باتىس قازاقستان وبلىسىندا «جايىق جاستارى» تۇرعىن ءۇي باعدارلاماسى جالعاساتىن بولدى. ايماقتىق باعدارلاما بۇعان دەيىن 106 جاس تۇرعىننىڭ باسپانالى بولۋىنا كومەكتەستى. وسى باعدارلامانىڭ ارقاسىندا الەۋمەتتىك ماڭىزى بار ماماندىقتاردىڭ يەلەرى – مەديسينا، مادەنيەت، سپورت سالاسىنىڭ قىزمەتكەرلەرى، مۇعالىمدەر، كوممۋنالدىق كاسىپورىنداردىڭ جۇمىسشىلارى، قۇقىق قورعاۋشىلار، قۇتقارۋشىلار، جۋرناليستەر پاتەر يەلەرى اتاندى، دەپ حابارلايدى Dalanews.kz
– باعدارلاما – جاستاردى قولجەتىمدى باسپانامەن قامتاماسىز ەتۋ باعىتىندا ءتيىمدى شارتتارمەن جۇزەگە اسىرىلاتىن بىردەن-بىر وڭىرلىك جوبا. سوندىقتان وسى باعدارلامانى ودان ءارى جالعاستىرۋ قاجەت ەكەندىگىنە كوزىمىز جەتتى. 2024 جىلى «جايىق جاستارى» تۇرعىن ءۇي باعدارلاماسى اياسىندا 40 جاستى باسپانامەن قامتۋ جوسپارلانىپ، ءىس جۇزىندە 41 جاس باسپانالى بولدى. بيىل ناۋرىز ايىندا باعدارلاما جالعاسىن تاۋىپ، ەلەكتروندى سايت ارقىلى وتىنىمدەر قابىلداندى. قازىرگى كەزگە دەيىن 70-كە جۋىق جاس باسپانالى بولدى. وسى باعىتتاعى يگى جۇمىستاردى جالعاستىرۋ ماقساتىندا باعدارلامانىڭ بيىلعى ەكىنشى لەگىن باستاعالى وتىرمىز. بۇل ماقساتقا 1 323 ملن تەڭگە ءبولىندى، – دەدى بقو قوعامدىق دامۋ باسقارماسىنىڭ باسشىسى دارحان قادىرالييەۆ.
وڭىردە «جايىق جاستارى» تۇرعىن ءۇي باعدارلاماسى «وتباسى بانك» ارقىلى جۇزەگە اسىرىلۋدا. باعدارلامانىڭ تالاپتارى مەن شارتتارى، سونداي-اق ءوتىنىم قابىلداۋعا ارنالعان ارنايى سايت – qr.gov.kz ارقىلى قولجەتىمدى. قازىرگى ەرەجەگە سايكەس، تۇرعىن ءۇيدىڭ ەڭ جوعارى قۇنى 18 ملن تەڭگە، نەسيەنىڭ مەرزىمى – 19 جىلعا دەيىن، پايىزدىق مولشەرلەمە – 5%(جىلدىق شىعىنى 5،2%-دان 5،7%-عا دەيىن). ال باستاپقى جارنا – 10%،ياعني باعدارلاماعا ءوتىنىم بەرۋ ءۇشىن «وتباسى بانك» شوتىڭىزدا كەمىندە 1 800 000 تەڭگە بولۋى ءتيىس. بۇل سوما قاتىسۋشىعا 1 ۇپاي رەتىندە ەسەپتەلەدى.
باعدارلاماعا ق ر ازاماتتىعى بار، 21–35 جاس ارالىعىنداعى جاستار قاتىسا الادى. ەگەر ەرلى-زايىپتى بولسا، ولاردىڭ بىرەۋى عانا ءوتىنىم بەرە الادى. سونىمەن قاتار، سوڭعى ءبىر جىل ىشىندە بقو اۋماعىندا تۇراقتى تىركەۋدە بولۋى، ءارى كەمىندە ءبىر جىل كولەمىندە زەينەتاقى اۋدارىمدارى جاسالۋى قاجەت. سوڭعى 5 جىل ىشىندە قاتىسۋشىنىڭ جانە وتباسى مۇشەلەرىنىڭ اتىندا تۇرعىن ءۇي بولماۋى شارت.
باعدارلاما اياسىندا تۇرعىن ءۇيدى ءبىرىنشى نەمەسە ەكىنشى نارىقتان ساتىپ الۋعا مۇمكىندىك بەرىلەدى.
باعدارلاما بويىنشا قۇجاتتار قابىلداۋ 20-31 قازانارالىعىندا باستالادى. قاي كەزەڭدە جانە قاي مەكەنجاي بويىنشا باعدارلاماعا قاتىسۋعا وتىنىشتەر قابىلداناتىنى تۋرالى جەرگىلىكتى اكىمدىك قوسىمشا حابارلايدى. ەڭ الدىمەن ءوتىنىم تاپسىرۋ ءۇشىن ەلەكتروندى سيفرلىق قولتاڭبا (ەسق) كەرەك بولادى. ءوتىنىم بەرۋ qr.gov.kzسايتىنا تىركەلۋ ارقىلى جۇزەگە اسادى.
وتكەن جىلى «جايىق جاستارى» باعدارلاماسىنا قاتىسىپ، ورال قالاسىنان ءۇش بولمەلى پاتەر الدىق. ءوزىم №5 مەكتەپتە ون جىلدان بەرى ءمۇعالىم بولىپ قىزمەت ەتەمىن. باسقا بانكتەرگە قاراعاندا «وتباسى بانك» نەسيەءسى ءتيىمدى. اتالعان باعدارلاما بويىنشا 5%-بەن 19 جىلعا نەسيە الدىم. ەكىنشى نارىقتاعى پاتەردى 17 ملن تەڭگەگە الدىم. ءقازىر اي سايىن 117 مىڭ تەڭگە تولەيمىن. جۇبايىم ەكەۋمىزءۇش بالامەن پاتەر جالداپ تۇردىق. ەندى پاتەراقى ەمەس، ءوز باسپانامىز ءۇشىن تولەيمىز. باسىندا دەپوزيت جيناۋعا دەگەن سەنىمسىزدىك بولدى. از-ماز دەپوزيتىمدى شەشىپ الىپ، جەكە كومپانيادان ءۇي الماقشى بولدىق. قىمباتقا شىعاتىن بولدى دا، جيناعىمدى قايتادان وسى بانككە دەپوزيتكە سالىپ، ەكى جىل بويى تۇراقتى اقشا سالىپ تۇردىم. ءبىز سەكىلدى قاراپايىم وتباسىلارعا «وتباسى بانك» ەڭ ءتيىمدى بانك دەگىم كەلەدى، – دەپ ورال قالاسىنىڭ تۇرعىنى، 33 جاستاعى تورعىن يمانبايەۆا ريزاشىلىعىن ءبىلدىردى.
