Shyǵys Qazaqstanǵa jumys saparmen kelgen Indýstriia jáne infraqurylymdy damytý ministri Beibit Atamqulov oblys ákimi Danial Ahmetovpen birge Óskemen-Taldyqorǵan, Qalbataý-Maiqapshaǵai baǵytyndaǵy jol qurylysymen tanysty dep habarlaidy Dalanews.kz.
Uzyndyǵy 763 shaqyrymdy quraityn kúre jol Shyǵystaǵy Aiagóz, Shynqoja,Úshbiik jáne Almaty oblysyndaǵy Qoilyq eldi-mekenin ainalyp ótedi.
Jol jóndeýdi 3 merdiger uiym - "CITIC Cinstruction Co.Ltd" JShS-i, "K-Dorstroi" jáne "Todini Central Asia" JShS-i júrgizýde.
Jol qurylysynyń bir bóligin jóndeýdi jaýapkershiligine alǵan "K-Dorstroi" JShS-i basshysy Valerii Jumaǵazinovtiń aitýynsha qurylys barysynda jańa tehnika qoldanylǵan. Tas jol Shyǵystyń jazy ystyq, qysy sýyq klimatyn eskerip tóselgen.
"Jobany 2017 jyldan beri júrgizýdemiz. Aldymen qurylys júrgizetin aralyqty zerttep-zerdelep aldyq. Qurylys-montaj jumysyna byltyr kiristik. Birinshi kezekte sapa máselesin nazarǵa aldyq. Atqarǵan sharýamyz shiki bop jatsa, atymyzǵa syn. Sondyqtan tas jol uzaq jylǵa shydas beretindei bolýy kerek. Qurylys jumysy tolyq aiaqtalǵasyn bul jol 7-8 jyl boiyna qiyndyq týǵyzbaidy", – deidi ol.
Elde tótenshe jaǵdai jariialanǵanyna qaramastan jol jóndeý jumysy toqtaǵan joq. Barlyq ýchaskide jaýapty uiymdar jol tóseýdi jalǵastyrýda.
"Úkimet jol qurylysyna qyrýar qarajat baǵyttaýda. Biyl Qazaqstan boiynsha 4 myń shaqyrymǵa tarta jol jóndeledi. 2021 jylǵa deiin 2,6 myń shaqyrymdy quraityn jol qurylysy aiaqtalady. Aita keterligi Shyǵys Qazaqstan jol jóndeýde kósh basynda keledi. Onyń ústine bul sala júzdegen, myńdaǵan adamdy jumyspen qamtyp otyr, – dedi óz kezeginde Indýstriia jáne infraqurylymdy damytý ministri Beibit Atamqulov.
Óskemen-Taldyqorǵan kúre joly 2021 jyly paidalanýǵa berilmek.
Qalbataý-Maiqapshaǵai jolyn jóndeýdi Qytaidyń "SinSin" kompaniiasymen birlesip "QazGerStroi" JShS-i moinyna alǵan. Bul joldyń uzyndaǵy 415 shaqyrym. Jańa jol eki aralyqtaǵy jolǵa jumsalatyn ýaqytty eki ese qysqartyp, kólik aǵynyn jiiletpek. Bul ýchaskiniń qurylysy 2022 jyly aiaqtalady.
