اقش پەن قىتايدىڭ ساۋدا سوعىسى ودان سايىن ۋشىعا تۇسۋدە. ينۆەستورلار بۇگىن يۋان ديەۆالۆاسياعا ۇشىراۋى مۇمكىن دەپ بولجايدى. وسىنداي جاھاندىق تۋربۋلەنتتىلىك جاعدايىندا مۇناي باعاسى قۇلدىراۋىن جالعاستىرۋدا. كۇنى كەشە 70-تەن 65 دوللارعا تۇسكەن Brent ماركالى مۇنايدىڭ ءبىر باررەلىنىڭ حالىقارالىق قور بيرجاسىنداعى استانا ۋاقىتى بويىنشا ساعات 9:10-داعى باعاسى 60،38 دوللاردى كورسەتىپ تۇر. سوندا ترامپ ايتقانداي، "قارا التىن" باعاسى 40 دوللارعا دەيىن شىنىمەن دە تومەندەۋى مۇمكىن بە؟ بۇل رەتتە Dalanews.kz Goldman Sachs بولجامىن ءوز نازارلارىڭىزعا ۇسىنادى.
امەريكاداعى ءىرى ينۆەستيسيالىق بانك 2026 جىلى دا مۇناي باعامىنىڭ تومەندەۋ ىقتيمالدىلىعى جوعارى ەكەنىن بولجايدى.
"وعان اقش-تاعى رەسەسسيا مەن وپەك+ ۇيىمىنىڭ شەكتەۋلى مۇناي ءوندىرىسى تاسىلىنەن باس تارتۋى سەبەپ. ءبىر باررەل قۇنى 40 دوللار تاقتاتاس مۇناي ءوندىرىسى قارقىن العاندا باعدارعا الىناتىن تومەنگى شەك بولا الادى"، دەلىنگەن حابارلامادا.
Goldman Sachs-تىڭ Brent/WTI ماركالى مۇناي باعالارى بويىنشا الدىڭعى كەزەڭگە جاساعان بولجامى ارزانداۋ ءالى دوعارمايتىنىن اڭعارتادى:
- ەگەر اقش-تاعى رەسەسسيا قاتتى كۇش الماي، قالىپتى جاعدايدا وتسە، Brent مۇنايىنىڭ ءبىر باررەلى 2025 جىلى 58 دوللارعا دەيىن، ال 2026 جىلى 50 دوللارعا دەيىن ارزانداۋى مۇمكىن.
- عالامدىق ەكونوميكانىڭ باياۋلاۋى اياسىندا وپەك+ قازىرگى ۇستانعان ساياساتىن وزگەرتپەسە، باعا 54/45 دوللار بولادى.
- تۇراقتى ەكونوميكالىق جاعدايدا وپەك+ تاۋلىگىنە 2،2 ملن باررەل ءوندىرىسى تالابىن ۇستانسا دا باعا 53/45 دوللار ارالىعىن قامۋى مۇمكىن.
- ارالاس سەناريي – عالامدىق ەكونوميكانىڭ باياۋلاۋى + مۇناي ءوندىرىسى شەكتەۋلەرىن ەلەمەۋ نەگاتيۆ جاعداي تۋدىرۋى ىقتيمال: 2025 جىلى – 46 دوللار، 2026 جىلى – 40 دوللار.
"ال،ءتىپتى كۇتپەگەن قاتەرلى جاعدايلار تۋىنداعاندا دا Brent ماركالى مۇناي باعاسىنىڭ 40 دوللاردان ءارى تومەندەۋ ىقتيمالدىلىعى مۇمكىن ەمەس"، دەلىنەدى Goldman Sachs بولجامىندا.
بۇعان دەيىن قازاقستان قارجىگەرلەرى قاۋىمداستىعىنىڭ مۇناي باعاسىنا قاتىستى بولجامىن جازعانبىز. سونداي-اق "التىن قىمباتتاپ، مۇناي ارزانداپ جاتىر". ترامپ پەن ارابتار شىنىمەن دە تىزە قوستى ما؟" دەگەن سايتىمىزداعى ماقالانى وقي وتىرىڭىزدار.
جالپى، مۇناي باعاسىنىڭ قۇلدىراۋى ەلىمىزدە تەڭگەنىڭ دە قاتتى قۇنسىزدانۋىنا تۇرتكى بولۋدا.
