شىعىس قازاقستانعا جۇمىس ساپارمەن كەلگەن يندۋستريا جانە ينفراقۇرىلىمدى دامىتۋ ءمينيسترى بەيبىت اتامقۇلوۆ وبلىس اكىمى دانيال احمەتوۆپەن بىرگە وسكەمەن-تالدىقورعان، قالباتاۋ-مايقاپشاعاي باعىتىنداعى جول قۇرىلىسىمەن تانىستى دەپ حابارلايدى Dalanews.kz.
ۇزىندىعى 763 شاقىرىمدى قۇرايتىن كۇرە جول شىعىستاعى اياگوز، شىنقوجا،ۇشبيىك جانە الماتى وبلىسىنداعى قويلىق ەلدى-مەكەنىن اينالىپ وتەدى.
جول جوندەۋدى 3 مەردىگەر ۇيىم - "CITIC Cinstruction Co.Ltd" ءجشس-ى، "ك-دورستروي" جانە "Todini Central Asia" ءجشس-ى جۇرگىزۋدە.
جول قۇرىلىسىنىڭ ءبىر بولىگىن جوندەۋدى جاۋاپكەرشىلىگىنە العان "ك-دورستروي" ءجشس-ى باسشىسى ۆالەريي ءجۇماعازينوۆتىڭ ايتۋىنشا قۇرىلىس بارىسىندا جاڭا تەحنيكا قولدانىلعان. تاس جول شىعىستىڭ جازى ىستىق، قىسى سۋىق كليماتىن ەسكەرىپ توسەلگەن.
"جوبانى 2017 جىلدان بەرى جۇرگىزۋدەمىز. الدىمەن قۇرىلىس جۇرگىزەتىن ارالىقتى زەرتتەپ-زەردەلەپ الدىق. قۇرىلىس-مونتاج جۇمىسىنا بىلتىر كىرىستىك. ءبىرىنشى كەزەكتە ساپا ماسەلەسىن نازارعا الدىق. اتقارعان شارۋامىز شيكى بوپ جاتسا، اتىمىزعا سىن. سوندىقتان تاس جول ۇزاق جىلعا شىداس بەرەتىندەي بولۋى كەرەك. قۇرىلىس جۇمىسى تولىق اياقتالعاسىن بۇل جول 7-8 جىل بويىنا قيىندىق تۋعىزبايدى"، – دەيدى ول.
ەلدە توتەنشە جاعداي جاريالانعانىنا قاراماستان جول جوندەۋ جۇمىسى توقتاعان جوق. بارلىق ۋچاسكىدە جاۋاپتى ۇيىمدار جول توسەۋدى جالعاستىرۋدا.
"ۇكىمەت جول قۇرىلىسىنا قىرۋار قاراجات باعىتتاۋدا. بيىل قازاقستان بويىنشا 4 مىڭ شاقىرىمعا تارتا جول جوندەلەدى. 2021 جىلعا دەيىن 2،6 مىڭ شاقىرىمدى قۇرايتىن جول قۇرىلىسى اياقتالادى. ايتا كەتەرلىگى شىعىس قازاقستان جول جوندەۋدە كوش باسىندا كەلەدى. ونىڭ ۇستىنە بۇل سالا جۇزدەگەن، مىڭداعان ادامدى جۇمىسپەن قامتىپ وتىر، – دەدى ءوز كەزەگىندە يندۋستريا جانە ينفراقۇرىلىمدى دامىتۋ ءمينيسترى بەيبىت اتامقۇلوۆ.
وسكەمەن-تالدىقورعان كۇرە جولى 2021 جىلى پايدالانۋعا بەرىلمەك.
قالباتاۋ-مايقاپشاعاي جولىن جوندەۋدى قىتايدىڭ "سينسين" كومپانياسىمەن بىرلەسىپ "قازگەرستروي" ءجشس-ى موينىنا العان. بۇل جولدىڭ ۇزىنداعى 415 شاقىرىم. جاڭا جول ەكى ارالىقتاعى جولعا جۇمسالاتىن ۋاقىتتى ەكى ەسە قىسقارتىپ، كولىك اعىنىن جيىلەتپەك. بۇل ۋچاسكىنىڭ قۇرىلىسى 2022 جىلى اياقتالادى.
