قازاقستاندا باسشىلىق قىزمەتتە جۇمىس ىستەيتىن لاۋازىمدى ءتۇلعالاردىڭ ورتاشا جالاقى كولەمى 788،7 مىڭ تەڭگەنى قۇرايدى. بۇل 2020 جىلعى كورسەتكىشتەن 52،2 پايىز ارتىق. ارينە، اكىمدەر مەن مينيسترلەر جالاقىسى ورتاشادان جوعارى بولىپ تابىلادى، دەپ جازادى Dalanews.
"الايدا ستاتيستيكالىق دەرەكتەرگە سۇيەنسەك، بۇل قازاقستاندا باستىق بولىپ جۇمىس ىستەيتىندەردىڭ بارلىعى 788،7 مىڭ تەڭگە جالاقى الادى دەگەن بىلدىرمەيدى. بۇل ۇلتتىق كومپانيا توپ-مەنەدجەرى مەن شاعىن جانە ورتا كاسىپورىن باسشىلارى تابىسىنىڭ ورتاشا كولەمى دەسەك، دۇرىسىراق بولادى"، دەيدى finprom.kz ساراپشىلارى.
مىسالى، قازاقستاندا ۇلتتىق كومپانيا فيليالىنىڭ جەتەكشىلەرى اراسىندا 14،3 ملن تەڭگە الاتىندارى بار، كەيبىر فيرما باسشىلارى ايىنا 10 ملن تەڭگە تابىس تابادى، سول سەكىلدى الەۋمەتتىك قامتۋ ورتالىق باسشىلارى 364،2 تەڭگە جالاقى الادى.
جالپى، 788،7 مىڭ تەڭگە جالاقى الاتىن باسشىلار ەلىمىزدىڭ قارقىندى دامۋشى بەس وڭىرىندە تىركەلگەن. ەڭ جوعارى جالاقىنى الماتىنىڭ باستىقتارى الادى: 1،2 ملن تەڭگە. اتىراۋدا باستىقتار 983،5 مىڭ تەڭگە، ماڭعىستاۋدا 791 مىڭ تەڭگە، استاناداعى كومپانيا باستىقتارى 853،8 مىڭ تەڭگە جالاقى الادى.
سالالارعا كەلسەك:
- بالاباقشا مەڭگەرۋشىلەرى - 319،2 مىڭ تەڭگە؛
- ۆەتەرينارلىق كلينيكا باسشىسى - 348،1 مىڭ تەڭگە؛
- مەكتەپ ديرەكتورى - 384،5 مىڭ تەڭگە؛
- باس دارىگەر — 507 مىڭ تەڭگە؛
- مەملەكەتتىك مەكەمە باستىعى — 461،3 مىڭ تەڭگە.
شەنەۋنىكتەرگە كەلەتىن بولساق، ەڭ جوعارى جالاقى ۇكىمەت باسشىسى مەن ونىڭ ورىنباسارلارىنا تيەسىلى: ايىنا 2،5 ملن تەڭگەدەن.
وبلىس اكىمدەرى ورتاشا ەسەپپەن 1،7 ملن تەڭگە، مينيسترلەر 1،5 ملن تەڭگە، ءماجىلىس دەپۋتاتتارى 1،3 ملن تەڭگە، سەناتورلار 1،1 ملن تەڭگە جالاقى الادى.
بۇل - ۇلتتىق ستاتيستيكا بيۋروسىنىڭ اشىق دەرەكككوزىندەگى اقپاراتتار.
اقپارات جانە بايلانىس سالاسىنداعى باسشىلار ورتاشا ەسەپپەن 1،1 ملن تەڭگە جالاقى تابادى. سونداي-اق ءىت سالاسىنداعى مىنا ماماندار جالاقىسى جوعارى:
- ءىت ارحيتەكتورلار – 1 ملن تەڭگە،
- بيزنەس ساراپشىلار – 1،4 ملن تەڭگە،
- انيماتورلار – 1،8 ملن تەڭگەگە دەيىن،
- كومپيۋتەرلىك گرافيكامەن جۇمىس ىستەيتىن سۋرەتشىلەر 1،4 ملن تەڭگە.
ورتاشا جالاقى كولەمىنەن 35 ەسە ارتىق تولەنەتىن ءارى كاسىبي اتاۋى دا وزگەشە ماماندىق - ينجەنەريا پسيحولوگى. تەحنيكالىق جۇيە قالتقىسىز جۇمىس ىستەپ، كومپانياعا تابىس اكەلەتىندەي ەتىپ ونى ۇيلەستىرە الاتىن بۇل مامان ەلىمىزدە تاپشى كورىنەدى.
بۇعان دەيىن قازان ايىندا ەڭبەك نارىعىندا تىركەلگەن ەڭ جوعارى جالاقى كولەمى قانشا ەكەنىن جازعان بولاتىنبىز. سونداي-اق قازاقستاندىقتاردىڭ ناقتى جالاقى ءوسىمى ەكونوميكالىق وسىمنەن الدەقايدا ارتتا قالىپ جاتقانىن، ال جوعارى جالاقى جۇمىس ىستەيتىن ادامداردىڭ 9 پايىزىنىڭ ەنشىسىنە بۇيىرىپ وتىرعانىن دا ءبىزدىڭ سايتتان وقي الاسىزدار.
