قازىرگى ۋاقىتتا قالالىق كاسىپورىندار ەپيدەميولوگيالىق جاعدايدىڭ اۋىرلىعىن تۇسىنە وتىرىپ، ءوز قىزمەتكەرلەرىن يممۋنداۋدى جۇرگىزۋدە.

ەلوردالىق تاكسي جۇرگىزۋشىلەرى نۇر-سۇلتانداعى جاپپاي ۆاكسيناسيا ناۋقانىنا قوسىلدى، دەپ قالا اكىمدىگىنىڭ رەسمي سايتى حابارلادى.

ۆاكسيناسيادان وتەتىن كومپانيالاردىڭ كوبى قالانىڭ مەديسينالىق مەكەمەلەرىنىڭ جانىنان قۇرىلعان ءموبيلدى بريگادالاردىڭ قىزمەتىن پايدالانىپ، تىكەلەي جۇمىس ورىندارىندا ۆاكسينا قابىلداپ جاتىر. بۇل ءادىس قىزمەتكەرلەردىڭ جۇمىس ۋاقىتىن المايدى.

مىسالى، «سمەۋ استانا» ج ش س №5 قالالىق ەمحانانىڭ ءموبيلدى توبىن شاقىردى. العاشقى كۇنى 80 ادام ەگىلدى، بۇل قىزمەتكەرلەردىڭ جالپى سانىنىڭ 70%-ىن قۇرايدى. ۆاكسينانىڭ ەكىنشى كومپونەنتى وسى جىلدىڭ 24 شىلدەسىنەن كەشىكتىرىلمەي ۇيىمداستىرىلادى.

ۆاكسيناسيادان تولىق وتەتىن كومپانيالار قاتارى كوبەيىپ كەلەدى. بۇگىن «رەگيون» تاكسوپاركىنىڭ قىزمەتكەرلەرى جاپپاي ۆاكسيناسيادان ءوتتى.

مەكەمە ديرەكتورى سامات قالىمبەتوۆتىڭ ايتۋىنشا، قىزمەتكەرلەردىڭ باسىم بولىگى تۇرعىلىقتى جەرى بويىنشا مەديسينالىق مەكەمەلەردە جانە ساۋدا ورتالىقتارىندا يممۋنداۋدان وتكەن. قالعاندارى جاقىن ارادا ۆاكسينا الادى.

«ۆاكسينانىڭ العاشقى كومپونەنتىن 40-قا جۋىق جۇرگىزۋشى الدى. ولاردىڭ ءبارى ءوزىن جاقسى سەزىنەدى. جۇرگىزۋشىلەرىمىزدىڭ ءبارى يممۋنداۋدان وتۋگە نيەت ءبىلدىردى»، — دەدى «رەگيون» تاكسوپاركىنىڭ ديرەكتورى سامات قالىمبەتوۆ.



ايتا كەتەيىك، ق ر دەنساۋلىق ساقتاۋ مينيسترلىگىنىڭ مالىمەتىنشە ەلوردادا ۆاكسينانىڭ ءبىرىنشى كومپونەنتىن 304 مىڭعا جۋىق ادام الدى، 183 مىڭعا جۋىق قالا تۇرعىنى تولىق يممۋنداۋدان ءوتتى.