ۇلتتىق قور قاراجاتى ماقساتسىز پايدالانىلعان نەمەسە ەسەپتى جىل ىشىندە يگەرىلمەگەن جاعدايدا ونى قايتارۋدىڭ جاڭا رەگلامەنتى قابىلداندى. بۇل جۇمىس جوعارى اۋديتورلىق پالاتانىڭ ۇسىنىمى بويىنشا جۇزەگە اسىرىلدى، دەپ حابارلايدى Dalanews.kz.
بۇعان دەيىن جوعارى اۋديورلىق پالاتا 2019-2021 جىلدار ارالىعىندا ۇلتتىق قوردان بولىنگەن نىسانالى ترانسفەرتتەردىڭ تيىمدىلىگىنە اۋديت جۇرگىزگەن. اۋديت قورىتىندىسى بويىنشا قازاقستان رەسپۋبليكاسىنىڭ ۇكىمەتىنە مىناداي ۇسىنىمدار بەرىلدى:
- قاراجات رۇقسات ەتىلمەگەن باعىتتارعا جۇمسالعان جاعدايدا ونى قايتارۋ قاعيدالارىن بەكىتۋ؛
- پايدالانىلماعان قاراجاتتى قايتارۋ مەرزىمى مەن ءتارتىبىن ناقتىلاۋ ءۇشىن ءتيىستى قاۋلىعا وزگەرىستەر ەنگىزۋ؛
- نىسانالى ماقساتتا پايدالانىلعاننان كەيىن قايتا قولدانۋعا جول بەرمەۋ ءۇشىن بيۋدجەتتىك كرەديتتەر مەن وبليگاسيالىق قارىزدار تۇرىندە بەرىلگەن قاراجاتتى قايتارۋ مەحانيزمىن ازىرلەۋ.
"ناتيجەسىندە بيۋدجەت كودەكسىنە قاجەتتى تۇزەتۋلەر ەنگىزىلدى. بيىل 2 شىلدەدە ۇلتتىق قورمەن جۇمىس ءتارتىبىن جاڭارتاتىن ۇكىمەت قاۋلىسى قابىلداندى"، دەلىنگەن جوعارى اۋديتورلىق پالاتا حابارلاماسىندا.
سونىمەن قاتار قارجى مينيسترلىگى 2025 جىلعا ارنالعان ءبىرقاتار بۇيرىق شىعاردى، اتاپ ايتقاندا:
- بيۋدجەتتى اتقارۋ جانە ونىڭ كاسسالىق قىزمەت كورسەتۋ قاعيدالارى؛
- قازىناشىلىق اتقارۋ جانە ەسەپكە الۋ راسىمدەرى؛
- ءبىرىڭعاي بيۋدجەتتىك سىنىپتاما؛
- بيۋدجەت تۇسىمدەرىن ءارتۇرلى دەڭگەيدەگى بيۋدجەتتەر، ۇلتتىق قور شوتتارى، بيۋدجەتتەن تىس قورلار جانە ەاەو ەلدەرىنىڭ بيۋدجەتتەرى اراسىندا ءبولۋ ءتارتىبى.
مەملەكەت باسشىسى قاسىم-جومارت توقايەۆ ۇلتتىق قور رەسۋرستارىن ءتيىمدى پايدالانۋ ماسەلەلەرىنە باسا نازار اۋدارادى. پرەزيدەنتتىڭ تاپسىرماسى بويىنشا بيىل ۇلتتىق قوردان بولىنگەن قاراجاتتىڭ جۇمسالۋىن مونيتورينگتەۋ جونىندەگى كوميسسيانىڭ جۇمىسى قايتا ۇيىمداستىرىلدى. قازىرگى ۋاقىتتا بۇل كوميسسيا جوعارى اۋديتورلىق پالاتانىڭ جانىندا جۇمىس ىستەيدى. كوميسسيانىڭ جۇمىس فورماتى مەن قۇرامى مەملەكەت باسشىسى قويعان وزەكتى مىندەتتەردى ەسكەرە وتىرىپ جاڭارتىلدى.
