جوعارعى سوت "ءبىز بىرگەمىز" قايىرىمدىلىق قورى ارقىلى اناسىمەن بىرگە ءىرى كولەمدە قاراجات جىمقىردى دەگەن كۇدىككە ىلىنگەن پەريزات قايراتقا قاتىستى سوت وتىرىسىن ونلاين كورسەتۋ ماسەلەسى سۇرانىس بولعان جاعدايدا قاراستىرىلۋى مۇمكىن ەكەنىن مالىمدەدى، دەپ حابارلايدى Dalanews.kz قازاقپاراتقا سىلتەمە جاساپ.
ۆەدومستۆونىڭ رەسمي جاۋابىندا اتاپ وتىلگەندەي، قازىرگى تاڭدا پەريزات قايراتقا قاتىستى قىلمىستىق ءىس سوتقا تۇسپەگەن. الايدا ءىس سوت قاراۋىنا بەرىلگەن جاعدايدا جانە قوعام تاراپىنان، سونىڭ ىشىندە زاڭگەرلەر مەن قۇقىق قورعاۋشىلار تاراپىنان تىكەلەي ەفيردە كورسەتۋدى سۇراعان وتىنىشتەر تۇسسە، بۇل ماسەلە تالقىلاناتىنى ايتىلعان.
ەسكە سالايىق، بۇعان دەيىن قارجىلىق مونيتورينگى اگەنتتىگى پەريزات قايرات پەن ونىڭ اناسى گايني الاشبايەۆاعا قاتىستى الاياقتىق جانە قىلمىستىق جولمەن الىنعان اقشا مەن مۇلىكتى زاڭداستىرۋ فاكتىلەرى بويىنشا سوتقا دەيىنگى تەرگەپ-تەكسەرۋدى اياقتادى.
2025 جىلعى 19 ناۋرىزدا تاراپتار 109 تومنان تۇراتىن قىلمىستىق ءىس ماتەريالدارىمەن تانىسۋعا كىرىستى.
بۇعان دەيىن حابارلانعانداي، زالال سوماسى 3،5 ملرد تەڭگەنى قۇرادى.
ۇرلانعان قاراجاتقا ساتىپ الىنعان 865 ملن تەڭگە كولەمىندەگى مۇلىككە تىيىم سالىندى.
قىلمىستىق ءىس ايىپتاۋ اكتىسىن بەكىتۋ جانە سوتقا جولداۋ ءۇشىن باس پروكۋراتۋراعا بەرىلدى.
