الماتى وبلىسى اكىمى اماندىق باتالوۆ رايىمبەك اۋدانىنا بارعان ساپارىن الدىمەن نارىنقولدىقتارعا تۇرعىن ءۇيدىڭ كىلتىن بەرۋ قۋانىشىنان باستادى. بۇل 33 ءۇي – نارىنقولدا سالىنىپ جاتقان 83 كوممۋنالدىق ءۇيدىڭ 1، 2 كەزەڭى بويىنشا قۇرىلىسى اياقتالعان باسپانالار.
قونىس توي قۋانىشىنا كەنەلگەندەر اراسىندا كوپ بالالى وتباسىلار، جەتىم بالالار، مۇگەدەكتەر، مەملەكەتتىك قىزمەتكەرلەر مەن بيۋدجەتتىك مەكەمە قىزمەتكەرلەرى بار. تۇرعىن ۇيلەردىڭ جالپى الاڭى 3242 شارشى مەتر. قۇرىلىسىن «فۋد مس» ج ش س جۇرگىزگەن.
جاڭا ءۇيدىڭ كىلتىن سالتاناتتى جاعدايدا تابىستاعان وبلىس اكىمى باسپانالى بولعان اۋىل تۇرعىندارىن قۇتتىقتاپ، نارىنقول وڭىرىنە جاسالىپ جاتقان مەملەكەتتىك قولداۋلار جانە الداعى ۋاقىتقا جوسپارلانعان جۇمىستار تۋرالى قىسقاشا ايتىپ بەردى. سول سياقتى اۋداننىڭ بۇرىنعى باسشىسى جولان وماروۆتىڭ ەڭبەگىن دە ەسكە الدى.
– شەكارانىڭ شەبىندە، وبلىستىڭ شەتىندە قايتا شاڭىراق كوتەرگەن رايىمبەك اۋدانىنىڭ جاڭارىپ، كوركەيىپ كەلە جاتقانى كوڭىل قۋانتادى. ەلباسى نۇرسۇلتان ءابىش ۇلى نازاربايەۆتىڭ جارلىعىمەن قايتا قۇرىلعاننان بەرى اۋدانداعى حالىق سانى ءوسىپ، 40 مىڭعا جۋىقتادى. سونىڭ ىشىندە ەكى مىڭنان اسا ادام تۋعان جەرىنە قايتا ورالدى. اۋداننىڭ دامۋىنا، ينفراقۇرىلىمىن قالپىنا كەلتىرۋگە بيۋدجەتتەن 17،9 ملرد تەڭگە قارجى جۇمسالدى. جولدارى جاسالىپ، كوشەلەرىنە اسفالت توسەلىپ، جاڭا عيماراتتار سالىندى. باسقا دا يگىلىكتەردىڭ بارلىعى جاسالۋدا. سونىڭ ىشىندە ءبىرىنشى كەزەكتە، اۋدانعا جۇمىس ىستەۋگە كەلگەن قىزمەتكەرلەردى باسپانامەن قامتاماسىز ەتۋ ماسەلەسىن شەشىپ كەلەمىز. بۇگىن، مىنە، سالىنىپ جاتقان 83 كوممۋنالدىق تۇرعىن ءۇيدىڭ 33ء-ىن قولدانىسقا بەرىپ وتىرمىز. قونىستارىڭىز قۇتتى بولسىن! – دەدى ا. باتالوۆ.
نارىنقولدىق ارداگەرلەر اتىنان مەدەتحان ابيروۆ ءسوز الىپ:
– 21 جىلدان كەيىن اۋدانىمىز قايتا تۇلەدى، كوسەگەمىز كوگەردى، وشكەنىمىز جاندى. اۋدانعا رەسپۋبليكادان دا، وبلىستان دا قىرۋار قارجى ءبولىپ، قارقىندى جۇمىس جاسالىپ جاتىر. وسى جاقسىلىقتىڭ ءبارىنىڭ يگىلىگىن حالىق كورىپ وتىر، – دەي كەلە، ەل اعالارىنىڭ اتىنا شىنايى العىسىن جەتكىزدى.
