Almaty oblysy ákimi Amandyq Batalov Raiymbek aýdanyna barǵan saparyn aldymen narynqoldyqtarǵa turǵyn úidiń kiltin berý qýanyshynan bastady. Bul 33 úi – Narynqolda salynyp jatqan 83 kommýnaldyq úidiń 1, 2 kezeńi boiynsha qurylysy aiaqtalǵan baspanalar.
Qonys toi qýanyshyna kenelgender arasynda kóp balaly otbasylar, jetim balalar, múgedekter, memlekettik qyzmetkerler men biýdjettik mekeme qyzmetkerleri bar. Turǵyn úilerdiń jalpy alańy 3242 sharshy metr. Qurylysyn «Fýd MS» JShS júrgizgen.
– Shekaranyń shebinde, oblystyń shetinde qaita shańyraq kótergen Raiymbek aýdanynyń jańaryp, kórkeiip kele jatqany kóńil qýantady. Elbasy Nursultan Ábishuly Nazarbaevtyń Jarlyǵymen qaita qurylǵannan beri aýdandaǵy halyq sany ósip, 40 myńǵa jýyqtady. Sonyń ishinde eki myńnan asa adam týǵan jerine qaita oraldy. Aýdannyń damýyna, infraqurylymyn qalpyna keltirýge biýdjetten 17,9 mlrd teńge qarjy jumsaldy. Joldary jasalyp, kóshelerine asfalt tóselip, jańa ǵimarattar salyndy. Basqa da igilikterdiń barlyǵy jasalýda. Sonyń ishinde birinshi kezekte, aýdanǵa jumys isteýge kelgen qyzmetkerlerdi baspanamen qamtamasyz etý máselesin sheship kelemiz. Búgin, mine, salynyp jatqan 83 kommýnaldyq turǵyn úidiń 33-in qoldanysqa berip otyrmyz. Qonystaryńyz qutty bolsyn! – dedi A. Batalov.
Narynqoldyq ardagerler atynan Medethan Abirov sóz alyp:
– 21 jyldan keiin aýdanymyz qaita túledi, kósegemiz kógerdi, óshkenimiz jandy. Aýdanǵa respýblikadan da, oblystan da qyrýar qarjy bólip, qarqyndy jumys jasalyp jatyr. Osy jaqsylyqtyń báriniń igiligin halyq kórip otyr, – dei kele, el aǵalarynyń atyna shynaiy alǵysyn jetkizdi.
