جاڭارۋ، جاسارۋ بار. قولمەن ۇستاپ، اۋىزبەن ايتىپ جۇرەتىندەي ءىس جوق. كۇنى كەشە عانا ءبىلىم جانە عىلىم ۆيسە-مينيسترى اسلانبەك ءامريننىڭ شەتەلدە ءبىلىم الۋعا ىقىلاسى "ويانىپ"، ويلاماعان جەردەن قىزمەتىنەن كەتتى.
نەنىڭ بەلگىسى؟
شەتەلدە وقىپ، ۇلتتىق تەحنولوگيالىق دامۋ جونىندەگى اگەنتتىكتە جۇمىس ىستەپ، عىلىمدى دامىتۋ، ناقتىراق ايتساق عىلىمدى كوممەرسيالاۋدى موينىنا العان اسلانبەك ءامرين نەندەي ءىس تىندىردى دەگەن سۇراقتى تىكەسىنەن قويساق، تاس جارىپ، تاۋ قوپارماعانى ويعا ورالىپ، ابدىراپ قالاسىز.
ونىڭ تۇسىندا قازاق عىلىمىنىڭ دامىپ كەتكەنىن كورمەدىك. سول سەكىلدى عالىمداردىڭ عىلىمي-تەحنيكالىق جوبالارى كوممەرسيالانىپ، وندىرىسكە ەنگەنىن دە ەستىمەدىك.
بىزدە لاۋازىمدى تۇلعا ون جەردەن ءبىلىمدى بولسا دا ساياسي تۇلعا بولماسا تۇك تە تىندىرا المايتىنى ايدان انىق.
بىزدە مينيسترلەر وتستاۆكاعا كەتەردە ۆيسە-مينيسترلەر قىزمەتىنەن قوش ايتىساتىن ادەت قالىپتاسىپ كەلەدى.
ۆيسە-مينيستر اسلانبەك ءامريننىڭ قىزمەتىنەن كەتۋى ساعادييەۆتىڭ وتستاۆكاسى تاياپ قالعانداي اسەر قالدىرادى ەكەن...
بۇل قانداي ترەند؟
سوڭعى ۋاقىتتارى ءبىلىم جانە عىلىم مينيسترلىگىندە ۆيسە-مينيسترلەردىڭ شەتەلگە وقۋعا اتتانۋىنا بايلانىستى قىزمەتىنەن كەتەتىن جاڭا ترەند پايدا بولدى.
وتكەن جىلى ءبىلىم جانە عىلىم مينيسترلىگىندە ورتا ءبىلىم بەرۋ سالاسىنا باسشىلىق جاساعان ەلميرا سۋحانبەردييەۆا ەسىمدى ۆيسە-مينيستر اياق استىنان شەتەلدە وقۋعا اڭسارى اۋىپ، اقش-قا اتتانعان.
"بولاشاق" باعدارلاماسىنىڭ تۇلەگى اتانۋى ءۇشىن سىناق تاپسىرعان.
اسىرەسە قازاق تىلىنە كەلگەندە شورقاقتايتىن ەلميرا حانىم “قازتەست” جۇيەسىندەگى قازاق تىلىنەن سىناق تاپسىرىپ، جوعارى 135 باللعا يە بولعانىن ەستىگەندە ءتىپتى، نە دەرىمىزدى بىلمەدىك.
سۋحانبەردييەۆانىڭ ءىزىن الا ساعادييەۆتىڭ تاعى ءبىر ورىنباسارى اسلانبەك ءامرين شەتەلگە اتتانىپ، ءبىلىمى مەن بىلىگىن كوتەرمەك ەكەن...
ادەت پە، الدە...
بايقايسىز با، ءقازىر تۇتاس ءبىر سالانى باسقارعان شەندىلەر وزىنە تاپسىرىلعان جۇمىستى اقساتىپ السا، شەتەلدەگى وقۋىن جالعاستىرۋعا اسىعاتىن بولدى.
تالاي اكىم مەن مينيسترلەردىڭ ورىنباسارلارى شەتەلدە وقۋىن جالعاستىرىپ جۇرگەنىن جاقسى بىلەمىز.
ءبىر قىزىعى سول قازاق تىلىندە ەكى ءسوزدىڭ باسىن قۇراپ سويلەي المايتىن ۆيسە-مينيسترلەر مەن اكىم ورىنباسارلارى «بولاشاق» گرانتىنىڭ مىندەتتى تالابىنىڭ ءبىرى "قازتەستىڭ" قازاق ءتىلى بويىنشا سىناعىنان قالايشا سۇرىنبەي ءوتىپ ءجۇر؟
اينالدىرعان ءبىر جىلدىڭ ىشىندە ءبىلىم جانە عىلىم ءمينيسترىنىڭ قوس بىردەي ورىنباسارى ءبىلىمىن جەتىلدىرۋ ءۇشىن سىرت ەلگە اتتانۋىن قالاي تۇسىنۋگە بولادى؟
ودان بۇرىن ساعادييەۆ ءبىلىمى تولىق ەمەس مامانداردى نەگە جيناپ العان؟ بۇل دا زاڭدى سۇراق.
