Jańa Ahmer kentinde ornalasqan Halyq qaharmany, partizan-jazýshy Qasym Qaisenov atyndaǵy 27943 áskeri bóliminde Uly Jeńistiń 80 jyldyǵy men Otan qorǵaýshylar kúnine arnalǵan «SHYGYS AIBYN – 2025» atty oblystyq áskeri-patriottyq jastar jiyny ótti.
Biylǵy jiynnyń ereksheligi – onyń dál osy áskeri bólimge Qasym Qaisenovtiń esimi berilgen kúnmen tuspa-tus kelýi. Osyǵan orai, sharanyń ashylý saltanatyna ShQO ákiminiń orynbasary Erbol Nurǵaliev qatysyp, oblys ákiminiń atynan qatysýshylardy quttyqtap, komandalarǵa sáttilik tiledi. Sondai-aq batyrdyń eskertkishine gúl shoqtary qoiylyp, maidangerler rýhyna taǵzym etildi.
– Bul áskeri bólimge aty ańyzǵa ainalǵan batyr atamyzdyń esimi berilýi – sarbazdardyń moinyna úlken jaýapkershilik júkteidi. Sondyqtan Qasym atamyzdyń atyn uiatqa qaldyrmai, óz boryshtaryńyzdy abyroimen ótep, kásibi sheberlikterińizdi shyńdai túsýlerińizge tilektespin. Qatarymyz erjúrek, batyl, aibyndy sarbazdarmen tolyǵa bersin! Barshańyzdy Uly Jeńistiń 80 jyldyǵymen jáne Otan qorǵaýshylar kúnimen quttyqtaimyn! – dedi Erbol Nurǵaliev.
Jiynda batyrdyń nemeresi Baǵlan Raiymhanov pen QR Qarýly kúshteriniń ardageri Dáýlethan Qasenov jastarǵa rýhty sóz arnap, áskeri boryshtyń mańyzdylyǵyn atap ótti.
Jiynǵa oblystyń ár túkpirinen kelgen áskeri-patriottyq klýbtar qatysty. Atap aitqanda: Ridderlik «Suńqar», Zaisannan «Jas qyran», Altailyq «Suńqar», Katonqaraǵailyq «Qalqan», Glýbokoe aýdanynyń «Jas sarbaz», Shemonaihadan «Patriot», Tarbaǵatailyq «Arlan», Samar aýdanynan «Qyran», Marqakólden «Jas sarbaz», Ulan aýdanynan «Aibyn», Kúrshim aýdanynan «Qyran», Úlken Narynnyń «Atameken» komandalary.
– Biz Ulan aýdanynan keldik. Búgin bul bólimge Qasym atamyzdyń esimi berilgen kún eken. Jeńiske jetýge bar kúshimizdi salamyz. Ózim estafetalyq oiyndarǵa qatysyp, týrnikke tartylý saiysyna daiynmyn. Aqtóbede ótetin respýblikalyq kezeńge joldama alýǵa niettimiz, – dedi ulandyq «Aibyn» komandasynyń múshesi Nurken Álibekov.
Dástúrli jiyn ShQO ákimdiginiń uiymdastyrýymen, «AMANAT» partiiasynyń oblystyq filialy, 27943 áskeri bólim basshylyǵy jáne «Jas sarbaz» áskeri-patriottyq qozǵalysynyń oblystyq filialynyń qoldaýymen ótti.
Jarys aiasynda qatysýshylar arasynda áskeri-sporttyq, ziiatkerlik jáne shyǵarmashylyq baǵyttar boiynsha saiystar ótti. Qarý jinaý, áskeri-qoldanbaly sport túrleri, arqan tartý jáne estafeta sekildi jarystarda jastar sheberlikterin kórsetti.
Nátijesinde Altai aýdanynyń «Suńqar» áskeri-patriottyq klýby I oryndy jeńip aldy. II oryn – Óskemen qalasynyń «Arystan» qurama komandasyna, III oryn – Ridder qalasynyń «Suńqar» qurama komandasyna buiyrdy.
