قىركۇيەك ايىندا وپەك+ اياسىنداعى سەگىز مەملەكەت مۇناي ءوندىرۋ كولەمىنە قاتىستى ەرىكتى شەكتەۋلەردى تاۋلىگىنە 547 مىڭ باررەلگە قىسقارتادى. بۇل قازاقستاننىڭ قىركۇيەك ايىندا مۇناي ءوندىرىسىن تاۋلىگىنە 1،5 ملن باررەلگە دەيىن ۇلعايتۋعا مۇمكىندىك بەرەدى، دەپ حابارلايدى Dalanews.kz.
بۇل تۋرالى ۇيىمنىڭ رەسمي باسپا ءسوز حابارلاماسىندا ايتىلعان.
"قازاقستان، رەسەي، ساۋد ارابياسى، ءباا، يراك، كۋۆەيت، الجير جانە ومان عالامدىق مۇناي نارىعىنداعى تۇراقتىلىقتى قولداۋعا دايىن ەكەندىكتەرىن راستادى. ولار نارىقتاعى تۇراقتى سۇرانىستى، قورلاردىڭ تومەن دەڭگەيىن جانە قولايلى ىرگەلى كورسەتكىشتەردى اتاي كەلە، بۇل وزدەرىنىڭ الدىندا ەنگىزىلگەن ەرىكتى شەكتەۋلەردى جويۋدىڭ كەزەكتى كەزەڭىنە وتۋگە مۇمكىندىك بەرگەنىن ناقتىلايدى. اتالعان شەشىمگە سايكەس، قىركۇيەك ايىندا سەگىز ەل تامىز ايىمەن سالىستىرعاندا تاۋلىگىنە قويىلعان ەرىكتى شەكتەۋلەردى 547 مىڭ باررەلگە قىسقارتادى"، دەلىنگەن رەسمي حابارلامادا.
بۇل - ءساۋىر ايىندا قولعا الىنعان نارىقتىڭ تاۋلىگىنە 2،2 ميلليون باررەل مۇناي وندىرىسىنە بىرتىندەپ ورالۋ جونىندەگى كەڭ اۋقىمدى جوسپاردىڭ ءبىر بولىگى. بۇل شەشىم تۇراقتى ەكونوميكالىق بولجامدار مەن نارىقتاعى قولايلى جاعداي، اتاپ ايتقاندا، الەمدىك مۇناي قورلارىنىڭ تومەن دەڭگەيى اياسىندا قابىلداندى. وسىلايشا، قاتىسۋشى ەلدەر ءوزارا كەلىسىلگەن ەرىكتى شەكتەۋلەر رەجيمىنەن جوسپارلانعان مەرزىمنەن ءبىر جىل بۇرىن — 2025 جىلدىڭ قىركۇيەگىنىڭ سوڭىندا، ياعني 2026 جىلعا دەيىن كۇتپەي-اق شىعا الادى. الايدا، نارىقتاعى جاعداي كۇرت ناشارلاسا، بۇل پروسەسس توقتاتىلۋى نەمەسە مۇلدە جويىلۋى مۇمكىن.
نارىققا قاتىسۋشىلار يكەمدىلىكتى ساقتاۋ ولارعا نارىقتىڭ اۋىتقۋلارىنا تەزىرەك بەيىمدەلۋگە جانە 2024 جىلدىڭ قاڭتارىنان باستاپ جيناقتالعان ارتىق ءوندىرىس كولەمىن وتەۋ بويىنشا مىندەتتەمەلەردى ورىنداۋعا مۇمكىندىك بەرەتىنىن اتاپ ءوتتى. مونيتورينگ JMMC ۋاعدالاستىقتارىنىڭ ورىندالۋىن باقىلاۋدى قوسا العاندا، بۇرىن كەلىسىلگەن وپەك+ تەتىكتەرى شەڭبەرىندە جۇرگىزىلەتىن بولادى.
سەگىز ەلدىڭ كەلەسى كەزدەسۋى 2025 جىلدىڭ 7 قىركۇيەگىندە وتەدى. ونىڭ قورىتىندىسى بويىنشا وپەك+ ەلدەرى نارىقتىڭ جاي-كۇيىن جانە اعىمداعى شارالاردىڭ تيىمدىلىگىن باعامدايدى.
وپەك+ مالىمەتىنشە، قىركۇيەك ايىندا ەڭ جوعارى كۆوتالار كەلەسى ەلدەرگە بولىنبەك:
- ساۋد ارابياسى – 9،978 ملن بارر./تاۋلىك،
- رەسەي – 9،449 ملن،
- يراك – 4،220 ملن،
- ءباا – 3،375 ملن،
- كۋۆەيت – 2،548 ملن،
- الجير – 959 مىڭ،
- ومان – 801 مىڭ.
