بۇگىن «ازاماتتارعا ارنالعان ۇكىمەت» مەملەكەتتىك كورپوراسياسىنىڭ  شىمكەنتتەگى فيليالىندا «جۇلدىزداردىڭ حقو-داعى ءبىر كۇنى» اتتى رەسپۋبليكالىق اكسياسى ءوتتى. بۇل كۇنى وتاندىق ەسترادا جۇلدىزدارى حالىققا قىزمەت كورسەتۋ ورتالىعى وپەراتورلارىنىڭ كەيپىنە ەندى.

اكسياعا اتاقتى ءانشى ازيزحان شەكەربەكوۆ، «نىسانا»، «شانشار»، «شىمكەنت-شوۋ» تەاترلارىنىڭ اكتەرلەرى داۋرەن ءجۇمادىلوۆ، نۇربول ايتۇلوۆ، اباي ايازبايەۆ، نۇرجان  قۇلشىنبايەۆ، جاراس احمەتوۆ، نارتاي سۇلەيمەنوۆ جانە  الەم چەمپيوندارى بەلگىلى بوكسشى ءبىرجان جاقىپوۆ، قايرات ەرالييەۆ، بوكسشى زاكير سافيۋلليل، بەكداۋلەت  يبراگيموۆ، سونداي-اق، شىمكەنت ءماسليحاتىنىڭ دەپۋتاتتارى قاتىستى. شوۋ-بيزنەس جۇلدىزدارى ازاماتتاردىڭ قۇجاتتارىن قابىلداپ، حقو  قىزمەتكەرلەرىنىڭ رولىنە ۇلكەن قىزىعۋشىلىق تانىتتى.

ولار فرونت-وفيسكە كەلۋشىلەردىڭ مەملەكەتتىك قىزمەتتەرگە قاتىستى سۇراقتارىنا جاۋاپ بەرىپ، ەلەكتروندى كەزەك تالونىن ۇسىنىپ، رەسەپشندەگى وتىنىشتەردى تولتىرۋعا كومەكتەستى.

– ازاماتتارعا ارنالعان ۇكىمەت» شىمكەنت قالالىق فيليالىنىڭ دي⁠رەكتورى باقىت باسىمبەك اتاپ وتكەندەي، تانىمال ازاماتتار حقو ماماندارىنىڭ ءرولىن تاماشا ورىنداپ شىققان. «ءبىزدىڭ جۇلدىزدارىمىز كەرەمەت جۇمىس جاسادى. ارينە، ولارعا ءبىزدىڭ وپەراتور قىزمەتكەرلەرىمىز بەلسەندى تۇردە كومەكتەستى، ايتقانداي- اق، ولار تانىمال تۇلعالارمەن قۋانا-قۋانا جۇمىس جاسادى. ال بۇگىن بىزگە كەلگەن قىزمەت الۋشىلار ازيزحان شەكەربەكوۆ، ءبىرجان جاقىپوۆ جانە باسقا جۇلدىزدار قارسى العانىنا تاڭ قالىپ، ولاردان ەستەلىككە قولتاڭبا الدى، – دەيدى باسىمبەك.

قازىرگى تاڭدا شىمكەنتتىكتەر مەملەكەتتىك قىزمەتتەردى 10 فرونت-وفيستەن الا الادى. بيىلعى جىلدىڭ 9 ايىندا قالاداعى حقو ماماندارى تۇرعىندارعا 1 526 057  مەملەكەتتىك قىزمەت كورسەتكەن.

 

التىناي تاتايەۆا، «ازاماتتارعا ارنالعان ۇكىمەت» مەملەكەتتىك كورپوراسياسى» كە اق شىمكەنت قالاسى بويىنشا فيليالىنىڭ PR-مەنەدجەر