جاڭا احمەر كەنتىندە ورنالاسقان حالىق قاھارمانى، پارتيزان-جازۋشى قاسىم قايسەنوۆ اتىنداعى 27943 اسكەري بولىمىندە ۇلى جەڭىستىڭ 80 جىلدىعى مەن وتان قورعاۋشىلار كۇنىنە ارنالعان «SHYGYS AIBYN – 2025» اتتى وبلىستىق اسكەري-پاتريوتتىق جاستار جيىنى ءوتتى.
بيىلعى جيىننىڭ ەرەكشەلىگى – ونىڭ ءدال وسى اسكەري بولىمگە قاسىم قايسەنوۆتىڭ ەسىمى بەرىلگەن كۇنمەن تۇسپا-تۇس كەلۋى. وسىعان وراي، شارانىڭ اشىلۋ سالتاناتىنا شقو اكىمىنىڭ ورىنباسارى ەربول نۇرعالييەۆ قاتىسىپ، وبلىس اكىمىنىڭ اتىنان قاتىسۋشىلاردى قۇتتىقتاپ، كوماندالارعا ساتتىلىك تىلەدى. سونداي-اق باتىردىڭ ەسكەرتكىشىنە گۇل شوقتارى قويىلىپ، مايدانگەرلەر رۋحىنا تاعزىم ەتىلدى.
– بۇل اسكەري بولىمگە اتى اڭىزعا اينالعان باتىر اتامىزدىڭ ەسىمى بەرىلۋى – ساربازداردىڭ موينىنا ۇلكەن جاۋاپكەرشىلىك جۇكتەيدى. سوندىقتان قاسىم اتامىزدىڭ اتىن ۇياتقا قالدىرماي، ءوز بورىشتارىڭىزدى ابىرويمەن وتەپ، كاسىبي شەبەرلىكتەرىڭىزدى شىڭداي تۇسۋلەرىڭىزگە تىلەكتەسپىن. قاتارىمىز ەرجۇرەك، باتىل، ايبىندى ساربازدارمەن تولىعا بەرسىن! بارشاڭىزدى ۇلى جەڭىستىڭ 80 جىلدىعىمەن جانە وتان قورعاۋشىلار كۇنىمەن قۇتتىقتايمىن! – دەدى ەربول نۇرعالييەۆ.
جيىندا باتىردىڭ نەمەرەسى باعلان رايىمحانوۆ پەن ق ر قارۋلى كۇشتەرىنىڭ ارداگەرى داۋلەتحان قاسەنوۆ جاستارعا رۋحتى ءسوز ارناپ، اسكەري بورىشتىڭ ماڭىزدىلىعىن اتاپ ءوتتى.
– اسكەري ءومىر قانشالىقتى قيىن بولسا دا، جارعى تالاپتارىن ورىنداۋ – ءار جاۋىنگەردىڭ پارىزى. سىزدەردىڭ مىندەتتەرىڭىز – جۇكتەلگەن تاپسىرمالاردى جاۋاپكەرشىلىكپەن اتقارۋ، تۋعان جەرگە ادال قىزمەت ەتۋ، – دەدى ولار.
جيىنعا وبلىستىڭ ءار تۇكپىرىنەن كەلگەن اسكەري-پاتريوتتىق كلۋبتار قاتىستى. اتاپ ايتقاندا: ريددەرلىك «سۇڭقار»، زايساننان «جاس قىران»، التايلىق «سۇڭقار»، كاتونقاراعايلىق «قالقان»، گلۋبوكوە اۋدانىنىڭ «جاس سارباز»، شەمونايحادان «پاتريوت»، تارباعاتايلىق «ارلان»، سامار اۋدانىنان «قىران»، مارقاكولدەن «جاس سارباز»، ۇلان اۋدانىنان «ايبىن»، كۇرشىم اۋدانىنان «قىران»، ۇلكەن نارىننىڭ «اتامەكەن» كوماندالارى.
– ءبىز ۇلان اۋدانىنان كەلدىك. بۇگىن بۇل بولىمگە قاسىم اتامىزدىڭ ەسىمى بەرىلگەن كۇن ەكەن. جەڭىسكە جەتۋگە بار كۇشىمىزدى سالامىز. ءوزىم ەستافەتالىق ويىندارعا قاتىسىپ، تۋرنيككە تارتىلۋ سايىسىنا دايىنمىن. اقتوبەدە وتەتىن رەسپۋبليكالىق كەزەڭگە جولداما الۋعا نيەتتىمىز، – دەدى ۇلاندىق «ايبىن» كومانداسىنىڭ مۇشەسى نۇركەن الىبەكوۆ.
ءداستۇرلى جيىن شقو اكىمدىگىنىڭ ۇيىمداستىرۋىمەن، «AMANAT» پارتياسىنىڭ وبلىستىق فيليالى، 27943 اسكەري ءبولىم باسشىلىعى جانە «جاس سارباز» اسكەري-پاتريوتتىق قوزعالىسىنىڭ وبلىستىق فيليالىنىڭ قولداۋىمەن ءوتتى.
جارىس اياسىندا قاتىسۋشىلار اراسىندا اسكەري-سپورتتىق، زياتكەرلىك جانە شىعارماشىلىق باعىتتار بويىنشا سايىستار ءوتتى. قارۋ جيناۋ، اسكەري-قولدانبالى سپورت تۇرلەرى، ارقان تارتۋ جانە ەستافەتا سەكىلدى جارىستاردا جاستار شەبەرلىكتەرىن كورسەتتى.
ناتيجەسىندە التاي اۋدانىنىڭ «سۇڭقار» اسكەري-پاتريوتتىق كلۋبى ءى ورىندى جەڭىپ الدى. ءىى ورىن – وسكەمەن قالاسىنىڭ «ارىستان» قۇراما كومانداسىنا، ءىىى ورىن – ريددەر قالاسىنىڭ «سۇڭقار» قۇراما كومانداسىنا بۇيىردى.