ساعادييەۆ ورىنباسارلارىنىڭ قىزمەتىنەن كەتۋىنىڭ باسقا سەبەبى بار ما الدە؟ شەتەلدەگى وقۋىن جالعاستىرۋ ۆيسە-مينيسترلەردىڭ وتستاۆكاعا كەتۋىنىڭ شىنايى سەبەبىن بۇركەمەلەۋ ەمەس پە وسى؟
ايتەۋىر ءامريننىڭ وتستاۆكاسى كوكەيدەگى كۇمان-كۇدىكتى زورايتا ءتۇستى.
ساعادييەۆكە جاڭا ورىنباسارىن تاعايىنداردا ونىڭ بىلىمىنە، قازاق ءتىلىن جەتىك بىلەرىنە تولىق كوز جەتكىزىپ الۋعا كەڭەس بەرەمىز. ايتپەسە تاياقتىڭ ءبىر ۇشى تاعى دا وزىنە تيەتىنى انىق.
ايتپاقشى، بىزدەر اسلانبەك ءامريننىڭ قازاق تىلىندە سويلەگەنىن كورگەن دە، ەستىگەن دە ەمەسپىز.
عىلىم دامىدى ما؟
اسلانبەك ءامرين ءبىلىم جانە عىلىم ۆيسە-مينيسترى قىزمەتىن اتقارعان ساتتە عىلىم سالاسىن دامىتۋعا تىكەلەي جاۋاپتى بولدى. سونىمەن قاتار اڭگىمە باسىندا ايتقانىمىزداي عىلىمدى كوممەرسيالاۋ ءىسىنىڭ دە تىگىزىن جاتقىزۋدى موينىنا الدى. وسى رەتتە عىلىمي جوبالاردى كوممەرسيالاۋ ىسىنە قاتىستى از-كەم اڭگىمە ايتا كەتسەك.
بۇگىندە ۇكىمەت عىلىمي جوبالاردى قارجىلاندىرىپ كەلەدى. ءبىراق عىلىمي جوبالاردىڭ ناتيجەسىن وندىرىسكە ەنگىزىپ، كادەگە جاراتۋ جاعى كەمشىن ءتۇسىپ جاتىر. عالىمدار مينيسترلىك بولگەن قارجىعا جۇمىستارىن جۇرگىزىپ، عىلىمي جوبالاردىڭ ناتيجەسىن قاعازعا ءتۇسىرىپ، تارتپاعا سالىپ قويادى. بولعان، بىتكەنى وسى.
ال "عىلىم تۋرالى" زاڭدا ەلىمىزدەگى ۇلتتىق كومپانيالاردىڭ تابىسىنىڭ 1 پايىزىن عىلىمي جوبالاردى قارجىلاندىرۋ باعىتتاۋ تۋراسىنداعى تالاپ، تايعا تاڭبا باسقانداي جازىلعان.
عالىمداردىڭ عىلىمي جوبالارىنىڭ ناتيجەلەرىن وندىرىسكە ەنگىزۋ ءۇشىن ۆيسە-مينيستر ەلىمىزدەگى ۇلتتىق كومپانيالاردىڭ باسشىلارىن جيناپ، ولارعا قازاق عالامدارىنىڭ عىلىمي جوبالارىن وندىرىسكە ەنگىزۋ تۋراسىندا باتىل تالاپ قوياتىن، ساياسي سالماعى بار تۇلعا بولۋى كەرەك.
ال قازاق عىلىمىنىڭ سويىلىن سوعىپ كەلگەن اسلانبەك ءامرين ۇلتتىق كومپانيالاردىڭ باسشىلارىنا تالاپ قويماق تۇگىلى "بالەن" دەپ اڭگىمە ايتاتىنداي حاريزماسى بولدى ما؟ ارينە بولعان جوق.
سوندىقتان بىزدەر كەلەسى ۆيسە-مينيسترلەردىڭ بىلىكتى، ساياسي سالماعى بار تۇلعا بولعانىن قالايمىز. ايتپەسە قازاق عىلىم كولەڭكەدە، ەلەۋسىز كۇيىندە قالىپ قويا بەرەدى.
دۋمان ەسەت ۇلى
