ۇلتتىق قاۋىپسىزدىك كوميتەتىنىڭ سىبايلاس جەمقورلىققا قارسى ءىس-قيمىل قىزمەتى كولىك ۆيسە-مينيسترى ءساتجان ابلالييەۆ ۇستالعانىن راستادى، دەپ حابارلايدى Dalanews.kz.
"ۇلتتىق قاۋىپسىزدىك كوميتەتىنىڭ سىبايلاس جەمقورلىققا قارسى ءىس-قيمىل قىزمەتى قازاقستان رەسپۋبليكاسىنىڭ كولىك ۆيسە-مينيسترىن پارا الدى دەگەن كۇدىكپەن ۇستاپ، سوت سانكسياسىمەن قاماۋعا الدى"، - دەپ جازىلعان حابارلامادا.
الدىن الا بولجام بويىنشا شەنەۋنىك اقشانى ۇلىبريتانياداعى ۇلىنىڭ وقۋىنا جۇمساعان. تەرگەۋشىلەردىڭ پايىمىنشا، پارا رەسپۋبليكالىق اۆتوجول قۇرىلىسىنا تەح.باقىلاۋ جۇرگىزگەن كومپانيالارعا جاسالعان قامقورلىقتىڭ وتەۋى رەتىندە بەرىلگەن.
بۇعان دەيىن پارا سوماسى 78 مىڭ دوللاردى قۇراعانى تۋرالى اقپارات تاراعان ەدى.
ءساتجان ابلالييەۆ جول سالاسىنىڭ مامانى، تەحنيكا عىلىمدارىنىڭ كانديداتى، 30-عا تارتا عىلىمي جۇمىستىڭ اۆتورى. "قۇرمەت" وردەنى، "ەرەن ەڭبەگى ءۇشىن" جانە "تاۋەلسىزدىككە 25 جىل" مەدالىمەن ماراپاتتالعان. "كولىك سالاسىنىڭ قۇرمەتتى قايراتكەرى" اتاعى جانە بار.
ۇزاق جىل كولىك جانە جول قۇرىلىسى سالاسىندا لاۋازىمدى قىزمەت اتقارىپ، سقو اكىمىنىڭ ورىنباسارى بولعان. 2023 جىلى قازاننان باستاپ كولىك ۆيسە-مينيسترى قىزمەتىن اتقارىپ كەلگەن.
قىزمەتكە كەلگەسىن ءبىرقاتار باستاما كوتەرىپ، جۇڭگو مەن ەۋروپا اراسىنداعى جۇك تاسىمالىنىڭ ۋاقىتىن قىسقارتۋدى كوزدەگەن. ەلدەگى مىڭداعان شاقىرىم جولدىڭ ساپاسىن ارتتىرۋعا ارنالعان جوبالاردى قولعا الىپ، حالىقارالىق ستاندارتقا ساي جول قاۋىپسىزدىگىن نىعايتۋ باعدارلاماسىن ەنگىزۋدى جوسپارلاعان بولاتىن.
ابلالييەۆ بىلتىر وتاندىق اۋە كومپانيالارى دومبىرانى ۇشاق ىشىندە تاسۋعا تىيىم سالعان كەزدە قوعام سىنىنا ۇشىراعان. ول ەرەجەنى قايتا قاراۋعا ۋادە ەتكەن ەدى.
