بۇگىن ق ر تۋريزم جانە سپورت ءمينيسترى ەربول مىرزابوسىنوۆتىڭ قىزمەتىنە كىرىسكەنىمە 100 كۇن تولدى. وسى ۋاقىت ارالىعىندا مينيسترلىك مەملەكەت باسشىسىنىڭ تاپسىرمالارىنا سايكەس ناقتى ماقساتتار قويىلىپ، سولاردى جۇزەگە اسىرۋ باعىتىندا ءبىرقاتار ماڭىزدى جۇمىستار اتقاردى، – دەپ حابارلايدى Dalanews.kz.
ءوز كەزەگىندە ق ر تۋريزم جانە سپورت ءمينيسترى ەربول مىرزابوسىنوۆ الدا ءالى دە جوسپارلانعان كوپ ەكەنىن العا تارتتى. ول ۇلتتىق ارنانىڭ تىكەلەي ەفيرىندە سۇحبات بەرىپ، تۋريزم جانە سپورت سالاسى تۋرالى كەڭىرەك ايتتى.
سۇحبات بارىسىندا مىرزابوسىنوۆ سپورت باسقارمالارى باسشىلارىنىڭ جاپپاي اۋىسۋىن ءتۇسىندىرىپ تە بەردى. كۇنى بۇگىنگە دەيىن ەلىمىز بويىنشا وننان استام وڭىردە سپورت باسقارمالارىنىڭ باسشىلارى قىزمەتتەرىنەن بوساتىلدى.
– مۇندا وبەكتيۆتى ءتاسىل بار: سوڭعى جىلدارى ليسەنزيا سانى مەن وليمپيادا ويىندارىنداعى مەدالدارعا دەيىنگى ناتيجەلەر ايتارلىقتاي تومەندەدى. مينيسترلىك تاراپىنان كوميسسيا قۇرىلدى، ونىڭ قۇرامىنا دەپۋتاتتار، قوعامدىق ۇيىمدار مەن ۆەدومستۆو وكىلدەرى كىردى. وڭىرلەرگە باراتىن ماماندار ءۇشىن العاشقى كريتەريي – ادامنىڭ سپورت سالاسىنان بولۋى. ول سپورتتى باسقارۋ مەنەدجمەنتىنىڭ نەگىزدەرىن بىلەتىن، دايىندىق تەورياسى مەن ادىستەمەسىنىڭ بەلگىلى ءبىر باعىتتارىنا يە مامان بولۋى كەرەك، – دەدى ەربول مىرزابوسىنوۆ.
مينيستر بۇل كريتەرييلەرگە نەگىزدەلە وتىرىپ، كانديداتتاردى انىقتاپ، ولاردى اكىمدىكتەرگە ۇسىناتىنىن اتاپ ءوتتى.
– ءبىز ءبارىمىز مەملەكەتتىڭ يگىلىگى ءۇشىن جۇمىس ىستەيمىز، ءوڭىردىڭ دامۋ ينديكاتورلارى دۇرىس بولعان جاعدايدا مۇددەلەر قايشىلىعى بولمايدى. سەبەبى ءبىز ءقازىردىڭ وزىندە ءار ءوڭىر ءۇشىن سپورتتىڭ باسىم باعىتتارىن انىقتاپ قويدىق. بۇل سپورت تۇرلەرى وليمپيادا باعدارلاماسىنا، پاراليمپيادا باعدارلاماسىنا جانە ۇلتتىق سپورت تۇرلەرىنە كىرەدى. مۇندا ەشقانداي تۇسىنبەۋشىلىك جوق. ەندى وڭىرلەر بىر-بىرىمەن باسەكەلەسپەيدى. ءار وڭىرگە ناقتى تاپسىرما بەرىلەدى: قانداي سپورت ءتۇرىن دامىتۋ قاجەت جانە رەسپۋبليكالىق دەڭگەيدە قانداي ناتيجە كورسەتۋى ءتيىس، – دەدى مىرزابوسىنوۆ.
مينيستر اتاپ وتكەندەي، وليمپياداعا دەيىن تاعايىندالعان 5-6 باسقارما باسشىسى عانا قىزمەتىندە قالدى. ونىڭ ايتۋىنشا، ولار ءالى تولىق جۇمىس ىستەپ ۇلگەرمەگەن، ءبىراق ولاردىڭ الدىنا ناقتى ماقساتتى ينديكاتورلار قويىلعان.
