قازاقستاندا مۇناي مەن گازدى ءتيىمسىز پايدالانۋ فاكتىلەرى انىقتالدى. كومپانيالاردان 14 ملرد تەڭگەدەن استام كولەمدە زالال سوماسى ءوندىرىپ الىندى. سونداي-اق جالپى سوماسى 110 ملن تەڭگەنى قامتيتىن 80 ايىپپۇل سالىندى، دەپ حابارلايدى Dalanews.kz ق ر ەنەرگەتيكا مينيسترلىگىنىڭ باسپا ءسوز قىزمەتىنە سىلتەمە جاساپ. 

ق ر ەنەرگەتيكا مينيسترلىگى جانە ونىڭ اتىراۋ مەن قىزىلوردا وبلىستارىنداعى مۇناي-گاز كەشەنىندەگى مەملەكەتتىك ينسپەكسيانىڭ ءوڭىرارالىق باسقارمالارى رەتتەلەتىن سالاداعى زاڭنامانىڭ ساقتالۋىن قامتاماسىز ەتۋ بويىنشا جۇيەلى جۇمىستى جالعاستىرۋدا.

"2025 جىلدىڭ 9 ايىندا كومىرسۋتەك سالاسىنداعى مەملەكەتتىك باقىلاۋ اياسىندا 100 تەكسەرۋ ءىس-شاراسى وتكىزىلدى، ونىڭ ىشىندە 18 پروفيلاكتيكالىق باقىلاۋ، 30 جوسپاردان تىس تەكسەرۋ، 15 شارتتىق مىندەتتەمەلەردى ورىنداۋ بويىنشا باقىلاۋ جانە 37 مەملەكەتتىك قىزمەت كورسەتۋ اياسىنداعى رۇقساتتىق تەكسەرۋ بار. ناتيجەسىندە 18 بۇزۋشىلىقتى جويۋ تۋرالى نۇسقاما بەرىلدى، 80 اكىمشىلىك ايىپپۇل 110 ملن تەڭگە سوماسىندا سالىندى. سونىمەن قاتار، مۇناي مەن گازدى ۇتىمسىز پايدالانۋ ءۇشىن 14 ملرد تەڭگەدەن استام زالال ءوندىرىلدى. قازىرگى ۋاقىتتا قوسىمشا 4 ملن تەڭگەگە جۋىق ايىپپۇل مەن 2،4 ملرد تەڭگە زالالدى ءوندىرۋ بويىنشا ماتەريالدار قارالۋدا"، دەلىنگەن ۆەدومستۆو حابارلاماسىندا.

بۇعان دەيىن پاۆلوداردا ەكولوگيالىق تالاپتى بۇزعان كاسىپورىنعا 28،4 ملرد تەڭگە كولەمىندە ايىپپۇل سالىنعانىن جازعانبىز.