ق ر ىشكى ىستەر ءمينيسترى قالمۇحامبەت قاسىموۆتىڭ ءماجىلىستىڭ دۇيسەنبى كۇنگى جالپى وتىرىسىندا قازاقشا قويىلعان سۇراققا ورىسشا جاۋاپ بەرگەنى جوعارى لاۋازىمدى تۇلعالار تاراپىنان مەملەكەتتىك تىلگە دەگەن قۇرمەتتىڭ الدەقاشان جوعالعانىن كورسەتىپ بەردى. دالىرەك ايتقاندا، ءماجىلىستىڭ سۋ جاڭا ءھام ەڭ جاس دەپۋتاتى سانالاتىن گەنناديي شيپوۆسكيح جاسوسپىرىمدەر اراسىنداعى قىلمىس دەڭگەيىنە الاڭداۋشىلىق ءبىلدىرىپ بىلايشا (تازا قازاق تىلىندە) سۇراق قويعان بولاتىن.

- سوڭعى 8 جىلدىڭ كولەمىندە رەسپۋبليكا بويىنشا ۋاقىتشا وقشاۋلاۋ ورتالىعى، بەيىمدەلۋ مەكەمەلەرىنە 70 مىڭنان استام كامەلەتتىك جاسقا تولماعان جاسوسپىرىمدەر جەتكىزىلدى. سىزگە سۇراعىم، وسى كورسەتكىشتەردى ازايتۋ ءۇشىن قازىرگى كەزدە ناقتى قانداي ءىس-شارالار قولدانىپ جاتىرسىزدار؟

مىنە، وسىناۋ قاراپايىم عانا سۇراقتى گەناداي وتانداسى وزىنە ارناپ، ءوزىنىڭ انا تىلىندە جولداعانىنا قاراماستان مينيستر قاسىموۆ قازاقشا جاۋاپ بەرۋگە كەلگەندە جالت بەردى. جاۋابىنىڭ سيقى سوزبە-سوز كەلتىرگەندە بىلاي بولىپ شىقتى:

“سۇراققا راحمەت! رۇقسات بولسا، مەن ورىسشا جاۋاپ بەرەيىن. يا سكازال، چتو نام نادو زانيماتسيا. كاكيە شكولى نام نادو رەشات. ۆسەگو ۋ ناس 8 ۋچەبنىح زاۆەدەنيي ي ۆسەگو ودنا سپەسشكولا دليا تەح، كتو سوۆەرشيل پرەستۋپلەنيە”، – دەدى ىشكى ىستەر ءمينيسترى. (تولىق سىلتەمەسى qazaquni.kz)

ارينە، مينيستر قاسىموۆتىڭ ءماجىلىس دەپۋتاتتارى الدىندا تالاي وزەكتى ساۋالعا تياناقتى جاۋاپ بەرىپ، ءوز سالاسىندا اتقارىلعان جۇمىستارىنان حاباردار ەتكەندىگى راس. ءبىراق، وسى ءبىر كىشكەنتاي عانا كورىنىس ونىڭ قازاق شەندىلەرىنىڭ ىشىندە ءوز تۋعان تىلىنە دەگەن قۇرمەتتەن ماقۇرىم جاراتىلعان «ءمىزباقپاس مينيستر» ەكەندىگىن تانىتىپ، بۇكىل جۇمىسىنان ءتۇڭىلدىرىپ جىبەردى. سىرتقى ىستەر ءمينيسترى ىدىرىسوۆتىڭ بىرنەشە ءتىل بىلگەنىمەن، قازاق تىلىنەن حابارسىزدىعى تالاي سىنعا الىنىپ جۇرگەندە، ىشكى ىستەر ءمينسيترىنىڭ بۇل قىلىعى «مۇرتقا وكپەلەپ جۇرگەندە ساقال شىقتىنى» ەسكە ءتۇسىردى. بارىنەن دە شىمبايعا باتقانى قازاق تىلىندە ساۋال جولداعان ورىس شيپوۆسكيح عۇرلى تۇيسىگىنىڭ بولماعانى جاۋاپ بەرۋ دەڭگەيىنە قاراپ «كۇيسەگەنىڭدى ۇرايىن» دەمەسكە لاجىڭ قالمايدى ەكەن. بۇل ءبىر.

ەكىنشىدەن ەلباسى نۇرسۇلتان نازاربايەۆ وسىدان ءبىراز ۋاقىت بۇرىن عانا وتكەن قازاقستان حالقى اسسامبلەياسىنىڭ سەسسياسىندا ورىس تىلىندە جولدانعان سۇراققا سول تىلدە جاۋاپ بەرۋ كەرەكتىگىن، ويتپەگەن جاعدايدا (ماسەلەن، جاۋاپتى قازاق تىلىندە جولداسا) كەز كەلگەن لاۋازىمدى تۇلعانىڭ قىزمەتىمەن قوش ايتىساتىنىن قاتال ەسكەركەنى بەلگىلى. ءتىپتى، بۇل الەۋمەتتىك جەلىلەردە ەكىۇداي پىكىر تۋعىزىپ، اقىرى سول كەزدەگى پرەزيدەنتتىڭ باسپا ءسوز حاتشىسى، بۇگىنگى اقپارات جانە كوممۋنيكاسيا ءمينيسترى داۋرەن ابايەۆتىڭ ارنايى تۇسىنىك بەرۋىمەن ءوز ءجونىن تاپقان بولاتىن. ال مۇنداي جاعدايدا قالاي بولار ەكەن؟! مينيسترگە مەملەكەتتىك تىلدە سۇراق قويعان گەنناديگە رەسمي تىلدە جاۋاپ بەرگەن (سول تىلدە ەمەس!) قاسىموۆتىڭ قىزمەتىمەن قوش ايتىسۋى مۇمكىن بە؟! ءاي، قايدام... ويتكەنى، قازاق تىلىندە مالىمدەمە جاساۋ تۇرماق، قازاقشا ارىپتەردىڭ باسىن قوسىپ ارەڭ وقيتىن پرەمەر ءماسىموۆتىڭ ءوزى وسىنداي «ۇلگى كورسەتىپ» وتىرعاندا قاراماعىنداعى ىشكى ىستەر ءمينيسترى قالمۇحامبەت قاسىموۆتىڭ قازاق تىلىندە قامشى سالدىرماي جاۋاپ قاتۋ ەكىتالاي دۇنيە. ال، شيپوۆسكيح سياقتى تاۋەلسىزدىكتىڭ جاڭا بۋىنىنا مىڭ العىس، ارينە!

ءساتجان قاسىمجان ۇلى،

شىعىس قازاقستان وبلىسى.