ونىڭ ايتۋىنشا مۇنىڭ ارتىندا ەل ىشىنە ىرىتكى سالعىسى كەلەتىن ارانداتۋشىلار تۇر.
"ءقازىر مەملەكەت اۋقىمدى جۇمىس جۇرگىزىپ جاتىر.
پرەزيدەنت اكىمشىلىگى، ۇكىمەت پەن اكىمدىكتەر - ۇلكەن شتاب. ادامدار جۇمىسىندا قونادى دەپ ايتۋعا بولادى.
سوندىقتان جالعان اقپاراتقا سەنبەۋگە شاقىرامىن. وزدەرىڭىزدى دە، ءبىزدى دە ءتۇرلى سىبىستارعا بايلانىستى جۇمىستان بولمەڭىز"، - دەپ جازدى ول Facebook-تەگى پاراقشاسىندا.
بۇعان دەيىن جۋرناليست گۇلنار باجكەنوۆا وزىنە "پرەزيدەنت وتستاۆكاعا كەتەتىنى" تۋرالى حابار جەتكەنىن جازعان بولاتىن.
ەسكە سالا كەتسەك، قاسىم-جومارت توقايەۆ 2019 جىلدىڭ 20 ناۋرىزىندا قازاقستان پرەزيدەنتى قىزمەتىنە كىرىستى. 19 ناۋرىزدا نۇرسۇلتان نازاربايەۆ وكىلەتتىگىن توقتاتقان ەدى.
بۇدان بۇرىن پرەزيدەنت كەڭەسشىسى "تاۋەلسىزدىك پەن ەل تۇتاستىعىنان ەشنارسە جوعارى ەمەس" دەگەن پىكىر بىلدىرگەن.
"قازاق ساياساتىنىڭ ءبىر ەرەكشەلىگى – بيلىكشىل نەمەسە وپپوزيسياشىل، وڭشىل نەمەسە سولشىل بولسىن، ساياساتتا جۇرگەن تۇلعالاردى مەملەكەتشىل نەمەسە مەملەكەتشىل ەمەس دەپ باعالايمىز.
بۇل نەنى اڭعارتادى؟ بۇل قوعامدا سونداي ۇستانىمنىڭ بارىن كورسەتەدى.
ياعني، ەگەر قوعام بەلگىلى ءبىر تۇلعالار بيلىكتىڭ قاي جاعىندا جۇرسە دە، وعان مەملەكەتشىل دەپ باعا بەرسە، وندا ءاربىر قاراپايىم ازامات بۇل تۇلعادان مەملەكەتتىلىك قۇندىلىقتارعا بەرىك بولعانىن قالايتىندىعىندا.
وسىنداي ۇستانىم ساقتالا بەرسە، ءبىز ءارقاشاندا مەملەكەت بولىپ قالا بەرەمىز. قازاقتىڭ جەرى اقىرزامانعا دەيىن قازاقتىڭ جەرى بولىپ قالادى"، – دەگەن بولاتىن ەرلان قارين.
