بيىل قازاقستان حالقى ناۋرىز مەيرامىن جاڭاشىلدىقپەن ءھام جاعىمدى جاڭالىقتارمەن قارسى الۋدا. بۇعان دەيىن ۇلىستىڭ ۇلى كۇنىن تويلاۋدىڭ تۇجىرىمداماسى بەكىتىلىپ، ناۋرىزناما ونكۇندىگى جاريالانعان بولاتىن.
شقو جۇرتشىلىعى دا جىلدىڭ باسىن وزگەشە قارسى الىپ، ونەگەلى دە رۋحاني ءىس-شارالاردىڭ لەگىن جالعاستىرۋدا. ەندىگى كەزەكتە 21 ناۋرىز كۇنى وسكەمەندە قىدىر اتا رەزيدەنسياسى اشىلماق، دەپ حابارلايدى Dalanews.kz Altainews.kz سايتىنا سىلتەمە جاساپ.
بۇل تۋرالى وبلىستىق مادەنيەت باسقارماسى ءمالىم ەتتى. سونداي-اق وسى كۇنى سول جاعالاۋ مۇراجاي-قورىق كەشەنىندە ناۋرىز مەيرامىنا ارنالعان كوپتەگەن ءىس-شارالار وتپەك.
– سول جاعالاۋ مۇراجاي-قورىق كەشەنىندە 21 ناۋرىز كۇنى ۇلتتىق تاعامدار جارمەڭكەسى، قولونەر شەبەرلىك ساباقتارى، ۇلتتىق سپورت ويىندار ءوتىپ، بالالار مەن جاسوسپىرىمدەرگە ارنالعان ويىن الاڭى بولادى. ورتالىق ساحنادا وبلىستىڭ شىعارماشىلىق ۇجىمدارى جانە جەكە ورىنداۋشىلارىنىڭ قاتىسۋىمەن مەرەكەلىك كونسەرت وتەدى. باستى وقيعالاردىڭ ءبىرى قىدىر اتا رەزيدەنسياسىنىڭ اشىلۋ سالتاناتى بولادى، – دەپ حابارلادى مادەنيەت باسقارماسى.
ايتا كەتەيىك، بيىل شقو-دا اياز اتا رەزيدەنسياسى اشىلىپ، جۇرتشىلىق بۇل باستامانى جىلى قابىلداعان بولاتىن. ەندىگى كەزەكتە وسكەمەن تۇرعىندارى قىدىر اتادان باتا الىپ، قىدىر اتا رەزيدەنسياسىندا قوناقتا بولماق.
