyp, Jeleznodorojnyı shaǵyn aýdanyndaǵy qazandyq qyzmetkerleriniń jalaqysyn arttyrýǵa múmkindik berdi.
«Jeleznodorojnyı shaǵyn aýdanyndaǵy «TaıynshaKommýnServıs» JSHS jylý trassasy 1989 jyly salynǵan, uzyndyǵy 1 900 m (2 jeli), is júzinde 2 qazandyq jumys istedi. Sońǵy 10 jylda jylý trassasynyń qurylysy men jańǵyrtylýy júrgizilmegen, qys mezgilinde apatty boldyrmaý úshin JSHS aǵymdaǵy jóndeý jumystaryn júrgizip, bir maýsymǵa kepildik berdi, jylý trassasyn qaıta qurýǵa asa muqtaj boldy», – dedi Taıynsha aýdanynyń TKSH bóliminiń basshysy Marat Baımaǵambetov.
Investısıanyń jalpy kólemi 745,9 mln teńgeni qurady. Negizgi qarjylandyrý Qazaqstandyq turǵyn úı kompanıasy esebinen – 677,1 mln teńge, sondaı-aq oblystyq búdjet esebinen – 68,8 mln teńge qamtamasyz etildi.
Aıta ketý kerek, júzege asyrylǵan joba EKSJ ulttyq jobasy aıasynda óńirdiń komýnaldyq ınfraqurylymyn jańǵyrtý boıynsha júıeli jumystyń bir bóligi. Osy baǵyttaǵy jumys 2027 jylǵa qaraı TKSH salasyndaǵy jelilerdiń tozýyn kezeń-kezeńmen tómendetý jáne «qyzyl aımaqtardy» joıý maqsatynda jalǵastyrylady.
Anyqtama: «Energetıkalyq jáne komýnaldyq sektorlardy jańǵyrtý» ulttyq jobasy respýblıka boıynsha 2029 jylǵa deıin iske asyrylýda jáne komýnaldyq ınfraqurylymnyń tozýyn 40%-ǵa deıin tómendetýge jáne apat deńgeıin 20%-ǵa qysqartýǵa baǵyttalǵan.
